“DIA m’a tende e anunsio ku nos yu mayó a ser ekspulsá, tabata komo si fuera mi mundu a bini abou,” Julian a bisa. El a sigui konta: “Nos tabata masha será ku otro i tabata hasi hopi kos huntu. E tabata un yu hòmber masha ehemplar, pero, di un dia pa otro, el a kuminsá komportá su mes malu. Mi kasá tabata yora so, i mi no tabata sa kon pa konsol’é. Nos tabata blo puntra nos mes ta unda nos a faya komo mayor.”

Kon un hende por bisa ku ekspulshon ta un muestra di amor si e ta kousa asina tantu doló? Dikon Beibel ta bisa ku mester tuma un medida asina drástiko? Ki ora un persona ta ser ekspulsá for di e kongregashon?

Tin dos faktor determinante pa ekspulsá un Testigu di Yehova for di e kongregashon kristian. Di promé, e mester a kometé un piká grave, i di dos, e no a arepentí di su piká.

Aunke Yehova no ta eksigí perfekshon for di su sirbidónan, e ta ferwagt sí ku nan ta kumpli ku su normanan santu. Por ehèmpel, Yehova ta prohibí pikánan serio manera inmoralidat seksual, idolatria, hòrtamentu, chantahe òf ekstorshon, matamentu i spiritismo.—1 Kor. 6:9, 10; Rev. 21:8.

Bo no ta haña ku e normanan limpi di Yehova ta rasonabel i ta un protekshon pa nos? Ta ken no ta preferá di biba meimei di hende pasífiko, desente i konfiabel? Esei ta e ambiente ku ta reina den e pueblo di Dios. E trankilidat ku nos ta sinti ora nos ta meimei di nos rumannan spiritual ta pasobra dia nos a dediká nos mes na Yehova nos tur a primintí di biba na armonia ku e instrukshonnan den su Palabra.

Ma kiko si un kristian batisá kometé un piká serio pa motibu di debilidat? Den pasado tabatin sirbidónan fiel di Yehova ku a kometé piká grave, pero tòg Dios no a rechasá nan outomátikamente. Un ehèmpel bon konosí di esaki ta Rei David. El a kometé adulterio i asesinato. Pero apesar di esei, profeta Natan a bis’é: “SEÑOR . . . a pordoná bo piká.”—2 Sam. 12:13, BPK.

Dios a pordoná David su piká pasobra David tabata sinseramente arepentí. (Sal. 32:1-5) Awe ta meskos. Si un sirbidó di Yehova ku a kometé un piká serio arepentí i stòp di praktiká loke ta malu, lo e no ser ekspulsá for di e kongregashon. (Echo. 3:19; 26:20) Pero si e ansianonan ku ta forma e komité hudisial nota ku e persona no a arepentí di kurason, nan mester ekspuls’é.

Na promé instante, nos lo por sinti ku e desishon pa ekspulsá un ruman ta algu masha drástiko òf asta kruel, spesialmente si nos tin lasonan estrecho kuné. Sinembargo, Beibel ta duna nos bon motibu pa mira ekspulshon komo un muestra di amor.

Hesus a indiká ku “sabiduria ta demostrá pa medio di su obranan ku e ta hustu.” (Mat. 11:19) Pues, e desishon di ekspulsá un pekadó ku no a  arepentí ta un desishon sabí i na su lugá pasobra e ta produsí resultadonan hustu. Ban analisá tres di e resultadonan akí:

Ekspulshon di un persona ku a kometé un mal echo ta trese onor pa e nòmber di Yehova. Komo ku nos ta karga e nòmber di Yehova, nos kondukta ta influensiá e opinion ku hende tin di dje. (Isa. 43:10) Meskos ku un yu su komportashon por trese sea onor òf reproche riba su mayornan, asina tambe nos forma di aktua ta pone ku hende tin sea un opinion positivo òf negativo di Yehova. Den tempu di Ezekiel, e nashonnan bisiña di Israel tabata konektá e hudiunan ku e nòmber di Yehova. (Eze. 36:19-23) Awe tambe hende ta konektá Testigunan di Yehova ku e nòmber di Yehova. Pues si nos ta obedesé e leinan di Yehova, nos lo duna realse na su bon nòmber.

Pero si nos ta kometé inmoralidat seksual, nos lo trese reproche riba e nòmber di Yehova. Apòstel Pedro a konsehá kristiannan: “Komo yu obediente, no laga e deseonan ku boso tabatin tempu ku boso no tabata konosé Dios forma boso mas. Mas bien, di akuerdo ku Esun Santu ku a yama boso, bira santu den tur boso kondukta, pasobra ta pará skirbí: ‘Boso mester ta santu, pasobra ami ta santu.’” (1 Ped. 1:14-16) Pues, kondukta ku ta limpi i santu ta trese onor pa e nòmber di Dios.

Si un Testigu di Yehova kria e kustumber di hasi loke ta malu, muy probablemente su amigu- i konosínan ta haña sa di esaki. Den tal kaso, e ekspulshon ta sirbi pa demostrá ku Yehova tin un pueblo limpi ku ta pega na e normanan di Beibel pa mantené e santidat ei. Por ehèmpel, un biaha un hòmber a kana drenta un Salòn di Reino na Suisa i bisa ku e ke bira Testigu di Yehova. Dikon? Pasobra su ruman muhé a ser ekspulsá pa motibu ku el a kometé inmoralidat seksual. E hòmber a bisa ku e ke pertenesé na un organisashon ku “no ta tolerá mal kondukta.”

Ekspulshon ta protehá e rumannan den kongregashon. Apòstel Pablo a bisa e kristiannan di Korinto ku ta peligroso pa laga pekadó ku no a arepentí keda den e kongregashon. El a splika ku meskos ku “un tiki zürdeg ta fermentá henter e mansa,” asina e pekadó por tin un mal influensia riba e hendenan rònt di dje. P’esei el a konsehá nan: “Saka e malbado for di meimei di boso.”—1 Kor. 5:6, 11-13.

Aparentemente, “e malbado” ku Pablo a papia di dje tabata kometé inmoralidat seksual abiertamente. Komo resultado, otro miembronan di e kongregashon a kuminsá hustifiká loke e tabata hasi. (1 Kor. 5:1, 2) Si e kongregashon lo a tolerá e piká serio ei, otro kristiannan lo por a sinti nan inkliná pa sigui e kustumbernan inmoral ku tabata masha komun den e stat di Korinto. Awe ta meskos. Si e kongregashon ta permití un kristian kometé piká grave, esei por pone ku otro rumannan ta kuminsá pasa por haltu di e normanan di Dios. (Ekl. 8:11) Ademas, pekadó ku no arepentí por bira manera “baranka skondí bou di awa” ku ta senk e fe di nan rumannan den kongregashon.—Hudas 4, 12.

Ekspulshon por pone e pekadó kambia su mal aktitut. Un biaha Hesus a konta di un hóben ku a bai for di kas di su tata i a malgastá su herensia hibando un bida di paranda. E yu pèrdí a siña na un manera doloroso ku bida leu for di su famia tabata teribel. Finalmente, e yu a rekobrá su sano huisio. El a arepentí i a tuma e inisiativa pa bai bèk serka su famia. (Luk. 15:11-24) Su tata a risibié ku masha alegria. E manera ku Hesus a deskribí e tata amoroso ei ta yuda nos komprondé e sintimentunan di Yehova. Beibel ta splika ku Dios no ke pa un pekadó bai pèrdí. E ta sigurá nos: “Mi no tin plaser den e morto di e malbado, ma mas bien ku e malbado bira for di su kaminda i biba.”—Eze. 33:11.

Asina tambe, personanan ku ser ekspulsá no ta miembro mas di e kongregashon kristian—ku ta nan famia spiritual—i kisas ku tempu nan ta bin realisá kiko nan a pèrdè. Podisé nan ta mira e mal konsekuensianan di nan desishonnan i ta kòrda kon felis nan tabata tempu nan tabatin un bon relashon ku Yehova i ku su pueblo. Komo resultado, nan ta rekobrá nan sano huisio i ta bolbe na Yehova.

 Pa un pekadó por arepentí, mester trat’é ku amor pero tambe ku firmesa. E salmista David a bisa: “Si e hustu mester gòlpia mi, esei lo ta un bondat amoroso; i si e mester reprendé mi, esei lo ta zeta riba kabes.” (Sal. 141:5, NW) Pues, David a atmití ku por sosodé ku un persona hustu mester dun’é un korekshon doloroso, i lo el a keda kontentu ku esei pasobra lo tabata pa su mes bon. Pa nos por komprondé esaki mihó, pensa riba e siguiente situashon: Imaginá bo ku un persona ta komiendo i un pida karni ta pega den su garganta. Kasi e no por hala rosea mas, e no por papia i ta kuminsá pèrdè konosementu. Si un hende no yud’é lihé, e ta muri. E ora ei un amigu ta disidí di dal e riba su lomba i e pida karni ta bula sali. Kisas e gòlpi a hasi doló, pero esei a salba su bida.

Den hopi kaso, ekspulshon por ta nèt e disiplina ku e pekadó tin mester. Despues di mas o ménos 10 aña, e yu hòmber ekspulsá di Julian—menshoná na kuminsamentu—a drecha su bida i a bolbe na e kongregashon. Awe e ta un ansiano i ta atmití: “E echo ku mi a ser ekspulsá a obligá mi enfrentá e konsekuensianan di mi desishonnan. Di bèrdat mi tabatin mester di e disiplina ei.”—Heb. 12:7-11.

Aunke ekspulshon ta algu masha tristu, e por ser remediá. Nos tur por kontribuí pa e disiplina kumpli ku su propósito.

Ansianonan mester hasi esfuerso pa imitá e amor di Yehova ora nan tin ku informá un persona ku a disidí di ekspuls’é. Nan tin ku splik’é ku kariño i na un manera kla kiko ta e pasonan ku e tin ku tuma p’e ser restorá den kongregashon. Ademas, de bes en kuando, ansianonan por bishitá personanan ekspulsá—ku ta duna algun indikashon ku nan ke kambia nan bida—pa kòrda nan kiko nan tin ku hasi pa bolbe serka Yehova. *

Miembronan di famia por demostrá amor pa e kongregashon i pa e pekadó ora nan ta respetá e desishon ku e ansianonan a tuma di ekspulsá e persona. Julian a splika: “Mi no a stòp di stima mi yu, pero su komportashon a lanta un muraya entre nos dos.”

Tur ruman den kongregashon por mustra nan amor. Kon asina? Nan mester evitá tur kontakto i kòmbersashon ku e persona ekspulsá. (1 Kor. 5:11; 2 Huan 10, 11) Di e manera ei nan ta sostené e disiplina ku Yehova a duna e persona mediante e ansianonan. Pero esei no ta tur kos. Tambe e rumannan mester duna e famia di e persona ekspulsá mas kariño i apoyo, ya ku nan ta sufri mashá. Nos no mester laga nan sinti ku nan tambe ta ser ekskluí for di asosiashon ku e rumannan.—Rom. 12:13, 15.

Na konklushon, Julian a bisa: “Ekspulshon ta un medida nesesario, ya ku e ta yuda nos biba di akuerdo ku e normanan di Yehova. Aunke e ta doloroso, riba plaso largu e ta produsí bon resultado. Si mi a tolerá mi yu hòmber su mal komportashon, lo e no a rekuperá nunka.”