E AÑA akí ta hasi 100 aña ku Testigunan di Yehova a presentá e “Foto-Drama di Kreashon” pa promé biaha. Esaki ta un produkshon ku a ser prepará spesialmente pa yuda hende pone fe den Beibel, e Palabra di Dios. Den un époka ku e doktrina di evolushon, krítika pisá riba Beibel i duda a kaba ku fe di hopi hende, e “Foto-Drama di Kreashon” sí a mustra ku Yehova ta e Kreador.

Charles T. Russell, kende e tempu ei tabata dirigí e Studiantenan di Beibel, konstantemente tabata buska e manera mas mihó i mas rápido posibel pa plama e bèrdat di Beibel. E tempu ei, e Studiantenan di Beibel tabatin mas ku tres dékada ta usa publikashon imprimí pa plama e bèrdat. Pero nan bista a kai riba un otro posibilidat: pelíkula.

Den dékada di 1890, industria sinematográfiko a kuminsá presentá pelíkula den kua aktornan no tabata papia. Na komienso di aña 1903, iglesia baptista a presentá un pelíkula religioso den nan iglesia na New York. Pues na 1912, tempu ku Ruman Russell a kuminsá ku preparashon di e “Foto-Drama,” e industria sinematográfiko tabata den su fase inisial. Ruman Russell a realisá ku e sistema akí por a yuda plama e bèrdat di Beibel na un manera ku nan lo no por a logra ku literatura so.

E produkshon “Foto-Drama” tabatin un durashon di ocho ora, pero generalmente nan tabata present’é den kuater sekshon. E produkshon tabata konsistí di, entre otro, grabashon di 96 diskurso bíbliko kòrtiku ku un oradó bon konosí, kende tabatin un ekselente stèm, a nara. Hopi di e esenanan tabatin músika klásiko. Rumannan ábil tabata toka e grabashonnan di stèm i músika riba tokadisko i tabata sinkronisá esakinan ku e pelíkula- i slidenan di koló; e pelíkula- i slidenan akí tabata presentá esenanan di vários relato bíbliko bon konosí.

Mayoria di e pelíkulanan i hopi di e slidenan di glas tabata kumprá na studionan komersial. Artistanan profeshonal di Filadelfia, New York, Paris i Lònden, a pinta e esenanan pa e slidenan di glas i pa e pelíkulanan. Algun tim di e Departamento di Arte na Bètel tambe tabata pinta vários kos pa e Foto-Drama; hopi biaha, nan tabata pinta esenanan pa e slidenan nobo pa remplasá esnan ku a kibra. Fuera di e pelíkulanan kumprá, nan tabatin  grabashon di miembronan di e famia di Bètel ku nan a filma na Yonkers, New York. E rumannan akí a hunga ròl di vários personahe bíbliko, manera Abraham, Isak i e angel ku a prevení Abraham di sakrifiká su yu hòmber.—Gén. 22:9-12.

Un kompañero di trabou di Ruman Russell a bisa prensa ku e medio akí ‘lo por pone míles di hende haña interes den e Skritura, mas ku kualke otro kos ku a ser hasí den pasado pa plama mensahe religioso.’ Kon miembronan di klero a reakshoná? Nan a apoyá e sistema nobo akí pa alkansá e tantísimo hendenan ku tabatin hamber spiritual? Al kontrario, lidernan di kristiandat en general a rechasá e “Foto-Drama” i algun a asta usa astusia i trikinan baho pa stroba hende di wak e produkshon akí. Por ehèmpel, tabatin un biaha ku un lider di kristiandat a laga kòrta koriente di e lugá kaminda nan tabata bai presentá e “Foto-Drama.”

Apesar di esei, hende tabata basha bini e teaternan pa wak e “Foto-Drama,” ku tabata grátis. Na Merka so, e rumannan tabata pasa e “Foto-Drama” na kasi 80 stat tur dia. Hopi hende a keda masha impreshoná ora ku pa promé biaha nan a mira un pelíkula den kua aktornan ta papia. Danki na e teknologia, den un ratu di ora nan por a mira susesonan ku ta tuma lugá durante un lapso di tempu; nan por a mira por ehèmpel kon un puitu ta sali for di un webu òf kon un flor ta habri. Ademas, e esenanan ku tabatin di aber ku kosnan sientífiko a resaltá e sabiduria impreshonante di Yehova. I manera nos a menshoná na komienso di e artíkulo akí, ora ku un persona a mira Ruman Russell riba pantaya ta introdusí e “Foto-Drama,” el a haña ku ‘Ruman Russell a keda bibu-bibu den e pelíkula.’

Tim Dirks, un outor i historiadó riba tereno di trahamentu di pelíkula, a deskribí e “Foto-Drama” komo ‘e promé produkshon sinematografia ku a sinkronisá pelíkula- i slidenan di koló ku stèm ku a hasi un gran impreshon.’ E pelíkulanan ku a ser produsí promé ku e “Foto-Drama” tambe a hasi uso di algun di e téknikanan akí pero nunka promé a kombiná nan tur den un solo produkshon, i sigur no den un produkshon basá riba Beibel. I niun di e pelíkulanan ei no a haña mas akohida ku e “Foto-Drama.” Den e promé aña so, un total di mas òf ménos nuebe mion hende, na Norteamérika, Europa, Australia i Nueva Zelandia, a wak e “Foto-Drama”!

E promé presentashon di e “Foto-Drama” a tuma lugá na New York, dia 11 di yanüari 1914. Shete luna despues, mundu a ser asotá pa e desaster ku despues nan a yama e Promé Guera Mundial. Pero apesar di esei, rònt mundu, multitut di hende tabata sigui bini huntu pa wak e “Foto-Drama.” E imágennan bibu di e bendishonnan ku e Reino lo trese pa humanidat den futuro tabata un gran konsuelo pa nan. No tin duda, pa e aña 1914, e “Foto-Drama” tabata den tur sentido un produkshon realmente úniko!