Nos Lektornan Ta Puntra

Testigunan di Yehova Ta Kere Ku Ta Nan So Ta Salba?

Testigunan di Yehova ta kere ku nan a haña e religion berdadero. Si no tabata asina, nan lo a kambia nan religion. Meskos ku kreyentenan di hopi otro religion, Testigunan di Yehova ta spera di haña salbashon. Pero, nan ta kere tambe ku no ta nan tarea pa husga ken lo haña salbashon. Al fin i al kabo, ta Dios ta e Hues. E ta esun ku ta disidí.​—Isaias 33:22.

E Palabra di Dios ta mustra ku hende ku ke haña salbashon no solamente mester deseá di haña salbashon sino tambe nan tin ku koperá ku e Salbadó. Un ehèmpel: Suponé ku un piskadó su boto a kuminsá senk. E ta desesperá pa skapa. Lo e muri, òf lo e sobrebibí? E resultado final ta dependé di e manera ku e ta reakshoná ora e haña yudansa. Orguyo por strob’é di aseptá yudansa di un reskatadó òf salbadó. Òf lo e por disidí humildemente di aseptá yudansa i skapa.

Di un manera similar, esnan ku koperá ku e Reskatadó di humanidat, Yehova Dios, ta haña salbashon. Salbashon ta un regalo di Dios, pero no ta tur hende lo hañ’é. Hesus, e Yu di Dios, a bisa: “No ta tur hende ku ta bisa mi: ‘Señor, Señor,’ lo drenta e reino di shelu, sino esun ku ta hasi e boluntat di mi Tata ku ta den shelu.”​—Mateo 7:21.

Testigunan di Yehova ta kere ku Dios ta salba solamente hende ku tin fe den e sakrifisio di reskate di Hesus i ku ta sigui Hesus su siñansanan al pie de la letra. (Echonan 4:​10-12) Konsiderá tres rekisito bíbliko importante pa haña salbashon.

(1) “Na esaki tur hende lo sa ku boso ta mi disipel, si boso tin amor un pa otro,” Hesus a bisa su kompañeronan. (Juan 13:35) Ora el a duna su bida na fabor di otro hende, el a mustra kon importante amor ta. Esnan ku ta stima otro hende ta desplegá un kualidat masha importante pa salbashon.

(2) “Mi a hasi bo nòmber konosí na nan,” Hesus a bisa den orashon na su Tata. (Juan 17:26) E tabata sa kon importante Dios su nòmber, Yehova, tabata pa su Tata. Hesus a pidi den orashon pa e nòmber di su Tata “sea santifiká.” (Mateo 6:9) Santifiká e nòmber di Dios ta enserá konosé e nòmber ei i trat’é komo importante i santu. Meskos ku Hesus, hende ku ke haña salbashon tin ku usa Dios su nòmber. Ademas, nan tin ku siña otro hende tokante Dios su nòmber i su kualidatnan. (Mateo 28:​19, 20) En realidat, ta únikamente hende ku ta invoká e nòmber di Dios lo haña salbashon.​—Romanonan 10:13.

(3) “Mi reino no ta di e mundu akí,” Hesus a bisa Ponsio Pilato. (Juan 18:36) Masha poko hende awe ta demostrá fe den e gobièrnu òf Reino di Dios, di kua Hesus ta Rei. En bes di esei, nan ta pone nan konfiansa den organisashonnan humano. Di otro banda, esnan ku lo haña salbashon ta esnan ku ta sostené e Reino di Dios lealmente i ta siña otro hende kon lo e liberá henter humanidat fiel.​—Mateo 4:17.

Despues ku Hesus su disipelnan a haña sa algun rekisito pa salbashon, nan a bisa: “Ta ken por wòrdu salbá anto?” Hesus a kontestá: “E kosnan imposibel pa hende ta posibel pa Dios.” (Lukas 18:​18-30) Testigunan di Yehova diligentemente ta purba kumpli ku e rekisitonan pa salbashon. Tambe, nan ta traha duru pa yuda otro hende haña salbashon.