Kiko Ta Fe?

KON abo lo definí fe? Algun hende lo bisa ku fe ta un kerementu den tur loke un otro hende ta siña bo sin puntra nada. E outor i periodista merikano renombrá, H. L. Mencken, a yega di bisa ku fe ta “un kreensia ilógiko den susesonan improbabel.”

Beibel su deskripshon di fe ta nèt kontrali. E no ta un kerementu den algu sin puntra nada ni un kreensia ilógiko. E Palabra di Dios ta bisa: “Fe ta e siguransa di kosnan ku hende ta spera, e konvikshon di kosnan ku hende no ta mira.”​—Hebreonan 11:1.

Siendo ku hende tin diferente opinion relashoná ku fe, laga nos konsiderá e kontesta riba e siguiente preguntanan:

• Kiko ta e diferensia entre e definishon ku Beibel ta duna di fe i loke hopi hende ta referí na dje ora nan ta papia di fe?

• Dikon ta di vital importansia pa nos kultivá e klase di fe ku Beibel ta deskribí?

• Kon bo por haña un fe mas fuerte?

Un Akta di Propiedat i Evidensia Sólido

Tempu ku a skirbi e buki bíbliko di Hebreonan, frekuentemente hende tabata usa e ekspreshon griego tradusí komo “siguransa.” Hopi biaha, e tabata aparesé den dokumentonan di negoshi i a transmití e idea di un garantia di algu ku un hende lo a haña den futuro. P’esei, un buki di konsulta a sugerí e tradukshon akí pa Hebreonan 11:1: “Fe ta e akta di propiedat di kosnan ku hende ta spera.”

Si bo a yega di kumpra un produkto serka un kompania renombrá i despues a warda pa nan entreg’é, bo a demostrá e klase di fe ei. E resibu ku bo tabatin den bo poder a duná bo motibu sólido pa konfia e kompania unda bo a kumpra e produkto. Den un sentido, e resibu ei tabata bo akta di propiedat, bo garantia ku lo bo a haña loke bo a kumpra. Si bo a pèrdè e resibu òf a bent’é afó, lo bo a pèrdè e prueba ku bo ta doño di e produkto. Asina tambe, esnan ku tin fe ku Dios lo kumpli ku su promesanan tin e garantia ku nan lo haña loke nan ta spera. Di otro banda, esnan ku no tin fe, òf ku pèrdè fe, no tin e derecho di haña e kosnan ku Dios a primintí.​—Santiago 1:​5-8.

E di dos ekspreshon na Hebreonan 11:1, tradusí komo “konvikshon” (òf, demostrashon kla), ta transmití e idea di presentá evidensia di algu ku ta kontrario na loke ta parse di ta e realidat. Por ehèmpel, ta parse ku solo ta drei rònt di tera, esta, ku e ta sali na ost, krusa shelu i baha na wèst. Sinembargo, astronomia i matemátika ta duna evidensia ku tera no ta e sentro di e sistema solar. Unabes bo ta komprondé esei i ta asept’é komo bèrdat, bo tin fe ku ta tera ta drei rònt di solo apesar di loke bo wowo ta mira. Pues, ora bo tin fe, no ta nifiká ku bo ta kere siegamente den algu sin ku bo ta komprond’é. Mas bien, e ta duná bo e abilidat di mira e kosnan manera nan ta realmente.

Dikon Un Fe Fuerte Ta Importante?

Esaki ta e klase di fe ku Beibel ta animá—un fe fuerte basá riba evidensia sólido, ounke esei ta rekerí pa nos ahustá loke nos ta kere. E klase di fe ei ta di vital importansia. Apòstel Pablo a skirbí: “Sin fe ta imposibel pa agrad’é, pasobra esun ku bin serka Dios mester kere ku e ta, i ku e ta esun ku ta rekompensá esnan ku ta busk’é.”​—Hebreonan 11:6.

Tin hopi opstákulo ku por stroba nos di kultivá un fe fuerte. Pero, si bo dal e kuater pasonan ku e siguiente páginanan ta deskribí, lo bo tin éksito.