1, 2. (a) Relatá un eksperensia ku ta mustra e balor di hasi pregunta bon pensá. (Wak e promé plachi.) (b) Dikon nos no mester tin miedu di papia tokante tópikonan difísil?

ALGUN aña pasá, un ruman muhé tabatin un kòmbersashon tokante Beibel ku su kasá kende no tabata Testigu di Yehova. Durante nan kòmbersashon, e esposo a bisa ku e ta kere den e doktrina di Trinidat. Realisando ku su esposo no tabata komprondé bon kiko e doktrina ei ta enserá, ku takto nos ruman a puntra su esposo: “Bo ta kere ku Dios ta Dios, ku Hesus ta Dios i ku spiritu santu tambe ta Dios i ku nan tres ta forma ún Dios?” Sorprendí, e esposo a kontestá: “Nò. Mi no ta kere esei!” Despues di esei, a sigui un kòmbersashon ameno tokante ken Dios ta realmente.

² Kiko nos ta siña for di e eksperensia akí? Di promé, si nos ta usa takto i ta hasi preguntanan bon pensá, nos por haña bon resultado. Di dos, nos no mester tin miedu di papia tokante tópikonan difísil manera Trinidat, fièrnu di kandela òf e eksistensia di un Kreador. Dikon nò? Pasobra si nos ta dependé riba Yehova i ta hasi bon uso di loke e ta siña nos, nos  por duna kontesta konvinsente ku ta alkansá kurason di nos oyentenan. (Kol. 4:6) Den e artíkulo akí, nos lo trata tres método ku lo yuda nos pa ta mas efikas den nos manera di siña hende. Nos lo mira (1) kon pa hasi pregunta ku ta animá un persona pa ekspresá su mes, (2) kon pa rasoná riba loke Beibel ta bisa i (3) kon pa usa ilustrashon pa hasi e punto ku nos ta trata mas kla.

3, 4. Dikon ta importante pa nos hasi pregunta pa saka afó kiko un persona ta kere? Duna un ehèmpel.

³ Pregunta por yuda nos saka afó kiko un persona ta kere. Dikon esei ta importante? Proverbionan 18:13 ta bisa: “Esun ku respondé promé ku e skucha, esei ta bobedat i bèrgwensa p’e.” Sí, ta mihó nos purba di saka afó promé kiko e persona ku nos ta papia kuné ta kere pa no sosodé ku nos ta tuma hopi tempu pa refutá un siñansa ku e persona no ta ni kere den dje!—1 Kor. 9:26.

⁴ Suponé ku nos ta papiando tokante fièrnu ku un persona. No ta tur hende ta kere ku fièrnu ta un lugá literal kaminda hende ta ser tormentá den kandela. P’esei, kisas nos por bisa algu manera: “Hende tin vários idea tokante fièrnu. Mi por sa kiko abo ta pensa di fièrnu?” Despues ku nos skucha e persona su kontesta, nos lo ta den mihó posishon pa yud’é komprondé loke Beibel ta bisa tokante e tópiko ei.

5. Pakiko nos tin ku hasi pregunta pa sa dikon un persona ta kere loke e ta kere?

⁵ Ora nos ta hasi pregunta ku takto, nos por haña sa tambe dikon un persona ta kere loke e ta kere. Por ehèmpel, kiko nos por hasi si un persona den sirbishi bisa nos ku e no ta kere den Dios? Podisé, fásilmente nos por asumí ku e persona ei ta kere den evolushon. (Sal. 10:4) Sinembargo, tin hende ku a stòp di kere den Dios pa motibu di sufrimentu ku nan òf otronan a pasa aden. Nan tin problema pa kere ku un Kreador amoroso ta permití asina tantu sufrimentu. P’esei, si un doño di kas bisa nos ku e no ta kere den Dios, ta bon pa nos puntr’é: “Ta semper bo tabata pensa asina?” Si e persona bisa “nò,” nos por puntr’é si tin algu ku a pon’é kuminsá duda ku Dios ta eksistí. Su kontesta por yuda nos determiná kon ta e mihó manera pa yud’é.—Lesa Proverbionan 20:5.

6. Kiko nos mester hasi despues di a hasi un persona un pregunta?

⁶ Despues ku nos hasi un pregunta, ta importante pa nos skucha e persona su kontesta i lag’é sa ku nos ta respetá su sintimentunan. Por ehèmpel, suponé ku un persona bisa nos ku ta un tragedia a pon’é kuminsá duda ku ta eksistí un Kreador amoroso. Promé ku nos kuminsá splik’é dikon nos ta kere ku Dios ta eksistí, ta bon pa nos lag’é sa ku nos ta komprondé dikon e ta pensa asina i ku no ta malu pa puntra dikon nos ta sufri. (Hab. 1:2, 3) Nos pasenshi i amor por lanta su kuriosidat pa sa mas. *

7. Kiko nos mester hasi si nos ke tin bon resultado den sirbishi?

⁷ Laga nos wak awor kon nos por rasoná riba loke Beibel ta bisa. Beibel ta e hèrmènt prinsipal ku nos ta usa den sirbishi i ku su yudansa nos por ta “plenamente kompetente, kompletamente prepará pa tur bon obra.” (2 Tim. 3:16, 17) Pero pa nos por tin bon resultado den sirbishi, nos tin ku hasi mas ku djis lesa teksto; nos tin ku rasoná a base di e tekstonan ku  nos ta lesa i splika nan. (Lesa Echonan 17:2, 3.) Pa ilustrá esaki, laga nos trata tres ehèmpel.

8, 9. (a) Kon nos por rasoná ku un persona ku ta kere ku Hesus ta igual ku Dios? (b) Kon abo a yuda hende rasoná riba e tópiko akí?

⁸ Ehèmpel 1: Den sirbishi, nos ta topa un persona ku ta kere ku Hesus ta igual ku Dios. Ki teksto di Beibel nos por usa pa rasoná riba e tópiko akí? Wèl, nos por pidi e persona pa lesa Huan 6:38, kaminda Hesus a bisa: “Mi no a baha for di shelu pa hasi mi boluntat, ma pa hasi boluntat di esun ku a manda mi.” Despues di a lesa e teksto, nos por puntra e persona: “Si Hesus mes ta Dios, ta ken a dun’é e mandato pa baha for di shelu? Lo no ta un Persona ku ta mas ku Hesus? Pa un persona por manda un otro hasi algu, e mester tin mas outoridat ku esun ku el a manda, no ta bèrdat?”

⁹ Nos por lesa Filipensenan 2:9 tambe; einan, apòstel Pablo ta deskribí loke Dios a hasi despues ku Hesus a muri i a ser resusitá. E versíkulo ei ta bisa: “Dios a hals’é [esta, Hesus] na un puesto mas haltu i bondadosamente a dun’é e nòmber ku ta riba tur otro nòmber.” Pa yuda e persona rasoná riba e teksto ei, nos por puntr’é: “Si Hesus tabata igual ku Dios promé ku el a muri i Dios a hals’é despues na un posishon mas haltu, esei no ta nifiká ku Hesus lo a haña un posishon mas haltu ku Dios? Pero, por tin un persona mas haltu ku Dios?” Si e persona ku nos ta papia kuné ta sinsero i ta respetá e Palabra di Dios, e manera di rasoná akí lo motiv’é pa analisá e tópiko mas aleu.—Echo. 17:11.

10. (a) Kon nos por rasoná ku un persona ku ta kere den fièrnu di kandela? (b) Kon abo a yuda hende rasoná riba e tópiko akí?

¹⁰ Ehèmpel 2: Un doño di kas masha religioso tin problema pa kere ku hende malbado lo no ser tormentá pa semper den fièrnu di kandela. Kisas e ta kere den fièrnu di kandela pasobra e ke pa hende malbado haña kastigu pa nan mal echonan. Kon nos lo por rasoná ku un persona ku ta pensa asina? Promé, nos por sigur’é ku e malbadonan lo haña nan kastigu. (2 Tes. 1:9) Kaba, nos por lag’é lesa Génesis 2:16 i 17, ku ta mustra ku e kastigu pa piká ta morto. I nos por bis’é tambe ku Dios no a bisa ku hende lo haña kastigu den fièrnu di kandela. Kaba, nos por lesa Génesis 3:19 ku ta mustra ku e kastigu pa Adam tabata ku lo el a bolbe na stòf. Anto nos lo por puntra e doño di kas: “Bo ta kere ku lo tabata hustu pa bisa Adam ku lo el a bolbe na stòf siendo ku ta den fièrnu di kandela  lo el a bai?” E pregunta ei por yuda un persona sinsero pensa mas aleu riba e tópiko akí.

11. (a) Kon nos por rasoná ku un persona ku ta kere ku tur bon hende ta bai shelu? (b) Kon abo a yega di rasoná ku un hende riba e tópiko akí?

¹¹ Ehèmpel 3: Den sirbishi, nos ta topa un persona ku ta kere ku tur bon hende ta bai shelu. E kreensia ei por tin influensia riba e manera ku e doño di kas ta komprondé Beibel. Por ehèmpel, suponé ku nos ta lesa Revelashon 21:4. (Les’é.) E persona ei por asumí ku e teksto akí ta papia di bida den shelu. Kon nos lo por rasoná kuné? En bes di lesa mas teksto di Beibel, nos lo por hala su atenshon riba algu ku e teksto ei mes ta bisa, esta, ku “lo no tin morto mas.” Kaba, nos lo por puntr’é: “Bo ta di akuerdo ku pa Beibel bisa ku ‘lo no tin morto mas,’ morto lo mester tabata eksistí promé?” Probablemente lo e bai di akuerdo ku nos. Despues, nos lo por hala su atenshon na e echo ku nunka no tabatin morto den shelu i ku ta aki riba tera so hende sa muri. Ta lógiko anto ku Revelashon 21:4 mester ta referí na e futuro bendishonnan ku lo tin aki riba tera.—Sal. 37:29.

12. Dikon Hesus a usa ilustrashon?

¹² Ademas di usa pregunta, Hesus a usa ilustrashon durante su trabou di prediká. (Lesa Mateo 13:34, 35.) E ilustrashonnan akí a yuda revelá si su oyentenan tabata sinsero òf nò. (Mat. 13:10-15) Ademas, Hesus su ilustrashonnan a pone ku hende tabata skuch’é ku smak i a keda kòrda loke e tabata siña nan. Awor, kon nos por usa ilustrashon ora nos ta siña hende?

13. Ki ilustrashon nos por usa pa mustra ku Dios tin mas outoridat ku Hesus?

¹³ Hopi bes, ilustrashonnan simpel ta duna mihó resultado. Por ehèmpel, pa splika ku Dios ta mas ku Hesus kisas nos por usa e siguiente ilustrashon: Nos por mustra e doño di kas ku tantu Dios komo Hesus a kompará nan relashon ku e relashon entre un tata i un yu. (Luk. 3:21, 22; Huan 14:28) Despues, nos por puntr’é: “Si bo kier a konvensé mi ku dos persona ta igual, ki relashon di famia lo bo a usa pa ilustrá e punto ei?” Kisas e persona lo bisa e relashon ku tin entre dos ruman òf asta un oochi. Si e kontestá asina, nos por bis’é ku esei ta un bon ilustrashon. Despues, nos lo por puntr’é: “Si ami ku bo por a pensa mesora riba e ilustrashon akí, bo no ta kere ku Hesus—e Gran Maestro—tambe lo por a hasié? Pero, e no a usa e relashon entre dos ruman; Hesus a papia di Dios komo su Tata. Di e manera ei, Hesus a yuda nos komprondé bon kla ku Dios tabat’ei promé kuné i ku Dios tin mas outoridat kuné.”

14. Ki ilustrashon nos por usa pa mustra ku no ta lógiko pa pensa ku Dios ta laga Diabel tormentá hende den fièrnu di kandela?

¹⁴ At’akí un otro ehèmpel: Algun hende ta kere ku Satanas tin fièrnu di kandela na su enkargo. Kon nos por yuda un mayor komprondé ku lo no ta lógiko pa pensa ku Dios ta laga Diabel tormentá hende den fièrnu di kandela? Nos por rasoná kuné asin’akí: “Imaginá bo ku bo yu a bira masha rebelde i ta hasi hopi kos malu. Kiko lo bo hasi?” Probablemente e mayor lo bisa ku lo e korigí su yu. I kisas bes tras bes, lo e purba di yuda su yu p’e stòp di hasi loke ta malu. (Pro. 22:15) E ora ei, nos por puntra e mayor: “Kiko lo bo hasi si bo yu no ke stòp di hasi malu?” Mayoria di mayor lo bisa ku e ora ei sí nan lo tin ku straf nan yu. Despues, nos lo por puntra e mayor: “Kon lo bo sinti si bo haña sa ku ta un persona malbado a influensiá  bo yu i pone ku e ta hasi malu?” Sin duda e mayor lo no keda kontentu ku e persona ei. Finalmente, pa hasi e punto di e ilustrashon kla, nos lo por puntra e mayor: “Sabiendo ku ta é persona malbado ei a influensiá bo yu, lo bo pidi é mes pa straf bo yu?” Ta klaru ku su kontesta lo ta nò. Pues, ta bisto anto ku no ta lógiko pa pensa ku Dios lo usa Satanas e Diabel pa kastigá e personanan ku Diabel mes a influensiá pa hasi loke ta malu.

15, 16. (a) Dikon nos no mester ferwagt ku tur hende ku nos prediká na dje lo aseptá e mensahe di Reino? (b) Nos mester ta un super bon maestro pa nos por tin éksito den sirbishi? Splika. (Wak tambe e kuadro “ Un Seri Ku Ta Yuda Nos Duna Kontesta.”)

¹⁵ Nos ta konsiente ku no ta tur hende ku nos prediká na dje lo aseptá e mensahe di Reino. (Mat. 10:11-14) Esei ta asina asta si nos hasi e preguntanan korekto i usa e mihó rasonamentu i ilustrashonnan ku tin. Kòrda ku ta algun hende so a aseptá e siñansanan di Hesus, e mihó Maestro ku a yega di biba riba tera!—Huan 6:66; 7:45-48.

¹⁶ Di otro banda, asta si nos ta sinti ku nos no ta un super bon maestro, nos por tin bon resultado den sirbishi. (Lesa Echonan 4:13.) Dios su Palabra ta duna nos bon motibu pa kere ku ‘tur esnan ku ta dispuesto pa aseptá e bèrdat ku ta hiba na bida eterno’ lo aseptá e bon notisia. (Echo. 13:48) P’esei, laga nos desaroyá i keda ku un punto di bista balansá. Nos mester hasi nos bèst pa mehorá nos métodonan di siña hende, pero nos no mester sinti nos desanimá ora hende rechasá e mensahe di Reino. Si nos ta dependé riba Yehova i ta probechá plenamente di e entrenamentu ku e ta perkurá pa nos, nos lo bira mihó maestro i esaki lo benefisiá tantu nos komo e personanan ku ta skucha nos. (1 Tim. 4:16) Sí, Yehova por yuda nos “kontestá kada persona.” I manera e siguiente artíkulo ta mustra, si nos ta trata hende manera nos ke pa nan trata nos, nos lo tin éksito den sirbishi.