UN GRUPO di hóben Testigu di Yehova ta disidí di bai wak un pelíkula. Hopi di nan kompañeronan di skol tabata papia di e pelíkula akí i a bisa ku e ta hopi bon. Pero ora nos rumannan ta yega na e teater i ta tira un bista riba e posternan ku ta promové e pelíkula, nan ta mira armanan poderoso i muhénan na un manera indesente bistí. Awor, kiko nan lo hasi? Nan lo drenta e teater i wak e pelíkula tòg?

E situashon ei ta mustra ku diariamente nos tin ku tuma desishonnan ku por sea mehorá òf daña nos relashon ku Yehova. Tin biaha bo ta pensa di hasi algu, pero ora bo reevaluá e situashon, bo ta kambia di idea. Kiko esei ta nifiká? Ku bo ta un persona indesiso òf ku bo ta hasiendo loke ta korekto?

Nos amor pa Yehova a motivá nos pa dediká nos bida na dje i batisá. Nos a primintí di keda fiel na dje i nos ke kumpli ku e promesa ei. Sinembargo, nos enemigu Satanas e Diabel ta desididu pa kibra nos integridat. (Rev. 12:17) Pero nos a tuma e desishon pa sirbi Yehova i kumpli ku su mandamentunan. Lo ta masha tristu si nos kambia di opinion den e asuntu akí pasobra esei por kosta nos nos bida!

Mas ku 26 siglo pasá, Nabukodonosor, rei di Babilonia a traha un imágen grandi di oro i a duna òrdu pa tur hende bùig i adorá e imágen akí. Ken ku a nenga di hasi esei, lo a ser tirá den fòrnu di kandela. Tabatin tres hóben adoradó di Yehova, Sadrak, Mesak i Abed-nego, ku no kier a desagradá nan Dios. P’esei, nan no a obedesé e rei, i el a laga tira nan den e fòrnu kayente. Yehova a hasi un milager i a skapa nan bida. Sí, e hóbennan ei tabata dispuesto di pèrdè nan bida i keda leal na Dios.—Dan. 3:1-27.

 Mas despues, profeta Daniel, un otro adoradó di Dios, no a stòp di hasi orashon maske e tabata sa ku, hasiendo esei, e por a ser tirá den kueba di leon. Sí, el a sigui ku su kustumber di hasi orashon tres bes pa dia na Yehova. E no a kambia e desishon ku el a tuma pa adorá e Dios berdadero. I Yehova, na su turno, a libr’é “for di e poder di e leonnan.”—Dan. 6:1-27.

Yehova su sirbidónan djawe tambe ta kumpli ku e promesa ku nan a hasi ora nan a dediká nan mes na dje. Na un skol na Afrika, un grupo di hóben Testigu di Yehova a nenga di partisipá na un seremonia pa rindi adorashon na un símbolo nashonal. I e maestronan a menasá di kita nan for di skol si nan no hasi manera e otro muchanan. Poko tempu despues, e minister di edukashon a bishitá e pueblo i a papia ku algun di e hóbennan Testigu ei. Na un manera respetuoso, i sin miedu, e hóbennan a splik’é nan punto di bista. For di e dia ei, e problema no a presentá mas. Awor, nos hóbennan Testigu por bai skol sin haña nan ku e preshon pa desobedesé Yehova.

Awor laga nos trata e kaso di Joseph, kende a pèrdè su kasá repentinamente debí na kanser. Joseph su famia a respetá su punto di bista relashoná ku entiero di su kasá. Pero e famianan di su kasá, kendenan no ta Testigu di Yehova, sí tabata ke inkluí nan ritonan ku ta desagradá Dios. Joseph a bisa: ‘Komo ku mi tabata determiná pa mantené mi punto di bista, nan a purba di influensiá mi yunan; pero nan tur a para firme. Ademas, nan tabata ke tene un belorio na mi kas segun e kustumber lokal. Pero mi a laga nan komprondé bon kla ku esei no por tuma lugá na mi kas. Nan tabata sa ku nan tradishon no ta armonia ku mi kreensianan ni ku esnan ku mi kasá defuntu tabatin. Despues di hopi diskushon, nan a organis’é otro kaminda.

Durante e temporada di tristesa akí, mi a supliká Yehova pa e yuda nos famia pa nos no kibra su leinan. El a tende mi orashonnan i a yuda nos keda firme apesar di tur preshon.’ Joseph i su yunan no a pensa niun ratu so di desobedesé Yehova.

Poko tempu despues di Pasku Hudiu di aña 32 di promé siglo, un señora di Fenisia a aserká Hesus den e área di Sidon. Bes tras bes, el a pidi Hesus pa saka demoño for di su yu muhé. Na promé instante, Hesus no a kontest’é nada. El a bisa su disipelnan: “Ta na e karnénan pèrdí di e kas di Israel so Dios a manda mi.” Ora ku e señora a sigui insistí, Hesus a bis’é: “No ta bon pa kue pan di e yunan i tir’é pa kachó chikitu.” Demostrando su gran fe, e señora a kontestá: “Bèrdat, Señor, ma en realidat e kachó chikitunan tambe ta kome wiriwiri ku ta kai for di mesa di nan doño.” Despues di esei, Hesus a kumpli ku e señora su petishon i a kura su yu muhé.—Mat. 15:21-28.

Hesus a imitá Yehova kende ta dispuesto pa hasi kambio ora ta nesesario. Por ehèmpel, ora ku e israelitanan a desobedesé Yehova i a adorá un bisé di oro, Yehova a disidí ku nan a meresé morto. Pero Moises a roga Yehova pa no mata nan, i Yehova tabata dispuesto pa kambia Su desishon.—Éks. 32:7-14.

Apòstel Pablo a sigui ehèmpel di Yehova i Hesus. Pa algun tempu, Pablo tabata di opinion ku no ta apropiá pa laga Huan Marko bai ku é i Bárnabas riba nan biahenan di misionero pasobra el a bandoná nan durante nan promé biahe. Sinembargo mas despues, Pablo a rekonosé ku Marko a madurá i ku lo e tabata di gran yudansa p’e. P’esei, Pablo a bisa Timoteo: “Trese Marko ora bo ta bini, pasobra e ta útil pa mi den sirbishi.”—2 Tim. 4:11.

Awor, kiko nos por siña for di loke nos a kaba di analisá? Aunke Yehova ta perfekto,  e ta kla pa kambia di idea pasobra e ta miserikòrdioso, e tin pasenshi i ta stima nos. Komo ku nos sí no ta perfekto i tin biaha ta mira kosnan na un manera inkorekto, nos tin muchu mas motibu ainda pa, de bes en kuando, kambia di idea òf di opinion. Por ehèmpel, tin biaha nos ta kambia nos opinion tokante un persona ora nos haña mas informashon tokante su situashon.

Tin biaha, nos tin ku kambia nos manera di pensa relashoná ku metanan teokrátiko. Kisas nos tin hopi tempu ta studia Beibel i ta asistí na e reunionnan, pero nos ta posponé nos boutismo. Òf kisas nos situashon ta permití nos sirbi komo pionero pero nos ta vasilá pa kuminsá. Ademas, tin ruman hòmber ku no ke hasi esfuerso pa nan por kualifiká pa sirbi komo sirbidó ministerial òf ansiano den kongregashon. (1 Tim. 3:1) Bo por identifiká bo mes ku un di e situashonnan akí? Si ta asina, pakiko no kambia bo manera di pensa? Yehova stima bo. P’esei, e ta animá bo pa aseptá privilegionan asina ku lo hasi bo felis sirbiendo Dios i bo próhimo.

Ella, un ruman muhé ku ta traha na un sukursal di Testigunan di Yehova na Afrika, a bisa: “Ora mi a yega Bètel pa promé biaha, mi no tabata sa si lo mi a keda pa hopi tempu. Mi tabata ke sirbi Yehova ku henter mi alma, pero mi tabata hopi pegá na mi famia. Na promé instante, mi tabata sinti nan falta masha hopi mes! Pero mi kompañera di kamber a animá mi i mi a disidí di keda. Despues di dies aña na Bètel, mi ta sinti ku mi ke sigui sirbi mi rumannan mas tantu posibel, kumpliendo ku mi asignashon na Bètel.”

Bo ta kòrda kiko a pasa ku Kain ora el a bira yalurs riba su ruman hòmber i “a rabia masha pisá”? Dios a mira ku Kain tabata bai hasi algu robes i a spièrt’é pa e kontrolá su rabia. Dios a bis’é ku piká “ta lur na porta.” Pero en bes di kambia su aktitut i su manera di pensa, Kain a ignorá Dios su konseho. Lamentablemente, Kain a mata su ruman hòmber i a bira e promé asesino!—Gén. 4:2-8.

Pensa tambe riba e ehèmpel di Rei Uzias. Na prinsipio, e tabata obedesidu i tabatin un bon relashon ku Yehova. Pero lamentablemente, el a bira orguyoso. El a bai den e tèmpel pa ofresé sensia aunke e no tabata saserdote. Ora ku e saserdotenan a spièrt’é pa no kometé e akto imprudente akí, e no a kambia di idea. Mas bien, Uzias ‘a rabia mashá’ i a ignorá nan. Esei a pone ku Yehova a dal e ku lepra.—2 Kró. 26:3-5, 16-20.

Sí, tin okashonnan ku nos mester kambia di idea. At’akí, un ehèmpel di nos tempu. Joachim a batisá na 1955, pero na 1978 el a ser ekspulsá. Despues di 20 aña, el a arepentí i a ser restorá komo Testigu di Yehova. Resientemente, un ansiano a puntr’é dikon el a warda asina tantu tempu pa e por ser restorá. El a kontestá: “Mi tabata rabiá i orguyoso. Ta duel mi ku mi a warda asina tantu. Tempu ku mi tabata ekspulsá, mi tabata sa ku Testigunan di Yehova ta siña e bèrdat.” Sí, Joachim mester a kambia su aktitut i arepentí.

Nos tambe por haña nos den un situashon den kua nos tin ku kambia di idea i tambe nos proseder. Ora nos ta dispuesto pa hasi esei, Yehova ta keda kontentu ku nos.—Sal. 34:8.