FERNANDO tabata nèrvioso. * Dos ansiano a bis’é ku nan ke papia kuné den privá. Último tempu, despues di kada bishita di e superintendente di sirkuito, e ansianonan tabata splik’é kiko e tin ku hasi pa e por bini na remarke pa haña mas privilegio di sirbishi den kongregashon. Pero segun ku tempu a pasa, Fernando a kuminsá puntra su mes si un dia lo e keda nombrá komo ansiano. E kongregashon a kaba di haña bishita di e superintendente di sirkuito atrobe. Kiko e ansianonan lo bis’é e biaha akí?

Un di e ansianonan a kuminsá papia kuné i a sita 1 Timoteo 3:1. El a bisa Fernando ku e kuerpo di ansiano a haña su nombramentu komo ansiano. Sorprendí, Fernando a hala sinta stret i a puntr’é: “Kiko ruman a bisa?” E ruman a ripití loke el a bisa i nan por a mira na e sonrisa riba Fernando su kara ku e tabata hopi kontentu. Despues, ora nan a anunsiá na e kongregashon ku el a bira ansiano, tur hende tabata kontentu.

Ta malu pa un ruman deseá privilegio di sirbi den kongregashon? Klaru ku nò. Segun 1 Timoteo 3:1: “Si un hòmber ta hasi esfuerso pa bira un superintendente, e ta deseá un trabou ekselente.” E animashon ei a motivá hopi hòmber kristian pa hasi progreso spiritual pa nan por kualifiká pa haña privilegio den kongregashon. Komo resultado, Dios a bendishoná su pueblo ku mas di shen mil ansiano i sirbidó ministerial kapasitá. Pero komo ku e kongregashonnan ta sigui krese, nos tin mester di mas ruman hòmber ku ta hasi esfuerso pa haña privilegio. Kon ta e manera apropiá pa hasi esei? Akaso e rumannan ku ta deseá di bira ansiano mester ta konstantemente pendiente di e asuntu akí, manera Fernando tabata?

E ekspreshon bíbliko “hasi esfuerso,” ku nos a lesa na 1 Timoteo 3:1, ta un tradukshon di un verbo griego ku ta transmití e idea di anhelá algu òf rèk pa alkansá algu. Kisas e ta laga bo pensa riba un  persona ku ta rèk pa kue un fruta sukulento ku ta kologá na un palu. Ma e ekspreshon “hasi esfuerso” no ke men ku un ruman ta purba di haña e privilegio di “bira un superintendente” na un manera haragan. Dikon nò? Pasobra e meta di esnan ku di kurason ta deseá di sirbi komo ansiano ta pa hasi “un trabou ekselente,” no djis alkansá un posishon òf haña un título.

Hopi di e kualidatnan ku un hende mester tin pa kumpli ku e trabou ekselente akí ta ser menshoná na 1 Timoteo 3:2-7 i Tito 1:5-9. Raymond, un ruman ku tin hopi aña komo ansiano, a komentá lo siguiente tokante e normanan haltu ei: “Pa mi, loke ta mas importante ta ki tipo di hende nos ta. Un hende su manera di papia i di siña ta importante, pero nan no ta mas importante ku ser ireprochabel, moderá den bo kustumbernan, di sano huisio, ordená, hospitalario i rasonabel.”

Un ruman ku ta deseá di sirbi komo ansiano i ku tin e aktitut korekto ta evitá tur tipo di desonestidat i impuresa moral i asina ta demostrá ku e ta ireprochabel. E ta un persona moderá den su kustumbernan, di sano huisio, rasonabel i ta hiba un bida ordená; p’esei, e rumannan lo tin e konfiansa ku lo e dirigí e kongregashon bon i yuda nan ku nan problemanan. Komo ku e ta hospitalario, e ta un animashon pa hóbennan i hende nobo den e bèrdat. I komo ku e gusta hasi loke ta bon, e ta duna konsuelo i yudansa na rumannan malu i na esnan di edat avansá. E ta kultivá e kualidatnan akí pa benefisiá e rumannan, no djis pa oumentá su chèns di ser nombrá komo ansiano. *

Gustosamente e kuerpo di ansiano ta duna konseho i animashon na ruman hòmbernan ku ta deseá di sirbi komo ansiano. Ma ta e rumannan ku ke sirbi mes tin ku kumpli ku e rekisitonan bíbliko. Henry, un superintendente ku eksperensia, a bisa: “Si bo ta deseá di haña privilegio di sirbi, bo tin ku traha duru pa demostrá ku bo ta kualifiká.” Sitando Eklesiástes 9:10, el a splika: “‘Tur loke bo man haña pa hasi, hasié ku tur bo forsa.’ Hasi bo bèst ora e ansianonan duna bo un asignashon. Stima tur e tareanan  ku bo haña pa hasi den kongregashon, asta e tarea di bari salòn. E rumannan lo no keda sin tuma nota di bo trabou i di bo esfuersonan.” Si bo ta deseá di sirbi komo ansiano un dia, sea diligente i konfiabel den tur faseta di sirbishi sagrado. Loke mester karakterisá bo bida ta humildat, no ambishon ni orguyo.—Mat. 23:8-12.

Algun ruman ku ta deseá di haña privilegio den kongregashon kisas ta sinti e tentashon pa laga e ansianonan sa indirektamente di nan deseo, òf podisé nan ta purba di influensiá e kuerpo di ansiano. Otronan ta keda malkontentu ora e ansianonan duna nan konseho. Ta bon pa e rumannan akí puntra nan mes: ‘Ta kiko mi ke? Promové mi propio interes òf kuida e karnénan di Yehova humildemente?’

E rumannan ku ta hasi esfuerso pa bira superintendente mester kòrda ku ansianonan mester ta un “ehèmpel pa e tou.” (1 Ped. 5:1-3) Un ruman ku ta un ehèmpel pa e kongregashon ta evitá idea- i akshonnan engañoso. E ta kultivá pasenshi i perseveransia, sea ku e ser nombrá òf nò. Bon mirá, ora un ruman bira ansiano, esei no ta libr’é milagrosamente di su defektonan. (Num. 12:3; Sal. 106:32, 33) Ademas, un ruman hòmber por sinti ku su “konsenshi ta limpi,” pero podisé e otro rumannan tin motibu pa pensa malu di dje. (1 Kor. 4:4) Pues, si e ansianonan ta duna bo konseho sinsero, basá riba Beibel, purba di skucha nan sin rabia. I despues trata di pone nan konseho na práktika.

Vários ruman ta haña ku nan mester warda muchu promé ku nan ser nombrá. Si bo tin vários aña ta “hasi esfuerso pa bira un superintendente,” bo tin e tendensia di bira impasiente òf un poko preokupá ku e asuntu? Si ta asina, kòrda riba e proverbio inspirá akí: “Speransa posponé ta hasi e kurason sinti malu, ma deseo kumplí ta un palu di bida.”—Pro. 13:12.

Un persona por sintié hopi desanimá si un meta ku e ta anhelá ta parse inalkansabel. Esei a pasa ku Abraham. Yehova a primintié un yu hòmber, pero añanan a pasa sin ku e ku Sara a haña yu. (Gén. 12:1-3, 7) Ora e tabata basta grandi kaba, el a sklama na Yehova: “O Señor DIOS, kiko lo bo duna mi, siendo ku mi no tin yu . . . Bo no a duna mi desendensia.” Yehova a sigur’é ku lo el a kumpli ku su promesa di dun’é un yu. Pero a dura 14 aña mas promé ku Dios a kumpli ku su palabra.—Gén. 15:2-4; 16:16; 21:5.

Awor bon, Abraham a pèrdè su goso di sirbi Yehova miéntras ku e tabata warda? Nò. E no a duda niun momento den e promesa di Dios. El a sigui warda ansiosamente riba kumplimentu di e promesa. Apòstel Pablo a skirbi: “Despues ku Abraham a warda ku pasenshi, el a haña e promesa.” (Heb. 6:15) Finalmente, e manera ku Dios a bendishoná e hòmber fiel ei a surpasá tur su ekspektativanan. Kiko nos por siña for di e ehèmpel di Abraham?

Si bo tin deseo di sirbi komo ansiano pero añanan a pasa i ainda esei no a sosodé, no entregá. Sigui konfia den Yehova. No pèrdè bo goso di sirbié. Warren, kende a yuda hopi ruman hòmber  hasi progreso spiritual, a splika dikon: “Un ruman hòmber ta bini na remarke pa nombramentu despues ku e hasi progreso. Atraves di tempu su aktitut i su abilidatnan ta sali na kla na e manera ku e ta komportá su mes i ta kumpli ku su asignashonnan. Tin ruman ta kere ku ta solamente si nan haña un sierto privilegio òf nombramentu nan ta konta. Pero esei ta un idea robes, i e por bira un opseshon. Echo ta ku sin importá unda bo ta òf kiko bo ta hasi, basta bo ta sirbi Yehova fielmente, bo ta konta.”

Un ruman, ku a warda mas ku 10 aña promé ku el a bira ansiano, a konta kiko ta lès ku el a siña. El a referí na un deskripshon bon konosí den kapítulo 1 di e buki di Ezekiel i a bisa: “Ta Yehova ta kore su garoshi, esta, su organisashon; i ta é ta disidí na ki velosidat e ta kor’é. Kosnan no ta sosodé ora ku nos ke, sino ora ku Yehova ta haña ku ta e momento oportuno. Den e asuntu di ke sirbi komo ansiano, loke ta importante no ta kiko ami ke òf kiko ami lo tin gana di ta. Loke ami ke kisas no ta loke Yehova sa ku mi mester.”

Si bo ta spera un dia di hasi e trabou ekselente di un superintendente kristian, hasi esfuerso pa kontribuí na e felisidat di e kongregashon. Si ta parse ku tempu ta pasa pokopoko, lucha pa bo no pèrdè pasenshi i kuminsá preokupá òf ansha. Raymond, menshoná anteriormente, a bisa: “Un hende ambisioso nunka no ta keda satisfecho. Hende ku tur ora bai ta anshá pa logra algu ta pèrdè e goso ku ta bini di sirbi Yehova.” Pues, kultivá e aspektonan di e fruta di e spiritu di Dios mas plenamente, foral pasenshi. Hasi esfuerso pa mehorá bo spiritualidat mediante estudio personal di e Skritura. Dediká mas tempu na prediká e bon notisia i na studia Beibel ku hende interesá. Dirigí bo famia den aktividatnan spiritual i den Adorashon Komo Famia. Disfrutá di kada okashon ku bo ta huntu ku bo rumannan. Di e manera ei, lo bo disfrutá di bo sirbishi na Yehova segun ku bo ta progresá pa alkansá bo meta.

Yehova ta duna ruman hòmbernan un oportunidat maravioso di por traha riba nan kualidatnan kristian i yuda e kongregashon. Ni Yehova ni su organisashon no ke pa e rumannan ku ta hasi esfuerso pa kualifiká pa un privilegio bira frustrá òf malkontentu den su sirbishi. Dios ta apoyá i bendishoná tur ku ta sirbié ku motibunan puru. I kòrda ku Yehova “no ta agregá tristesa” na niun di su bendishonnan.—Pro. 10:22.

Asta si bo tin basta tempu ta warda pa bira ansiano, bo por sigui hasi bon progreso spiritual. Yehova lo no lubidá kon bo ta hasi bo bèst pa kultivá e kualidatnan nesesario i ta traha duru den kongregashon, sin neglishá bo famia. Sirbi Yehova semper ku alegria, sin importá ki asignashon bo haña!