2 Haña Konosementu Eksakto di Dios

“Esaki ta bida eterno, ku nan por konosé bo, e úniko Dios berdadero.”​—Juan 17:3.

KIKO TA E OPSTÁKULO? Tin hende ta bisa ku Dios no ta eksistí. Otronan ta pensa ku Dios no ta un persona, ma djis un forsa inmenso. Esnan ku ta kere ku e ta un persona real ta siña doktrinanan kontradiktorio tokante su identidat i e kualidatnan ku e ta desplegá.

KON BO POR VENSE E OPSTÁKULO? Un manera pa haña konosementu di Dios ta di opservá e kosnan ku el a krea. Apòstel Pablo a bisa: “Desde kreashon di mundu [Dios] su atributonan invisibel, su poder eterno i naturalesa divino, a wòrdu mirá klaramente, siendo komprendí dor di loke a wòrdu trahá.” (Romanonan 1:20) Ora bo opservá e kreashon kuidadosamente, bo por siña hopi kos tokante e sabiduria i poder di nos Kreador.​—Salmo 104:24; Isaias 40:26.

 Sinembargo, pa haña konosementu eksakto di Dios su personalidat kada persona tin ku habri Dios su Palabra, Beibel, i analis’é pa su mes. No laga otro hende disidí pa bo loke bo tin ku kere. En bes di esei, sigui e konseho di Beibel ku ta bisa: “No sea konforme e mundu akí, ma sea transformá pa medio di e renobamentu di boso mente, pa boso por komprobá kiko ta e bon i agradabel i perfekto boluntat di Dios.” (Romanonan 12:2) Por ehèmpel, konsiderá e siguiente detayenan ku Beibel ta revelá tokante Dios.

Dios tin un nòmber personal. Originalmente, e nòmber personal di Dios a aparesé míles di biaha den henter e Beibel. Hopi tradukshon di Beibel ta menshon’é na Salmo 83:18, ku ta bisa: “Laga nan sabi qu bo, quen su nomber ta Jehová, ta e Altísimo ariba tur tera.”​—Salmonan y Proverbionan, Editorial Evangelica.

Yehova Dios tin sintimentu i loke hende ta hasi tin efekto riba dje. Despues ku Yehova a libra e pueblo di Israel for di sklabitut na Egipto, tabatin biaha ku nan a ignorá su konseho sabí. Nan aktitut rebelde a hasi Dios “tristu.” Nan akshonnan a kousa doló na Esun Santu di Israel.​—Salmo 78:40.

Yehova ta interesá den kada un di nos. Hesus a bisa su disipelnan: “Dos mòfi no ta wòrdu bendí pa ún sèn? I ni un di nan lo no kai na suela si no ta e boluntat di boso Tata. I asta e drachinan di kabei riba boso kabes, tur ta kontá. P’esei, no tene miedu; boso bal mas ku un kantidat di mòfi.”​—Mateo 10:​29-31.

Dios no ta faboresé ningun rasa òf kultura riba un otro. Apòstel Pablo a bisa hende griego na Atenas ku ‘for di ún sanger [“un solo hende,” NW] Dios a traha tur nashon di hende pa biba riba henter mundu.’ Tambe el a bisa nan ku Dios “no ta leu di kada un di nos.” (Echonan 17:​26, 27) Apòstel Pedro a bisa: “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.”​—Echonan 10:​34, 35.

KIKO TA E REKOMPENSA? Algun hende tin “un zelo pa Dios, ma no segun konosementu.” (Romanonan 10:2) Si bo sa loke Beibel ta siña realmente tokante Dios, lo bo no laga otro hende gaña bo, i lo bo por “hala serka Dios.”​—Santiago 4:8.

Pa mas informashon, wak e buki Kiko Beibel Ta Siña Realmente? kapítulo 1 ku tin e tema “Kiko Ta e Bèrdat Tokante Dios?” *

[Nota]

[Plachi na página 6]

Un manera pa haña konosementu di Dios ta di opservá e kosnan ku el a krea