1, 2. Dikon Pablo por a komprondé pa e rumannan ku a parse débil?

NOS tur ta sinti nos débil de bes en kuando. Tin biaha, un alergia òf grip por agotá nos asina tantu ku nos no tin energia pa kumpli ku nos aktividatnan diario. Awor, imaginá bo ku bo ta sintiendo bo mes débil, no ún òf dos siman, sino lunanan largu. Den un situashon asina, lo bo no keda kontentu si otronan ta purba di komprondé bo i ta trata bo ku kompashon?

² Apòstel Pablo tambe a yega di sinti su mes débil debí na preshon ku el a hañ’é kuné tantu paden komo pafó di e kongregashon kristian. Na mas ku ún okashon el a pensa ku lo e no tabatin forsa mas pa sigui. (2 Kor. 1:8; 7:5) P’esei, reflekshonando riba su bida i tur e difikultatnan ku el a hañ’é kuné komo un kristian fiel, el a bisa: “Ken ta débil sin ku mi tambe ta sinti mi débil?” (2 Kor. 11:29) I ora el a kompará e miembronan di e kongregashon kristian ku e partinan di kurpa di hende, el a bisa ku ta nèt esnan ku “ta parse mas débil ta esnan nesesario.” (1 Kor. 12:22) Kiko Pablo tabata ke men ku e palabranan ei? Dikon nos mester mira nos rumannan ku ta parse débil manera Yehova ta mira nan? I kon esaki ta benefisiá nos?

3. Kiko por influensiá e manera ku nos ta pensa di nos rumannan ku tin mester di yudansa?

³ Nos ta bibando den un mundu kompetitivo kaminda hende ta pensa ku pa bo tin éksito bo mester ta hóben i fuerte. I hopi hende ta hasi loke sea pa nan logra loke nan ke; tin biaha nan ta asta probechá di esnan mas débil. Aunke nos no ta aprobá e aktitut ei, sin ku nos sa, e por influensiá nos i nos por kuminsá pensa malu di algun di nos rumannan ku regularmente tin mester di yudansa. Pero, kiko por yuda nos mira nos rumannan manera Yehova ta mira nan?

4, 5. (a) Segun e ilustrashon na 1 Korintionan 12:21-23, kon Yehova ta mira tur su sirbidónan? (b) Kon nos ta benefisiá ora nos ta yuda nos rumannan ku ta parse débil?

⁴ Un ilustrashon ku Pablo a usa den su promé karta na e Korintionan por yuda nos komprondé kon Yehova ta mira su sirbidónan ku ta débil. Den kapítulo 12, Pablo ta kòrda nos ku asta e parti di kurpa ku ta parse mas débil òf innesesario tin su funshon. (Lesa 1 Korintionan 12:12, 18, 21-23.) Di otro banda, tin sierto evolushonistanan ku ta kontradisí esaki. No opstante, resultado di estudionan di anatomia ta mustra ku algun parti di kurpa, ku ántes hende tabata pensa ku nan no ta nesesario, tin funshon masha importante. * Por ehèmpel, tin hende tabata duda ku nos dede di pia chikitu tin un funshon; sinembargo, sientífikonan a deskubrí ku e dede akí ta yuda tene henter nos kurpa den balansa.

⁵ Pablo su ilustrashon ta mustra bon kla ku tur miembro di e kongregashon kristian ta nesesario, òf balioso. Ta Satanas ke pa nos kere ku nos no ta sirbi pa nada i ku Yehova no ta interesá den nos. (Yòb 4:18, 19) Pero pa Yehova, tur su sirbidónan, inkluso esnan ku ta parse débil, ta “nesesario.” E pensamentu ei ta laga nos sinti nos bon ku nos ta parti di un kongregashon i di un hermandat mundial. Pensa por ehèmpel riba un okashon ku bo a duna un ruman di edat un man pa yud’é kana. Probablemente bo a ahustá bo pasonan na esnan di dje. Bo no a sinti bo bon ku bo por a yuda e ruman? Sí, ora nos ta yuda otro hende, nos ta haña goso, mas pasenshi, nos amor pa nos rumannan ta oumentá i nos ta bira mihó kristian. (Efe. 4:15, 16) Nos Tata amoroso ke pa nos balorá tur nos rumannan sin importá nan limitashonnan. Ora nos ta hasi esei, nos lo tin un punto di bista balansá di nos rumannan i nos lo trata otro ku mas amor.

6. Kon Pablo a usa e palabranan “débil” i “fuerte”?

⁶ Ta bèrdat ku den Pablo su karta na e Korintionan, el a usa e palabra “débil” pa referí na algun persona den kongregashon. Pero, el a hasi esaki pa indiká kon algun hende ku no tabata kristian tabata pensa di e kristiannan di promé siglo. El a usa e palabra débil pa indiká tambe kon e mes a yega di sintié. (1 Kor. 1:26, 27; 2:3) P’esei, ora el a bisa ku algun kristian tabata “fuerte,” e no tabata ke men ku e kristiannan ei tabata mihó ku e otronan. (Rom. 15:1) Mas bien, e tabata ke men ku e kristiannan ku tabatin mas eksperensia, mester tabatin pasenshi ku esnan ku no tabata fuertemente ankrá ainda den e bèrdat.

7. Kiko por stroba nos di yuda nos rumannan ku ta den nesesidat?

⁷ Ora nos ta yuda “e pobernan” òf e débilnan, nos ta imitá Yehova, i e ta keda kontentu  ku nos. (Sal. 41:1; Efe. 5:1) Pero, no ta tur biaha ta fásil pa yuda nos rumannan ku tin mester di yudansa. Dikon? Tin biaha pensamentunan negativo por stroba nos. Por ehèmpel, nos por kuminsá pensa ku ta e ruman mes tin ku resolvé su asuntunan. Òf kisas nos ta evitá di aserká un ruman ku ta den un situashon difísil pasobra nos no sa kiko pa bis’é. Laga nos wak kiko Cynthia, * un ruman kende su esposo a bandon’é, a bisa: “Si bo ruman ta evitá bo òf ta komportá su mes na un manera ku bo no ta ferwagt di un bon amigu, e ta hùrt bo. Ora bo ta pasando den tempu difísil, bo tin mester di amigunan ku ta stima bo.” Rei David tambe a sintié di hùrt ora su amigunan a evit’é.—Sal. 31:12.

8. Kiko por yuda nos mustra mas empatia i kompashon na nos rumannan?

⁸ Awor, kiko por yuda nos mustra empatia i kompashon na nos rumannan ku tin mester di yudansa? Nos mester kòrda ku algun di nos rumannan stimá ta “débil,” òf tin mester di yudansa, debí na situashonnan difísil manera malesa i depreshon òf debí ku nan ta biba den un kas kaminda no ta tur hende ta Testigu. Un dia nos tambe por haña nos den un situashon asina, i nos lo ke pa otronan trata nos ku kompashon. Pensa riba e israelitanan. Tempu ku nan tabata na Egipto, nan tabata pober i débil. I ora nan tabata bai drenta e Tera Primintí, Yehova a kòrda nan pa nan ‘no hasi nan kurason duru’ pa ku nan rumannan ku tabata sufri. Yehova tabata ke pa nan yuda nan rumannan pober ku tabatin mester di yudansa.—Deu. 15:7, 11; Lev. 25:35-38.

9. Kiko nos mester hasi ora un di nos rumannan bira débil? Ilustrá esaki.

⁹ En bes di husga òf duda den nos rumannan ku ta pasando den un situashon difísil, nos mester yuda nan i animá nan. (Yòb 33:6, 7; Mat. 7:1) Kon asina? Wèl, imaginá bo ku un motosiklista a haña un aksidente i nan ta kore hib’é EHBO. Kiko e staf médiko lo hasi? Nan lo purba di saka afó si ta e motosiklista mes a kousa e aksidente? Nò, mesora nan lo dun’é asistensia médiko. Den e kongregashon ta meskos. Ora un di nos rumannan bira débil debí na problemanan personal, loke nos mester hasi ta dun’é yudansa spiritual.—Lesa 1 Tesalonisensenan 5:14.

10. Den ki sentido algun ruman ku ta parse débil, en realidat ta “riku den fe”?

¹⁰ Tin ruman ku por parse débil. Pero si bo para ketu i pensa riba nan situashon, lo bo ripará ku realmente nan no ta débil! Pensa por ehèmpel riba nos ruman muhénan ku tin vários aña ta soportá oposishon di parti di nan famia. Algun di nan kisas ta parse débil òf frágil. Pero nan tin un fortalesa i un fe sobresaliente! Awor kiko di un mama soltero ku regularmente ta asistí na e reunionnan huntu ku su yu òf yunan? Su fe i determinashon no ta impreshoná bo? Anto kiko di nos tinernan ku ta pega na e bèrdat apesar di mal influensia na skol? Ku tur modestia, nos tin ku atmití ku e rumannan ei, ku ta parse débil, por ta mesun “riku den fe” ku esnan ku ta den un situashon mas faborabel.—Sant. 2:5.

11, 12. (a) Kiko por yuda nos mira nos rumannan manera Yehova ta mira nan? (b) Kiko nos por siña for di e manera ku Yehova a trata Aron?

¹¹ Pa nos por mira nos rumannan manera Yehova ta mira nan, ta bon pa nos wak kon el a yega di trata algun di su sirbidónan den pasado ora nan a kometé eror. (Lesa Salmo 130:3.) Tuma por ehèmpel e okashon ku Aron a traha e bisé di oro. Si bo tabata huntu ku Moises, kiko lo bo a pensa di e èksküsnan flou ku Aron a bini kuné? (Éks. 32:21-24) Òf kiko lo bo a pensa di  Aron su aktitut, ora ku bou di influensia di su ruman Miriam, el a kritiká Moises pasobra el a kasa ku un muhé estranhero? (Num. 12:1, 2) I kon lo bo a reakshoná ora ku Aron i Moises a keda sin duna gloria na Yehova na momento ku El a perkurá milagrosamente pa awa na Meriba?—Num. 20:10-13.

¹² Na tur e okashonnan akí, Yehova por a kastigá Aron mesora. Pero Yehova tabata sa ku Aron no tabata un mal hende. Ta parse ku Aron a permití situashonnan difísil i mal influensia di otronan desvi’é. Sinembargo, semper ku a konfront’é ku su fayonan, e tabata kla pa atmití esakinan i a aseptá e desishonnan ku Yehova a tuma. (Éks. 32:26; Num. 12:11; 20:23-27) Yehova a enfoká riba Aron su fe i e echo ku el a arepentí di su erornan. P’esei, siglonan despues, ainda hende tabata kòrda riba Aron i su desendientenan komo fiel sirbidónan di Yehova.—Sal. 115:10-12; 135:19, 20.

13. Ki análisis nos tin ku hasi pa nos por imitá Yehova?

¹³ Pa nos por pensa manera Yehova ta pensa, nos tin ku analisá e manera ku nos ta pensa di nos rumannan ku ta parse débil. (1 Sam. 16:7) Por ehèmpel, imaginá bo ku un tiner no ta usa disernimentu ora di skohe entretenimentu òf ku e tin un aktitut indiferente. Kiko lo bo hasi, lo bo husg’é? En bes di hasi esei, pakiko no pensa kon pa yud’é? Dediká tempu na e hóben pa yud’é madurá asina e por tuma bon desishon den futuro. Ora nos ta tuma inisiativa pa yuda nos rumannan den e manera ei, nos lo ta mas komprensivo i amoroso.

14, 15. (a) Kon Yehova a reakshoná na momento ku Elías a pèrdè kurashi? (b) Kiko nos por siña for di e eksperensia di Elías?

¹⁴ Awor, kiko Yehova ta pensa di su sirbidónan ku ta deprimí? Laga nos wak kon el a yuda un di su sirbidónan ku tabata sinti su mes asina: Profeta Elías. Aunke e tabatin e  kurashi pa desafiá 450 profeta di Baal, Elías a hui ora el a haña sa ku Reina Yézabèl kier a laga mat’é. Despues ku el a kana 150 kilometer bai Beerseba, el a sigui bai te den desierto. Agotá di su biahe den higra di solo, e profeta a bai sinta bou di un palu i “a pidi pa e muri.”—1 Rei. 18:19; 19:1-4.

¹⁵ Kiko Yehova a hasi ora el a mira kon desesperá i deprimí su profeta fiel tabata? El a rechasá Elías pasobra el a pèrdè kurashi? Nò. Al kontrario, Yehova a tene kuenta ku Elías su limitashonnan i a manda un angel pa yud’é. Dos biaha e angel a animá Elías pa kome pa asina e por tabatin forsa pa sigui ku su biahe. (Lesa 1 Reinan 19:5-8.) Manera nos a mira, promé ku Yehova a duna Elías instrukshon, el a skucha e profeta i a tuma medidanan práktiko pa yud’é.

16, 17. Kon nos por yuda nos rumannan manera Yehova a yuda Elías?

¹⁶ Awor, kon nos por yuda nos rumannan manera Yehova a yuda Elías? Nos no mester ta muchu lihé pa duna konseho. (Pro. 18:13) Ta mihó pa nos tuma tempu pa skucha i mustra empatia na un ruman ku kisas ta pensa ku e ta “ménos onorabel” debí na su sirkunstansia personal. (1 Kor. 12:23). Di e manera ei, nos lo ta den mihó posishon pa dun’é e yudansa ku e tin mester.

¹⁷ Pensa atrobe riba e eksperensia di Cynthia. Ora ku su esposo a bandoná e i su yunan, nan a keda desampará. Kon algun di nan kompañeronan Testigu a reakshoná? Cynthia a konta: “Despues ku mi a bisa nan via telefòn kiko a pasa, denter di 45 minüt nan tabata na nos kas. Nan tabata awa na wowo. Durante e promé dos òf tres dianan siguiente, nan no a laga nos nos so. Komo ku nos no tabata kome bon i tabata emoshonalmente kibrá, pa un tempu nan a laga nos keda na nan kas.” Probablemente e eksperensia akí ta pone nos kòrda loke e karta di Santiago ta bisa: “Si un ruman hòmber òf un ruman muhé no tin paña ni sufisiente kuminda pa dia, anto un di boso bis’é: ‘Bai na pas, tene bo kurpa kayente i bon alimentá,’ pero boso no ta dun’é loke su kurpa mester, di ki probecho esei ta? Asina tambe, fe riba su so, si e no tin obra, ta morto.” (Sant. 2:15-17) E yudansa oportuno ku Cynthia i su yu muhénan a risibí di e rumannan tabata nèt loke nan tabatin mester. Despues di apénas seis luna, nan tabatin e forsa pa por a traha pionero ousiliar.—2 Kor. 12:10.

18, 19. (a) Kon nos por yuda nos rumannan ku ta débil? (b) Ken ta benefisiá ora nos ta yuda nos rumannan ku ta débil?

¹⁸ Probablemente bo sa di eksperensia ku tin biaha ta tuma tempu pa un persona rekuperá di un malesa grave. Di mes manera, un kristian ku a bira débil spiritualmente debí na problemanan personal òf situashonnan difísil kisas tin mester di tempu pa bira fuerte atrobe. Ta bèrdat ku e mester studia su Beibel, hasi orashon i asistí na e reunionnan pa e fortalesé su fe. Pero e tin mester di nos yudansa tambe. Nos lo tene pasenshi kuné, durante e tempu ku e ta hasi esfuerso pa rekuperá? Nos lo sigui mustr’é ku nos ta stim’é? Laga nos hasi tur loke ta posibel pa e sinti ku nos ta apresi’é i ku e ta nesesario den kongregashon.—2 Kor. 8:8.

¹⁹ Nunka lubidá ku ora nos ta yuda nos rumannan, nos ta sinti e goso, òf felisidat, ku dunamentu ta trese kuné. Ademas, nos ta siña mustra empatia i pasenshi. Pero no ta nos so ta benefisiá, sino henter e kongregashon ya ku lo tin mas kariño i amor den kongregashon. I mas importante ainda, ora nos ta yuda nos rumannan, nos ta imitá Yehova, kende ta balorá kada un di su sirbidónan. Sí, nos tur tin bon motibu pa sigui e konseho bíbliko ku ta animá nos pa “yuda esnan ku ta suak.”—Echo. 20:35.