Bida Eterno Riba Tera—Un Speransa Ku Dios A Duna

“E kreashon a wòrdu sometí na banidat . . . den speransa.”—ROM. 8:20.

1, 2. (a) Dikon e speransa di bida eterno riba tera ta importante pa nos? (b) Dikon hopi hende ta duda ku bida eterno riba tera ta posibel?

KISAS bo ta kòrda e goso ku bo a sinti ora bo a haña sa ku den futuro serkano hende lo no bira bieu ni muri mas, pero ku nan lo biba pa semper riba tera. (Juan 17:3; Rev. 21:3, 4) Probablemente, bo tabata ansioso pa kompartí e speransa bíbliko akí ku otro hende. Al fin i al kabo, e speransa di bida eterno ta un aspekto importante di e bon nobo ku nos ta prediká. E tin influensia riba e manera ku nos ta mira bida, e manera ku nos ta usa nos bida i e manera ku nos ta trata ku nos problemanan.

² Mayoria di religion di kristiandat ta ignorá e speransa di bida eterno riba tera. Miéntras ku Beibel ta siña ku alma ta muri, mayoria di iglesia ta siña hende e doktrina no-bíbliko ku hende tin un alma inmortal ku ta keda na bida despues di morto i ta sigui biba den e region di spiritu. (Eze. 18:4) Konsekuentemente, hopi hende ta duda ku bida eterno riba tera ta posibel. P’esei, nos lo por puntra: Beibel realmente ta apoyá e speransa ei? Si ta asina, na ki tempu Dios a revel’é na hende pa e promé bes?

“Sometí na Banidat . . . den Speransa”

3. Den ki manera Dios su propósito pa hende tabata bisto for di prinsipio di historia humano?

³ Yehova su propósito pa humanidat tabata bisto desde e prinsipio di historia humano. Dios a indiká bon kla ku Adam lo a biba pa semper si el a keda obediente. (Gén. 2:9, 17; 3:22) Sin duda, Adam su promé desendientenan a haña sa kon hende a bira imperfekto, i nan por a mira prueba di esei tambe. Yehova a blòkia entrada di hòfi di Edén i hende a kuminsá bira bieu i muri. (Gén. 3:23, 24) Segun tempu tabata pasa, hende su bida tabata bira mas i mas kòrtiku. Adam a biba 930 aña, Sèm, yu di Noe, a biba 600 aña so i su yu hòmber Arfaksad a biba 438 aña. Taré, tata di Abraham, a biba 205 aña. I Abraham a biba 175 aña, su yu Isaak 180 aña i Jakòb 147 aña. (Gén. 5:5; 11:10-13, 32; 25:7; 35:28; 47:28) Siguramente, hopi hende lo a komprondé ku e echo ku hende su bida tabata bira mas i mas kòrtiku tabata un indikashon ku e speransa di bida eterno a bai pèrdí! Awor, tabatin motibu pa nan kere ku hende por bolbe haña bida eterno?

4. Ki base hòmbernan fiel di pasado tabatin pa kere ku Dios lo duna hende e bendishonnan ku Adam a pèrdè?

⁴ E Palabra di Dios ta bisa: “E kreashon [humano] a wòrdu sometí na banidat . . . den speransa.” (Rom. 8:20) Ki speransa? E promé profesia di Beibel ta señalá na e “simia” ku lo ‘heridá e kolebra su kabes.’(Lesa Génesis 3:1-5 i 15.) E promesa di e Simia ei a duna hende fiel e speransa ku Dios lo no kambia su propósito pa ku humanidat. El a duna hòmbernan manera Abel i Noe un motibu pa kere ku Dios lo duna hende e bendishonnan ku Adam a pèrdè. Podisé e hòmbernan akí a realisá ku ‘heridamentu di e hilchi di pia di e simia,’ lo a enserá dramamentu di su sanger, esta, ku e kolebra lo mata e simia.—Gén. 4:4; 8:20; Heb. 11:4.

5. Kiko ta mustra ku Abraham tabatin fe den resurekshon?

 ⁵ Pensa tambe riba Abraham. Ora el a wòrdu poní na prueba, kasi el a ofresé Isaak, su yu unigénito. (Heb. 11:17) Dikon e tabata dispuesto pa hasi esaki? (Lesa Hebreonan 11:19.) Pasobra el a kere den resurekshon! Abraham tabatin un base sólido pa kere den resurekshon. Al fin i al kabo, Yehova a rebibá Abraham su podernan pa prokreá i a hasi posibel ku e i su esposa, Sara, por a produsí un yu hòmber den nan behes. (Gén. 18:10-14; 21:1-3; Rom. 4:19-21) Ademas, Abraham tabatin Yehova su palabra. Dios a bis’é: “Ta dor di Isaak bo desendientenan lo wòrdu kontá.” (Gén. 21:12) P’esei, Abraham tabatin bon motibu pa spera ku Dios lo a resusitá Isaak.

6, 7. (a) Ki pakto Yehova a sera ku Abraham? (b) Ki speransa Yehova su promesa na Abraham a duna humanidat?

⁶ Debí na Abraham su fe sobresaliente, Yehova a sera un pakto kuné ku a enbolbé su “desendientenan,” òf su simia. (Lesa Génesis 22:18.) E parti prinsipal di e simia a resultá di ta Hesukristu. (Gal. 3:16) Ademas, Yehova a bisa Abraham ku su simia lo a multipliká “manera e streanan di e shelunan i manera e santu ku tin kantu di laman,” esta, na un kantidat ku tabata deskonosí pa Abraham. (Gén. 22:17) Sinembargo, despues e kantidat ei a ser revelá. E simia ta konsistí di Hesukristu i 144.000 persona, ku lo goberná huntu kuné den su Reino. (Gal. 3:29; Rev. 7:4; 14:1) Ta mediante e Reino Mesiániko “tur e nashonnan di e tera lo ta bendishoná.”

⁷ Tin e posibilidat ku Abraham no a komprondé kompletamente kiko e pakto ku Yehova a sera kuné a enserá. Apesar di esei, Beibel ta bisa ku e “tabata anhelá e siudat ku un fundeshi firme.” (Heb. 11:10, BPK) E siudat ei ta e Reino di Dios. Abraham tin ku biba atrobe pa e por risibí e bendishonnan ku e Reino ei lo trese. Mediante resurekshon, e por biba pa semper riba tera. Sí, bida eterno lo ta posibel pa hende ku sobrebibí Armagedón òf pa esnan ku lo haña resurekshon.—Rev. 7:9, 14; 20:12-14.

‘E Spiritu di Dios Ku Ta den Mi Ta Obligá Mi’

8, 9. Dikon e buki di Jòb no ta djis un relato ku ta konta di e pruebanan di un hòmber?

⁸ Durante e periodo despues di Hosé, bisañetu di Abraham, i promé ku profeta Moisés, tabatin un hòmber ku yama Jòb. E buki bíbliko di Jòb, probablemente skirbí dor di Moisés, ta splika dikon Yehova a permití Jòb sufri i ki resultado esaki tabatin pa Jòb. Sinembargo, e buki di Jòb no ta djis un relato ku ta konta di e pruebanan di un hòmber; e ta enfoká riba kuestionnan ku ta di importansia pa tur Dios su kriaturanan inteligente. E buki ta yuda nos komprondé ku Yehova ta ehersé su soberania na un manera hustu. Ademas, e ta revelá ku e kuestion ku a lanta den Edén ta enbolbé e integridat i e futuro bida di tur Dios su sirbidónan riba tera. Ounke Jòb no a komprondé e kuestion akí, e no a permití su tres kompañeronan konvens’é ku el a frakasá komo wardadó di integridat. (Jòb 27:5) Esaki mester fortifiká nos fe i yuda nos realisá ku nos por mantené nos integridat i apoyá Yehova su soberania.

⁹ Despues ku Jòb su supuesto konsoladónan a kaba di papia, “Eliú, yu hòmber di Barakel e buzita, a kontestá.” Kiko a motiv’é pa papia? El a bisa: ‘E spiritu di Dios ku ta den mi ta obligá mi.’ (Jòb 32:5, 6, 18) Ounke loke Eliú a bisa bou di inspirashon a kumpli ora ku Jòb su pruebanan a terminá, su palabranan ta di gran nifikashon pa otro hende tambe. Nan ta duna speransa na tur hende ku ta mantené nan integridat.

10. Kiko ta mustra ku tin biaha Yehova ta duna un persona un mensahe ku tin un aplikashon mas amplio, esta, na humanidat en general?

¹⁰ Tin biaha, ounke Yehova ta duna un mensahe na ún persona, e mensahe tin un  aplikashon mas amplio, esta, na humanidat en general. Un ehèmpel di esaki ta e profesia di Daniel ku a trata e soño ku Rei Nabukodonosor di Babilonia tabatin enkuanto un palu inmenso ku a ser di kap. (Dan. 4:10-27) Ounke e soño ei tabatin un kumplimentu den kaso di Nabukodonosor, el a señalá na algu hopi mas grandi. El a indiká ku Dios lo bolbe ehersé su soberania riba tera mediante un reino ku lo a bin for di e liña di desendensia di Rei David. Esaki lo a sosodé despues di un periodo di 2.520 aña, kontando for di aña 607 promé ku nos era padilanti. * Ora Hesukristu a ser instalá komo Rei selestial na aña 1914, Dios a bolbe kuminsá manifestá su soberania pa ku tera. Djis pensa riba esaki: pronto e Reino lo kumpli ku tur speransa di humanidat obediente!

“Libr’é di Baha den Graf”!

11. Kiko Eliú su palabranan ta revelá di Dios?

¹¹ Ora Eliú tabata kontestá Jòb, el a papia di “un angel komo mediadó p’e, un entre mil, pa kòrda hende kiko ta korekto p’e.” Kiko si e mensahero akí ‘hasi orashon na Dios i Dios asept’é’? Eliú a bisa: “[E ora ei Dios lo] mustr’é miserikòrdia, i bisa: ‘Libr’é di baha den graf, mi a haña un redenshon’; laga su karni bira mas suave ku esun di mucha, lag’é bolbe na e dianan di vigor di su hubentut.” (Jòb 33:23-26) E palabranan ei a indiká ku Dios ta dispuesto pa aseptá un “redenshon,” òf reskate, na fabor di hende ku repentí.—Jòb 33:24.

12. Ki speransa e palabranan di Eliú ta duna humanidat en general?

¹² Hopi profeta no a komprondé kompletamente kiko tur e kosnan ku nan a skirbi a nifiká. Probablemente, Eliú tampoko no a komprondé kompletamente kiko e reskate a enserá. (Dan. 12:8; 1 Ped. 1:10-12) Sinembargo, Eliú su palabranan a reflehá e speransa ku un dia Dios lo a aseptá un reskate i libra hende for di e efektonan di behes i di morto. Eliú su palabranan a presentá e speransa maravioso di bida eterno. E buki di Jòb ta mustra tambe ku lo tin un resurekshon.—Jòb 14:14, 15.

13. Kiko e palabranan di Eliú ta nifiká pa kristiannan?

¹³ Awe, ainda Eliú su palabranan tin nifikashon pa miónes di kristian ku tin speransa di  sobrebibí e destrukshon di e sistema aktual di kosnan. Hende di edat avansá ku sobrebibí lo bolbe haña nan vigor di hubentut. (Rev. 7:9, 10, 14-17) Ademas, e speransa di mira esnan ku lo resusitá ku e vigor ku nan tabatin durante nan hubentut ta sigui alegrá hende fiel. Ta klaru ku pa e kristiannan ungí haña inmortalidat den shelu i e “otro karnénan” di Hesus haña bida eterno riba tera, nan tin ku ehersé fe den e sakrifisio di reskate di Kristu.—Juan 10:16; Rom. 6:23.

Dios Lo Traga Morto for di Tera pa Semper

14. Dikon e israelitanan tabatin mester di algu pa libra nan for di e kondenashon di e Lei di Moisés pa nan por tabatin e speransa di bida eterno?

¹⁴ E desendientenan di Abraham a bira un nashon independiente ora nan a drenta den un relashon ku Dios a base di un aliansa, òf pakto. Ora Yehova a duna nan e Lei, el a bisa nan: “Warda mi statutonan i mi ordenansanan, pa medio di kual un hende lo biba si e hasi nan.” (Lev. 18:5) Sinembargo, debí ku e israelitanan no por a kumpli ku e normanan perfekto di e Lei, e Lei a kondená nan. Pues, nan tabatin mester di algu superior na e Lei di Moisés pa libra nan for di e kondenashon ei.—Lesa Galationan 3:13.

15. Tokante ki futuro bendishon David a ser inspirá pa skirbi?

¹⁵ Despues di Moisés, Yehova a inspirá otro eskritornan di Beibel pa menshoná e speransa di bida eterno. (Sal. 21:4; 37:29) Por ehèmpel, na final di un salmo tokante union di berdadero adoradónan na Sion, e salmista David a bisa e palabranan akí: “Ayanan SEÑOR a ordená e bendishon, bida pa semper.”—Sal. 133:3.

16. Ki promesa Yehova a hasi mediante profeta Isaias relashoná ku e futuro di “henter tera”?

¹⁶ Yehova a inspirá Isaias pa profetisá tokante bida eterno riba tera. (Lesa Isaias 25:7 i 8.) Meskos ku un “velo” òf un klechi por choka algu lorá den dje, piká i morto ta un peso grandi riba humanidat. Yehova a duna su pueblo e siguransa ku pronto lo e traga, òf eliminá, piká i morto “for di henter tera.”

17. Ki papel profétiko di e Mesias ta habri kaminda pa bida eterno?

¹⁷ Laga nos konsiderá tambe e prosedura ku e Lei di Moisés a stipulá relashoná ku Azazel, esta, e kabritu di skapatorio. Un bes pa aña, riba e Dia di Ekspiashon, e sumo saserdote  ‘mester pone tur su dos mannan riba kabes di e kabritu bibu i konfesá riba dje tur e inikidatnan di e yunan di Israel; i e mester pone nan riba kabes di e kabritu i e kabritu mester karga tur nan inikidatnan riba dje hiba na un tera solitario.’ (Lev. 16:7-10, 21, 22) Isaias a profetisá e binida di e Mesias, kende lo hunga un papel similar i lo karga ‘enfermedat,’ “tristesa” i “piká di hopi hende.” Di e manera ei, e ta habri kaminda pa bida eterno.—Lesa Isaias 53:4-6 i 12.

18, 19. Ki speransa Isaias 26:19 i Daniel 12:13 ta enfatisá?

¹⁸ Mediante profeta Isaias, Yehova a bisa su pueblo di Israel: “Bo mortonan lo biba; nan kadavernan lo lanta. Boso ku ta drumi den stòf, spièrta i grita di goso, pasobra bo serena ta manera serena di ourora, i tera lo duna lus na su mortonan.” (Isa. 26:19) E Skritura Hebreo ta mustra bon kla ku tin un speransa di resurekshon i di bida riba tera. Por ehèmpel, ora Daniel tabatin kasi 100 aña di edat, Yehova a dun’é e siguransa: “Lo bo bai sosegá i lo lanta pa risibí e parti ku ta toka bo na e fin di dianan.”—Dan. 12:13.

¹⁹ Debí na e speransa di resurekshon, Marta por a bisa Hesus relashoná ku su ruman ku a muri: “Mi sa ku e lo lanta den e resurekshon riba e último dia.” (Juan 11:24) Hesus su siñansa- i e skrituranan inspirá di su disipelnan a kambia e speransa akí? Ainda Yehova ta duna hende e speransa di bida eterno riba tera? Nos lo konsiderá e kontestanan pa e preguntanan akí den e siguiente artíkulo.

[Nota]

Bo Por Splika?

• Den ki speransa e kreashon humano a ser “sometí na banidat”?

• Kiko ta mustra ku Abraham tabatin fe den resurekshon?

• Ki speransa e palabranan ku Eliú a bisa Jòb ta duna humanidat?

• Kon e Skritura Hebreo ta enfatisá e speransa di resurekshon i di bida eterno riba tera?

[Preguntanan di Estudio]

[Plachi na página 13]

Loke Eliú a bisa Jòb ta duna nos e speransa ku hende lo ser librá for di e efektonan di behes i di morto

[Plachi na página 14]

Daniel a haña e siguransa ku ‘lo e lanta pa risibí e parti ku ta tok’é na e fin di dianan’