KASI tur hende sa ku Hesus tabatin 12 apòstel. Pero loke no ta dje konosí ei ta ku entre e disipelnan di Hesus tabatin vários hende muhé ku tabatin un amistat será kuné. Ún di nan tabata Huana.—Mat. 27:55; Luk. 8:3.

Kiko tabata Huana su papel den e sirbishi di Hesus, i kiko nos por siña for di su ehèmpel?

Huana tabata “esposa di Kuzas, kende tabata na enkargo di e kas di Heródes.” Huana tabata entre e muhénan ku Hesus a kura i ku a kompañá Hesus ku e apòstelnan segun ku nan tabata bai di stat pa stat.—Luk. 8:1-3.

Maestronan di Lei hudiu a siña e pueblo ku hende hòmber mester a papia lo ménos posibel ku hende muhé i ku hende muhé no tabatin mag di pasa tempu ku hende hòmber ku no tabata nan famia, te pa biaha ku nan. Ma Hesus no a sigui e tradishonnan ei. P’esei, el a permití Huana i otro hende muhé ku a pone fe den dje kompañá su grupo.

Huana a kore e riesgo ku hende rònt di dje lo a kritik’é pasobra e tabata anda ku Hesus i su apòstelnan. Tur hende ku a kompañá Hesus mester tabata dispuesto di hasi sakrifisio i ahuste, i esei a konta pa Huana tambe. Hesus a apresiá e aktitut ei asina tantu ku el a bisa: “Mi mama i mi rumannan ta esnan akí ku ta tende e palabra di Dios i kumpli kuné.” (Luk. 8:19-21; 18:28-30) Ta un gran animashon pa sa ku Hesus ta sinti ku e tin un banchi hopi será ku hende ku ta hasi sakrifisio pa por siguié, no ta bèrdat?

Huana i hopi otro hende muhé a “usa nan pertenensianan” pa sirbi òf atendé e nesesidatnan di Hesus i su 12 apòstelnan. (Luk. 8:3) Segun un eskritor: “Lukas no ta bisando su lektornan ku ta e hende muhénan tabata kushiná, laba tayó i drecha paña kibrá. Podisé nan a hasi e kosnan ei . . . , pero Lukas no tabata papia di esei.” Mas bien ta parse ku e muhénan a usa nan plaka, pertenensianan i propiedatnan pa atendé e nesesidatnan di Hesus i e apòstelnan.

Komo ku ni Hesus ni su apòstelnan no tabata traha durante nan giranan di predikashon, nan no tabatin moda di kumpra kuminda i otro kosnan pa nan grupo, ku kisas a konsistí di un 20 hende. Aunke hende aparentemente tabata risibí nan hospitalariamente, e echo ku nan a kana ku un “kaha di plaka” a indiká ku nan no tabata dependé tur ora bai di hospitalidat. (Huan 12:6; 13:28, 29) Kisas Huana i e otro muhénan a duna kontribushon pa kubri e gastunan.

 Tin hende ta duda ku muhénan hudiu lo por tabatin nan mes plaka i propiedat. Pero, manuskritonan hudiu di e tempu ei ta indiká ku tabatin vários manera ku un muhé hudiu por a yega na e rekursonan ei. Por ehèmpel: (1) un herensia di su tata ku a muri sin laga yu hòmber, (2) propiedat ku un hende a dun’é, (3) plaka (stipulá den un kontrakt di matrimonio) ku e tin derechi riba dje den kaso di divorsio, (4) plaka òf propiedat ku su defuntu esposo a laga p’e òf (5) entrada ku e mes a traha p’e.

Sin duda, e siguidónan di Hesus a kontribuí ku loke nan tabata por. Entre esnan ku a kompañ’é por tabatin hende muhé riku. Komo ku Huana tabata kasá ku e hòmber enkargá ku e kas di Heródes, tin hende ta pensa ku e tabata bon pará. Kisas ta un hende asina a duna Hesus e paña djabou karu sin nat ku e tabata bisti. (Huan 19:23, 24) Un komentarista riba e tema a komentá ku “kasá di un piskadó lo no por a paga” un paña asina.

Beibel no ta bisa spesífikamente ku Huana a kontribuí ku plaka. Pero nos por tin sigur ku el a hasi loke e tabata por, i esaki ta siña nos un lès importante. Kada un di nos sa kiko nos por i kiko nos no por kontribuí kuné pa promové interesnan di Reino. Ma loke ta importante pa Dios ta ku nos ta hasi loke nos por i ku nos ta hasié ku alegria.—Mat. 6:33; Mar. 14:8; 2 Kor. 9:7.

Aparentemente, Huana a presensiá e ehekushon i morto di Hesus huntu ku otro hende muhé ku ‘a kompañá Hesus i ku a sirbié tempu ku e tabata na Galilea, i tambe hopi otro muhé mas ku a subi bini Herúsalèm huntu ku Hesus.’ (Mar. 15:41) Ora nan a baha e kurpa di Hesus for di staka pa der’é “e muhénan ku a bini huntu kuné for di Galilea tambe a bai, i nan a wak e graf i a mira e manera ku nan a pone su kurpa. Despues nan a bai bèk pa prepará yerba di holó dushi i zeta perfumá.” Segun Lukas, e muhénan akí tabata “Maria Magdalena, Huana i Maria, mama di Santiago.” Nan a bai bèk na e graf e dia despues di sabat i ei nan a topa algun angel ku a bisa nan ku Hesus a resusitá.—Luk. 23:55–24:10.

Podisé Huana tabata entre e disipelnan ku a reuní na Herúsalèm na Pentekòste di aña 33 i ku a inkluí tambe e mama i rumannan di Hesus. (Echo. 1:12-14) Ademas, komo ku Huana su kasá a traha pa Heródes Antipas, Huana tal bes tabata esun ku a duna Lukas detayenan spesífiko tokante Heródes, foral en bista ku Lukas ta e úniko eskritor di Evangelio ku ta menshoná Huana pa nòmber.—Luk. 8:3; 9:7-9; 23:8-12; 24:10.

E relato di e señora akí ta siña nos algun lès balioso. El a sirbi Hesus lo mihó ku e tabata por. Lo e mester a sintié masha felis si e fondonan ku el a kontribuí a yuda ku Hesus, e 12 apòstelnan i e otro disipelnan por a realisá nan giranan di predikashon. Huana a keda leal na Hesus apesar di tur e difikultatnan ku Hesus i su kompañeronan a pasa aden. E ta un bon ehèmpel pa muhénan kristian djawe imitá, ya ku el a sirbi Yehova ku henter su alma.