“Boso Ta Mi Amigu”

“Boso ta mi amigu, si boso hasi loke mi ta ordená boso.”​—JUAN 15:14.

1, 2. (a) Kiko tabata e sirkunstansia di bida di Hesus su amigunan? (b) Dikon ta sumamente importante pa nos ta amigu di Hesus?

NO TA tur e hòmbernan ku tabata sinta den e kamber ariba huntu ku Hesus tabatin e mesun konosementu i sirkunstansia di bida. E rumannan Pedro i Andres tabata piskadó. Mateo tabata un kobradó di belasting, un profeshon ku hudiunan tabata despresiá. Probablemente, algun di nan, manera Santiago i Juan, tabata konosé Hesus for di mucha. Otronan, manera Natanael, kisas no tabatin hopi aña ku nan a konos’é. (Juan 1:​43-50) Sinembargo, tur ku tabata presente riba e anochi históriko ei di e Pasku Hudiu na Yerusalèm tabata konvensí ku Hesus tabata e Mesias primintí, Yu di e Dios bibu. (Juan 6:​68, 69) Nan mester a sinti nan konmoví ora nan a tende Hesus bisa nan: “Mi a yama boso amigu, pasobra tur kos ku mi a tende di mi Tata, mi a partisipá na boso.”​—Juan 15:15.

² En prinsipio, e palabranan ei ku Hesus a bisa su fiel apòstelnan ta apliká na tur e kristiannan ungí djawe. Pero den un sentido mas amplio nan ta apliká tambe na nan kompañeronan, e “otro karnénan.” (Juan 10:16) Pues, sin importá nos konosementu òf sirkunstansia di bida, nos tur por tin e privilegio di ta amigu di Hesus. Nos amistat kuné ta sumamente importante, pasobra ta ora nos ta amigu di Hesus nos ta bira amigu di Yehova tambe. De echo, nos no por hala serka Yehova sin ku nos hala serka Kristu promé. (Lesa Juan 14:​6 i 21.) Kiko nos tin ku hasi anto pa nos bira i keda amigu di Hesus? Promé ku nos konsiderá e tópiko importante ei, laga nos analisá e ehèmpel ku Hesus a pone komo un bon amigu i wak kiko nos por siña for di e manera ku su disipelnan a reakshoná riba su amistat.

E Ehèmpel di Hesus Komo un Bon Amigu

3. Kiko Hesus tabata konosí p’e?

³ Salomon, un rei sabí, a skirbi: “E riku tin hopi amigu.” (Pro. 14:20) E remarke ei ta indiká ku hende imperfekto tin e tendensia di sera amistat ku hende ku nan por risibí algu for di dje i no pasobra nan por dun’é algu. Hesus no tabatin e debilidat ei. Hende su situashon ekonómiko òf nivel di bida no tabatin influensia riba dje. Ta bèrdat ku Hesus a stima un hóben gobernante riku i a invit’é pa bira su siguidó. Ma Hesus a bisa e hòmber ei pa e bende su propiedatnan i duna hende pober e plaka. (Mar. 10:​17-22; Luk. 18:​18, 23) Hesus no tabata konosí pa su relashon ku hende riku i prominente, mas bien pa su amistat ku hende humilde i esnan ku otro hende tabata despresiá.​—Mat. 11:19.

4. Dikon nos por bisa ku Hesus su amigunan tabata imperfekto?

⁴ Hesus su amigunan sí tabata hende imperfekto. Por ehèmpel, tabatin okashon ku Pedro no a mira kosnan desde e punto di bista di Dios. (Mat. 16:​21-23) Santiago i Juan a mustra ku nan tabata ambisioso ora nan a pidi Hesus un posishon prominente den e Reino. Nan petishon a pone e otro apòstelnan rabia, i kada bes nan tabata pleita ku otro tokante ken tabata mas importante. Pero ku pasenshi Hesus a purba korigí e manera di pensa di su amigunan, i e no tabata kla pa rabia ku nan.​—Mat. 20:​20-28.

5, 6. (a) Dikon Hesus a keda amigu ku mayoria di e apòstelnan? (b) Dikon Hesus a kibra su amistat ku Hudas?

 ⁵ No ta pasobra Hesus tabata demasiado permisivo òf siegu pa fayonan di e hòmbernan imperfekto akí, el a keda amigu ku nan. Mas bien, el a skohe pa enfoká riba nan bon intenshonnan i kualidatnan positivo. Por ehèmpel, Pedro, Santiago i Juan a pega soño en bes di apoyá Hesus den su momentonan di mas difísil. Ta di komprondé ku nan a desapuntá Hesus. Apesar di esei, el a rekonosé ku nan tabatin bon intenshon, pasobra el a bisa: “E spiritu ta boluntario, ma e karni ta débil.”​—Mat. 26:41.

⁶ Di otro banda, Hesus a kibra su amistat ku Hudas Iskariot. Ounke Hudas a sigui hasi komo si fuera e tabata Hesus su amigu, Hesus a ripará ku su bon kompañero di ántes a kue mal kaminda. Komo ku Hudas a bira amigu di mundu, el a hasi su mes enemigu di Dios. (Sant. 4:4) P’esei, ta despues ku Hesus a manda Hudas bai, El a bisa e sobrá 11 apòstelnan fiel ku nan ta su amigu.​—Juan 13:​21-35.

7, 8. Kon Hesus a demostrá su amor pa su amigunan?

⁷ Hesus no a enfoká riba e fayonan ku su amigunan fiel a hasi den pasado, mas bien, el a hasi loke tabata mihó pa nan. Por ehèmpel, el a pidi su Tata pa protehá nan durante nan pruebanan. (Lesa Juan 17:11.) Hesus a tene kuenta ku nan limitashonnan físiko. (Mar. 6:​30-32) I e no tabata interesá solamente den bisa nan loke e tabata pensa, ma e tabata interesá tambe pa tende i komprondé loke nan tabata pensa i sinti.​—Mat. 16:​13-16; 17:​24-26.

⁸ Hesus a biba i muri pa su amigunan. Sí, e tabata sa ku e mester a ofresé su bida komo un rekisito legal pa kumpli ku e norma di hustisia di su Tata. (Mat. 26:​27, 28; Heb. 9:​22, 28) Pero Hesus a duna su bida pa demostrá su amor. El a bisa: “Ni un hende no tin amor mas grandi ku esaki, ku un hende ta duna su bida pa su amigunan.”​—Juan 15:13.

Kon e Disipelnan di Hesus A Reakshoná Riba Su Amistat?

9, 10. Kon hende a reakshoná riba Hesus su generosidat?

⁹ Hesus a duna su tempu, kariño i rekursonan material generosamente. Esei a pone ku hende a sintí nan atraí na dje, i nan tabata kontentu ku nan tambe por a kompartí loke nan tabatin kuné. (Luk. 8:​1-3) Di eksperensia Hesus por a bisa: “Duna, i lo wòrdu duná na boso: un midí bon yená, bon primí, bon sagudí, ku ta basha over, nan lo drama den boso skochi. Pasobra ku e mesun midí ku boso midi kuné lo wòrdu midí bèk pa boso.”​—Luk. 6:38.

¹⁰ Ta klaru ku tabatin algun hende ku a purba di bira amigu di Hesus djis pa haña kos.  E supuesto amigunan akí a bandoná Hesus ora nan a malinterpretá algu ku el a bisa. En bes di duna Hesus benefisio di duda, nan a bula saka konklushon robes i a bandon’é. Kontrali na nan, e apòstelnan sí a keda leal na dje. Pa motibu di nan amistat ku Kristu hopi bes nan a haña nan ku prueba, pero nan a hasi tur nan esfuerso pa apoy’é den tempu bon i den tempu malu. (Lesa Juan 6:​26, 56, 60 i 66-68.) Riba e último anochi di Hesus su bida komo hende riba tera, el a ekspresá su apresio pa su amigunan ku e siguiente palabranan: “Boso ta esnan ku a keda na mi lado den mi pruebanan.”​—Luk. 22:28.

11, 12. Ki siguransa Hesus a duna su disipelnan, i kon nan a reakshoná?

¹¹ Djis despues ku Hesus a elogiá su disipelnan pa nan lealtat, e mesun hòmbernan akí a bandon’é. Pa un periodo kòrtiku, nan a laga miedu di hende vense nan amor pa Kristu. Ma Hesus a bolbe pordoná nan, pasobra despues di su morto, el a aparesé na nan i a sigurá nan di su amistat. Es mas, el a konfia nan ku un trabou sagrado, esun di hasi disipel di hende di ‘tur nashon’ i pa duna testimonio di dje “te na e parti mas alehá di mundu.” (Mat. 28:19; Echo. 1:8) Kon e disipelnan a reakshoná?

¹² E disipelnan a hasi tur loke nan tabata por pa plama e mensahe di Reino. Ku yudansa di e spiritu santu di Yehova no a dura mashá ku nan a yena Yerusalèm ku nan siñansa. (Echo. 5:​27-29) Ni menasa di morto no por a stòp nan di obedesé Hesus su mandato pa hasi disipel. Djis un par di dékada despues ku nan a risibí e mandato di Hesus, apòstel Pablo por a skirbi ku e evangelio a ser prediká “den henter kreashon bou di shelu.” (Kol. 1:23) No tin duda, e disipelnan akí a demostrá ku nan a apresiá e amistat ku nan tabatin ku Hesus.

13. Den ki maneranan e disipelnan di Hesus a laga su siñansanan influensiá nan?

¹³ E personanan ku a bira disipel di Hesus a laga su siñansanan influensiá nan bida mes tambe. Pa hopi di nan, esaki a nifiká ku nan mester a kambia nan kondukta i personalidat drástikamente. Ántes, algun di e disipelnan nobo akí tabata homoseksual, adúltero, buraché òf ladron. (1 Kor. 6:​9-11) Otronan mester a kambia e manera ku nan tabata trata hende di otro rasa. (Echo. 10:​25-28) Apesar di esei, nan a obedesé Hesus. Nan a kita nan personalidat bieu i bisti esun nobo. (Efe. 4:​20-24) Nan a siña konosé “e mente di Kristu.” Pues, nan a siña komprondé i imitá Kristu su manera di pensa i di aktua.​—1 Kor. 2:16.

Amistat ku Kristu Awe

14. Kiko Hesus a primintí ku lo el a hasi durante “e konklushon di e sistema di kosnan”?

¹⁴ Hopi di e kristiannan di promé siglo sea a konosé Hesus personalmente, òf a mir’é despues ku el a resusitá. Ta opvio ku nos no tabatin e privilegio ei. P’esei, kon nos por ta amigu di Kristu? Un manera ta di obedesé e guia ku Hesus ta perkurá mediante e esklabo fiel i prudente, ku ta konsistí di Hesus su rumannan ungí ku spiritu santu ku ta riba tera ainda. Hesus a primintí ku durante “e konklushon di e sistema di kosnan,” lo el a enkargá e esklabo akí ku “tur su pertenensianan.” (Mat. 24:​3, 45-47, NW) Awendia, e gran mayoria di hende ku ta hasi esfuerso pa ta amigu di Kristu no ta miembro di e esklabo akí. Den ki manera nan reakshon riba e guia ku nan ta haña for di e esklabo fiel ta influensiá nan amistat ku Kristu?

15. Kiko ta determiná si un persona lo ta un karné òf un kabritu?

 ¹⁵ Lesa Mateo 25:​31-40. Hesus a yama e personanan ku lo a forma e esklabo fiel su rumannan. Den e ilustrashon tokante separashon di karné for di kabritu, Hesus a bisa bon kla ku e ta konsiderá e manera ku nos ta trata su rumannan komo si fuera ta e nos ta trata asina. De echo, el a bisa ku loke lo determiná si un persona ta karné òf kabritu ta e manera ku e persona ei ta trata “un di esnan di mas chikitu di [Su] rumannan.” P’esei, e manera prinsipal ku personanan ku tin speransa di biba riba tera ta demostrá ku nan ke ta amigu di Kristu ta di apoyá e esklabo fiel.

16, 17. Kon nos por demostrá ku nos ta amigu di Kristu su rumannan?

¹⁶ Si bo tin e speransa di biba riba tera bou di e Reino di Dios, kon bo por demostrá ku bo ta amigu di Kristu su rumannan? Laga nos konsiderá solamente tres manera. Di promé, bo tin ku partisipá ku henter bo alma den e trabou di prediká. Kristu a manda su rumannan prediká e evangelio rònt mundu. (Mat. 24:14) Ma sin e yudansa di nan kompañeronan, e otro karnénan, lo ta masha difísil pa e restu di e rumannan di Kristu ku ta riba tera ainda kumpli ku e responsabilidat ei. Pues anto, kada biaha ku e otro karnénan partisipá den e trabou di prediká, nan ta yuda Kristu su rumannan kumpli ku nan asignashon sagrado. Meskos ku Kristu, e esklabo fiel i prudente tin masha apresio pa e manera akí ku nos ta demostrá nos amistat.

¹⁷ E di dos manera ku e otro karnénan por yuda Kristu su rumannan ta ora nan ta duna e trabou di prediká nan sosten finansiero. Hesus a animá su siguidónan pa sera amistat pa medio di ‘rikesa inhustu.’ (Luk. 16:9) Esei no ta nifiká sí ku nos por kumpra Hesus òf Yehova su amistat. Mas bien, ora nos usa nos rekursonan material pa adelanto di e interesnan di Reino, nos ta demostrá nos amistat i amor, no ku palabra so, sino “ku echo i bèrdat.” (1 Juan 3:​16-18) Nos ta duna e sosten finansiero ei ora nos ta partisipá den e trabou di prediká, ora nos ta duna sèn pa konstrukshon i mantenshon di nos lugánan di reuní i ora nos ta duna sèn pa e obra mundial di prediká. Sea ku e montante di nos donashon ta grandi òf chikitu, tantu Yehova komo Hesus siguramente ta apresiá loke nos ta duna ku alegria.​—2 Kor. 9:7.

18. Dikon nos mester obedesé guia basá riba Beibel ku e ansianonan di kongregashon ta duna?

¹⁸ Un di tres manera ku nos tur por demostrá ku nos ta amigu di Kristu ta ora nos ta sigui guia di e ansianonan di kongregashon. E hòmbernan akí a ser nombrá mediante spiritu santu bou di guia di Kristu. (Efe. 5:23) Apòstel Pablo a skirbi: “Sea obediente na esnan ku ta hiba delantera den boso i sea sumiso.” (Heb. 13:​17, NW) Tin biaha, nos tin problema pa obedesé guia basá riba Beibel ku nos ansianonan di kongregashon ta duna. Probablemente nos ta konsiente di nan imperfekshonnan, i esaki kisas por stroba nos di  aseptá nan konseho. Sinembargo, Kristu, Kabes di e kongregashon, ta kontentu di por usa e hòmbernan imperfekto akí. Pues, e manera ku nos ta reakshoná riba nan outoridat tin influensia direkto riba nos amistat ku Kristu. P’esei, ora nos pasa por alto di e fayonan di e ansianonan i sigui nan guia ku goso, nos ta duna prueba di nos amor pa Kristu.

Unda Nos Por Haña Bon Amigu?

19, 20. Kiko nos por haña den kongregashon, i kiko nos lo trata den e siguiente artíkulo?

¹⁹ Hesus ta sigui kuida nos mediante e supervishon di wardadónan amoroso. Ademas, e ta perkurá pa nos haña mama i ruman hòmber i muhé den kongregashon. (Lesa Marko 10:​29 i 30.) Kon bo famianan a reakshoná na prinsipio ora bo a kuminsá asosiá ku Yehova su organisashon? Nos ta spera ku nan a apoyá bo esfuersonan pa hala serka Dios i Kristu. Sinembargo, Hesus a spièrta su disipelnan ku tin biaha “un hende su enemigunan lo ta e miembronan di su mes kas.” (Mat. 10:36) P’esei, ta un konsuelo pa sa ku den kongregashon nos por haña personanan mas yegá na nos ku un ruman karnal!​—Pro. 18:24.

²⁰ Na konklushon di Pablo su karta na e kongregashon na Roma, el a manda saludo pa algun ruman menshonando nan nòmber. Esei ta indiká ku e tabata bon amigu ku hopi ruman. (Rom. 16:​8-16) Apòstel Juan a terminá su di tres karta ku e palabranan akí: “Saludá e amigunan kada un na nan nòmber.” (3 Juan 14) Pues, ta opvio ku e tambe a sera hopi amistat duradero. Kon nos por imitá e ehèmpel di Hesus i e promé disipelnan ora nos ta sera i konserbá amistat sano ku nos rumannan den kongregashon? E siguiente artíkulo lo kontestá e pregunta akí.

Kon Lo Bo Kontestá?

• Ki ehèmpel Hesus a pone komo un bon amigu?

• Kon e disipelnan a reakshoná riba Hesus su amistat?

• Kon nos por demostrá ku nos ta amigu di Kristu?

[Preguntanan di Estudio]

[Plachi na página 21]

Hesus tabata interesá den loke su amigunan tabata pensa i sinti

[Plachi na página 23]

Kon nos por demostrá ku nos ke ta amigu di Kristu?