Nan “Ta Sigui e Lamchi”

“Esakinan ta esnan ku ta sigui e Lamchi unda ku e bai.”​—REV. 14:4.

1. Kiko Hesus su berdadero disipelnan a pensa tokante siguié?

HESUS tabatin mas òf ménos dos aña i mei den su ministerio, i e ‘tabata siña e hendenan na Kapernaum den snoa.’ Debí ku nan a haña su diskurso ofensivo, “hopi di su disipelnan a retirá i no tabata kana kuné mas.” Ora Hesus a puntra su 12 apòstelnan si nan tambe kier a bai, Simon Pedro a kontest’é: “Señor, serka ken nos lo bai? Abo tin e palabranan di bida eterno. I nos a kere i a haña sa ku abo ta Esun Santu di Dios.” (Juan 6:​48, 59, 60, 66-69) E berdadero disipelnan di Hesus no a stòp di siguié. Despues ku nan a ser ungí ku spiritu santu, nan a sigui obedesé Hesus su instrukshonnan.​—Echo. 16:​7-10.

2. (a) Ken ta “e esklabo fiel i prudente” òf ‘e mayordomo fiel’? (b) Den ki manera e esklabo a establesé un ekselente registro di “sigui e Lamchi”?

² Kiko nos por bisa di e kristiannan ungí den nos tempu? Den Hesus su profesia tokante “e señal di [su] presensia i dje konklushon dje sistema di kosnan,” el a referí na e grupo di su siguidónan ungí ku spiritu santu, ku ta biba riba tera, komo “e esklabo fiel i prudente” òf ‘e mayordomo fiel.’ (Mat. 24:​3, NW, 45; Luk. 12:42) Komo grupo, e esklabo a establesé un ekselente registro komo personanan “ku ta sigui e Lamchi unda ku e bai.” (Lesa Revelashon 14:​4 i 5.) Su miembronan ta keda spiritualmente bírgen pasobra nan no ta mancha nan mes ku e kreensia- i práktikanan di ‘Babilonia  e Grandi,’ e imperio mundial di religion falsu. (Rev. 17:5) Ningun doktrina falsu no ta wòrdu “hañá den nan boka” i nan ta “sin kulpa” òf mancha di e mundu di Satanas. (Juan 15:19) Den futuro, e restu di e ungínan ku ta riba tera ‘lo sigui’ e Lamchi te den shelu.​—Juan 13:36.

3. Dikon ta importante pa nos konfia e esklabo?

³ Hesus a enkargá e esklabo fiel i prudente “ku su kas,” esta, ku e miembronan individual di e esklabo, “pa duna nan nan kuminda na su debido tempu.” Ademas di esei, el a laga e esklabo na enkargo di “tur su propiedatnan.” (Mat. 24:​45-47) E “propiedatnan” akí ta inkluí e “multitut grandi” di e “otro karnénan” ku ta sigui oumentá. (Rev. 7:9; Juan 10:16) E miembronan individual di e klase ungí i e “otro karnénan” mester konfia e esklabo ku Hesus a nombra riba nan? Tin hopi motibu pakiko e esklabo meresé nos konfiansa. Dos motibu sobresaliente ta: (1) Yehova ta konfia e esklabo. (2) Hesus tambe ta konfia e esklabo. Laga nos analisá evidensianan ku ta mustra ku tantu Yehova Dios komo Hesukristu tin pleno konfiansa den e esklabo fiel i prudente.

Yehova Ta Konfia e Esklabo

4. Dikon nos por tin konfiansa den e kuminda spiritual ku e esklabo fiel i prudente ta perkurá?

⁴ Pensa riba loke ta hasi posibel ku e esklabo fiel i prudente por perkurá kuminda spiritual nutritivo pa nos na e tempu oportuno. Yehova a bisa: “Lo mi instruí bo i siña bo e kaminda ku bo tin ku kana.” I el a agregá: “Lo mi konsehá bo; mi wowo ta riba bo.” (Sal. 32:8) Sí, Yehova ta guia e esklabo. P’esei, nos por tin pleno konfiansa den e perspikasia, komprondementu i guia basá riba e Skritura ku nos ta risibí for di e esklabo.

5. Kiko ta mustra ku Dios su spiritu santu ta kapasitá e esklabo?

⁵ Ademas, Yehova ta bendishoná e esklabo ku su spiritu santu. Ounke Yehova su spiritu santu ta invisibel, loke e ta produsí den hende sí ta visibel. Pensa riba loke e esklabo fiel i prudente a logra den e trabou di duna testimonio tokante Yehova Dios, su Yu i e Reino. Yehova su adoradónan ta proklamá e mensahe di Reino ku entusiasmo den mas ku 230 pais i grupo di isla. Esei no ta evidensia indiskutibel ku Dios su spiritu santu ta kapasitá e esklabo? (Lesa Echonan 1:8.) Pa e esklabo por perkurá kuminda spiritual na e tempu oportuno pa e pueblo di Yehova rònt mundu, e tin ku tuma desishonnan di vital importansia. Ora e esklabo ta tuma e desishonnan akí i ta implementá nan, e ta desplegá amor, suavedat, òf mansedumbre, i otro aspektonan di e fruta di spiritu.​—Gal. 5:​22, 23.

6, 7. Kuantu konfiansa Yehova tin den e esklabo fiel?

⁶ Pa bo por komprondé kuantu Yehova ta konfia e esklabo fiel, meditá riba loke el a primintí e  miembronan di e esklabo. Apòstel Pablo a skirbi: “E tròmpèt lo zona, i e mortonan lo wòrdu lantá den inkorupshon, i nos lo wòrdu transformá. Pasobra e loke ta koruptibel akí mester wòrdu bistí ku loke ta inkoruptibel, i e loke ta mortal akí mester wòrdu bistí ku loke ta inmortal.” (1 Kor. 15:​52, 53) Kristu su siguidónan ungí, kendenan fielmente ta sirbi Dios i muri den un kurpa koruptibel, ta ser resusitá komo kriaturanan spiritual i ta haña algu mas balioso ku bida eterno. Nan ta haña inmortalidat; nan bida lo no tin fin i nan ta indestruktibel. Ademas, nan ta bira inkoruptibel, ya ku nan ta haña un kurpa ku no ta putri i ku ta sostené su mes, esta, un kurpa ku no ta dependé di fuentenan di energia eksterno manera ta e kaso di otro kriaturanan ku tin kurpa karnal òf spiritual. Revelashon 4:4 ta deskribí e personanan resusitá akí sintá riba trono i ku korona di oro riba nan kabes. Pues, gloria i puesto di rei ta spera kristiannan ungí. Pero tin mas evidensia ku Yehova ta konfia e esklabo.

⁷ Revelashon 19:​7 i 8 ta bisa: “E matrimonio di e Lamchi a yega i su brùit a prepará su mes. I a wòrdu permití na dje pa bisti su mes na lino fini, briante i limpi; pasobra e lino fini ta e echonan hustu di e santunan.” Yehova a skohe e kristiannan ungí komo e futuro brùit pa su Yu. Inkorupshon, inmortalidat, puesto di rei i ‘matrimonio ku e Lamchi’—regalonan maravioso, no ta bèrdat? Nan ta pruebanan konmovedor ku Dios tin konfiansa den e ungínan, kendenan “ta sigui e Lamchi unda ku e bai.”

Hesus Ta Konfia e Esklabo

8. Kon Hesus ta mustra ku e tin konfiansa den su siguidónan ungí ku spiritu santu?

⁸ Ki evidensia tin ku Hesus tin pleno konfiansa den su siguidónan ungí ku spiritu santu? Riba e último anochi di Hesus su bida riba tera, el a hasi un promesa na su 11 fiel apòstelnan. El a bisa nan: “Boso ta esnan ku a keda na mi lado den mi pruebanan; i meskos ku mi Tata a laga un reino pa mi, mi ta laga pa boso, [“mi ta sera un pakto ku boso, meskos ku mi Tata a sera un pakto ku mi, pa un reino,” NW] pa boso kome i bebe na mi mesa den mi reino, i boso lo sinta riba trononan pa husga e diesdos tribunan di Israel.” (Luk. 22:​28-30) E pakto ku Hesus a sera e tempu ei ku su 11 apòstelnan lo ekstendé na tur e 144.000 kristiannan ungí. (Luk. 12:32; Rev. 5:​9, 10; 14:1) Si Hesus no tabata konfia nan, lo el a sera un pakto ku nan pa nan goberná kuné den su Reino?

9. Kiko “tur [Kristu] su propiedatnan” ta enserá?

⁹ Es mas, Hesukristu a laga e esklabo fiel i prudente “na enkargo di tur su propiedatnan,” esta, tur asuntu riba tera ku tin di haber ku e Reino. (Mat. 24:47) E propiedatnan akí ta konsistí di, entre otro, tur e edifisio- i fasilidatnan n’e sede  mundial di Testigunan di Yehova, e sukursalnan den vários pais, e Salònnan di Asamblea i e Salònnan di Reino na tur parti di mundu. E trabou di prediká e Reino i di hasi disipel tambe ta inkluí den e propiedatnan. Un persona lo enkargá un otro persona ku e no ta konfia ku su kosnan balioso i permitié usa nan?

10. Kiko ta mustra ku Hesukristu ta ku su siguidónan ungí?

¹⁰ Djis promé ku Hesus a subi na shelu, komo un persona resusitá el a aparesé na su fiel disipelnan i a hasi un promesa na nan. El a primintí nan: “Mira! mi ta ku boso tur e dianan te n’e konklushon dje sistema di kosnan.” (Mat. 28:20, NW) Hesus a kumpli ku e promesa akí? Wèl, durante e último 15 añanan, e kongregashonnan di Testigunan di Yehova rònt mundu a oumentá di 70.000 pa mas ku 100.000. Esei ta un oumento di mas ku 40 porshento. I kiko di e kantidat di disipelnan nobo? Durante e último 15 añanan, kasi 4,5 mion disipel a batisá, i esei ta un promedio di mas ku 800 persona pa dia. E oumentonan espektakular akí ta evidensia kla ku Kristu ta bendishoná e reunionnan di kongregashon ku su siguidónan ungí ta prepará i ku e ta apoyá nan den nan trabou di hasi disipel.

E Esklabo Ta Fiel i Prudente

11, 12. Den ki manera e esklabo a demostrá ku e ta fiel i prudente?

¹¹ Siendo ku Yehova Dios i Hesukristu ta konfia e esklabo fiel i prudente plenamente, nos no mester hasi meskos? Al fin al kabo, e esklabo a demostrá di ta fiel den e manera ku e ta kumpli ku e trabou ku Hesus a asign’é. Por ehèmpel, e tin rònt di 130 aña ta publiká e revista E Toren di Vigilansia. I ketu bai, e reunion-, asamblea- i kongresonan di Testigunan di Yehova ta sigui edifiká nos fe.

¹² Ademas, e esklabo fiel ta prudente den e sentido ku e no ta aktua na un manera inmodesto; e no ta aktua promé ku Yehova duna instrukshon kla riba un asuntu ni e no ta keda sin obedesé Yehova su instrukshon. Por ehèmpel, miéntras ku lidernan religioso falsu silensiosamente ta tolerá òf abiertamente ta aseptá e kondukta egoista i malbado di hendenan di mundu komo algu normal, e esklabo ta duna spièrtamentu kontra e trampanan di Satanas su sistema malbado. E esklabo ta apto pa duna spièrtamentunan sabí i oportuno pasobra e tin e bendishon di Yehova Dios i di Hesukristu. Pues, e esklabo meresé nos pleno konfiansa. Pero kon nos por demostrá ku nos ta konfia e esklabo fiel i prudente?

“Bai ku” e Ungínan Segun ku Nan Ta Sigui e Lamchi

13. Segun e profesia di Zakarias, kon nos por mustra konfiansa den e esklabo fiel i prudente?

¹³ E buki bíbliko Zakarias ta konta di “dies hòmber” ku ta aserká “un hudiu” i ta bis’é: “Laga nos bai ku boso.” (Lesa Zakarias 8:23.) Siendo ku e dies hòmbernan ta usa e palabra “boso” pa referí na “un hudiu,” e hudiu ei ta representá un grupo di hende. Den nos tempu, e ta representá e restu di kristiannan ungí ku spiritu santu—un parti di “e Israel di Dios.” (Gal. 6:16) E ‘dies hòmbernan for di tur e nashonnan’ ta representá e multitut grandi di e otro karnénan. Meskos ku e kristiannan ungí ta sigui Hesus sin importá unda e bai, e multitut grandi ta kompañá òf ta “bai ku” e esklabo fiel i prudente. E miembronan di e multitut grandi nunka mester tin bèrgwensa di identifiká nan mes komo e kompañeronan di e ‘partisipantenan di e yamada selestial.’ (Heb. 3:1) Hesus no tin  bèrgwensa di yama kristiannan ungí “ruman.”​—Heb. 2:11.

14. Kon nos por duna apoyo leal na Kristu su rumannan?

¹⁴ Hesukristu a bisa ku ora nos ta duna apoyo leal na su rumannan ta komo si fuera ta é nos ta apoyá. (Lesa Mateo 25:40.) Den ki manera esnan ku tin speransa di biba riba tera ta apoyá Kristu su rumannan ungí ku spiritu santu? E manera prinsipal ku nan ta hasi esei ta di yuda e ungínan ku e trabou di prediká e Reino. (Mat. 24:14; Juan 14:12) Miéntras ku e kantidat di kristiannan ungí riba tera a mengua atraves di dékadanan, e kantidat di e otro karnénan a oumentá. Ora esnan ku tin speransa pa biba riba tera ta partisipá den e trabou di duna testimonio, si ta posibel sirbiendo komo predikadónan di tempu kompletu, nan ta yuda e kristiannan ungí ku spiritu santu kumpli ku e asignashon di hasi disipel. (Mat. 28:​19, 20) Ademas, nos no mester lubidá ku tin oportunidat tambe pa apoyá e trabou akí dor di kontribuí finansieramente den vários manera.

15. Kon kristiannan individual mester reakshoná riba e kuminda spiritual oportuno ku ta bini di e esklabo i su desishonnan relashoná ku e organisashon?

¹⁵ Komo kristiannan individual, kiko nos ta pensa di e kuminda spiritual oportuno ku e esklabo fiel ta duna nos mediante publikashonnan basá riba Beibel i e reunionnan kristian? Nos ta mustra apresio dor di hasi bon uso di dje i ta kla pa apliká loke nos ta siña? Kon nos ta reakshoná ora e esklabo tuma sierto desishonnan relashoná ku e organisashon? Ora nos di buena gana ta obedesé instrukshon ku nos ta risibí, nos ta mustra ku nos tin fe den e manera ku Yehova ta perkurá guia.​—Sant. 3:17, NW.

16. Dikon tur kristian mester skucha Kristu su rumannan?

¹⁶ Hesus a bisa: “Mi karnénan ta tende mi bos, i mi konosé nan, i nan ta sigui mi.” (Juan 10:27) Esei ta e kaso ku e kristiannan ungí. Awor, kiko di esnan ku ta “bai ku” nan? E personanan ei tin ku skucha Hesus. Pero nan tin ku skucha su rumannan tambe. Al fin al kabo, ta nan a ser konfiá ku e responsabilidat di perkurá pa e bienestar spiritual di Dios su pueblo. Kiko skucha e bos di Kristu su rumannan ta enserá?

17. Kiko skucha e esklabo ta enserá?

¹⁷ Awe, e Kuerpo Gobernante, kende ta hiba delantera i ta kordiná e trabou di prediká e Reino rònt mundu, ta representá e esklabo fiel i prudente. E miembronan di e Kuerpo Gobernante ta ansianonan eksperensiá i ungí ku spiritu santu. Ta nan spesialmente por ser deskribí komo ‘esnan ku ta guia’ nos. (Heb. 13:7) E superintendentenan ungí akí tin hopi di hasi “den e trabou di Señor,” ya ku nan tin ku perkurá pa mas ku 7.000.000 proklamadó di Reino den mas ku 100.000 kongregashon rònt mundu. (1 Kor. 15:58) Skucha e esklabo ta nifiká ku nos ta duna nos pleno koperashon na su Kuerpo Gobernante.

Esnan Ku Ta Skucha e Esklabo Ta Bendishoná

18, 19. (a) Kon esnan ku ta skucha e esklabo fiel i prudente ta ser bendishoná? (b) Kiko mester ta nos determinashon?

¹⁸ For di tempu ku e esklabo fiel i prudente a ser nombrá, e “ta guia hopi hende na hustisia.” (Dan. 12:3) Entre e hendenan akí tin esnan ku tin e speransa di sobrebibí e destrukshon di e mal sistema di kosnan akí. E posishon hustu akí den bista di Dios ta realmente un bendishon!

¹⁹ Kiko esnan ku a skucha e bos di e esklabo lo eksperensiá den futuro ora “e stat santu, Yerusalèm Nobo [konsistiendo di 144.000 persona], ta baha for di shelu, for di Dios, prepará manera un brùit dòrná pa su esposo”? Beibel ta bisa: “Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” (Rev. 21:​2-4) Pues anto, nos tin tur motibu pa skucha Kristu i su rumannan ungí ku spiritu santu i ku ta digno di konfiansa. P’esei, laga nos skucha nan.

Kiko Bo A Siña?

• Ki evidensia tin ku Yehova ta konfia e esklabo fiel i prudente?

• Kiko ta mustra ku Hesukristu tin pleno konfiansa den e esklabo?

• Dikon e mayordomo fiel meresé nos konfiansa?

• Kon nos ta demostrá ku nos ta konfia e esklabo?

[Preguntanan di Estudio]

[Plachi na página 28]

Bo sa ta ken Yehova a skohe komo e futuro brùit pa su Yu?

[Plachinan na página 29]

Hesukristu a konfia e esklabo fiel i prudente ku su “propiedatnan”

[Plachi na página 30]

Ora nos ta partisipá den e trabou di duna testimonio, nos ta apoyá e kristiannan ungí ku spiritu santu