Bon Biní na e Mihó Kaminda di Bida!

‘Sea ku nos biba òf ku nos muri, ta di Yehova nos ta.’​—ROM. 14:8.

1. Kiko Hesus a siña hende tokante e mihó manera di biba?

YEHOVA ke pa nos sigui e mihó kaminda di bida. Ounke tin vários manera ku hende por hiba nan bida, tin ún ku ta mihó ku tur. Sí, e mihó kaminda di bida ta enserá biba na armonia ku Dios su Palabra i siña di su Yu, Hesukristu. Hesus a siña su siguidónan adorá Dios den spiritu i bèrdat, i el a manda nan bai hasi disipel. (Mat. 28:​19, 20; Juan 4:24) Ora nos ta sigui Hesus su instrukshonnan, nos ta agradá Yehova i ta haña Su bendishon.

2. Kon hopi hende a reakshoná riba e mensahe di Reino den promé siglo, i kiko pertenesé na “E Kaminda” a enserá?

² Ora hende humilde aseptá e bèrdat i batisá, nos tin bon motibu pa bisa nan: “Bon biní na e mihó kaminda di bida!” Durante e promé siglo di nos era, míles di hende di vários nashon a aseptá e bèrdat, a dediká nan bida na Dios i a demostrá esaki públikamente mediante nan boutismo. (Echo. 2:41) E promé disipelnan ei tabata pertenesé na “E Kaminda.” (Echo. 9:2; 19:23) E ekspreshon akí tabata masha apropiá, pasobra esnan ku a bira kristian a sigui un kaminda, òf manera di biba, ku a enfoká riba fe den Hesukristu, kende su ehèmpel nan a sigui.​—1 Ped. 2:21.

3. Dikon Yehova su pueblo ta batisá, i kuantu hende a batisá den e último dies añanan?

³ E kantidat di disipel a oumentá drástikamente den e último dianan, i awor, e predikashon ta tuma lugá den mas ku 230 pais. Den e último dies añanan, mas ku 2.700.000 hende a tuma e desishon pa sirbi Yehova, i a batisá komo símbolo di nan dedikashon. Esaki ta un promedio di 5.000 hende pa siman! Nan desishon pa batisá tabata basá riba amor pa Dios, konosementu di e Skritura i fe den siñansa bíbliko. Boutismo ta un logro importante den nos bida, pasobra e ta e komienso di un relashon íntimo ku Yehova. Ademas, nos boutismo ta demostrá e konfiansa ku nos tin ku Yehova lo yuda nos sirbié fielmente, meskos ku el a yuda su sirbidónan den pasado kana den su kaminda.​—Isa. 30:21.

 Dikon Boutismo Ta Esensial?

4, 5. Menshoná algun benefisio i bendishon ku boutismo ta trese kuné.

⁴ Kisas bo a atkerí konosementu di Dios, a hasi kambio den bo bida i awor bo ta un publikadó no-batisá. Nos ta elogiá bo pa bo progreso. Pero, bo a dediká bo mes na Dios den orashon? Bo ta pensa di batisá? Probablemente, durante bo estudio di Beibel, bo a haña sa ku bo meta prinsipal den bida mester ta pa alabá Yehova i no pa djis agradá bo mes òf pa akumulá posishon material. (Lesa Salmo 148:​11-13; Lukas 12:15) Awor, kiko ta algun benefisio i bendishon ku boutismo ta trese kuné?

⁵ Komo un kristian dediká, bo bida lo haña berdadero propósito. Lo bo ta felis pasobra bo ta hasi e boluntat di Dios. (Rom. 12:​1, 2) Yehova su spiritu santu lo yuda bo kultivá Su kualidatnan, manera pas i fe. (Gal. 5:​22, 23) Dios lo kontestá bo orashonnan i lo bendishoná bo esfuerso pa biba na armonia ku su Palabra. Bo sirbishi lo ta gososo, i bo speransa pa biba pa semper lo bira mas fuerte segun ku bo ta hasi Dios su boluntat. Es mas, bo dedikashon i boutismo lo demostrá ku realmente bo ke ta un Testigu di Yehova.​—Isa. 43:​10-12.

6. Kiko nos boutismo ta duna di konosé?

⁶ Ora nos dediká nos mes na Yehova i batisá, nos ta duna di konosé ku nos ta pertenesé na dje. Apòstel Pablo a skirbi: “Pasobra ni un di nos no ta biba pa su mes, i ni un no ta muri pa su mes; pasobra si nos biba, ta pa Señor nos ta biba, òf si nos muri, ta pa Señor nos ta muri; p’esei, sea ku nos biba òf ku nos muri, ta di Señor nos ta.” (Rom. 14:​7, 8) Demostrando ku e ta balorá nos kada un komo persona, Dios a duna nos boluntat liber. P’esei, ora nos skohe konsientemente pa biba pa Yehova pasobra nos ta stim’é, nos ta hasi su kurason kontentu. (Pro. 27:11) I siendo ku nos boutismo ta un símbolo di nos dedikashon na Dios i tambe un deklarashon públiko ku Yehova ta nos Gobernante, e ta demostrá ku nos a skohe su banda den e kuestion di soberania universal. (Echo. 5:​29, 32, BPK) Pues, ora nos dal e paso ei, Yehova, na su turno, tambe ta ku nos. (Lesa Salmo 118:6.) Ademas, boutismo ta habri kaminda pa nos haña mas bendishon spiritual, tantu awor komo den futuro.

Un Hermandat Kaminda Amor Ta Reina

7-9. (a) Kiko Hesus a primintí esnan ku a laga tur kos atras i a siguié? (b) Kon Hesus su promesa registrá na Marko 10:​29 i 30 ta kumpli awe?

⁷ Apòstel Pedro a bisa Hesus: “Ata nos a bandoná tur kos i a sigui bo; kiko anto nos lo haña?” (Mat. 19:27) Pedro i e otro disipelnan di Hesus a hasi hopi sakrifisio pa a dediká  nan mes kompletamente na e trabou di prediká e Reino. I nan tabata ke sa kiko ta nan rekompensa. (Mat. 4:​18-22) Kiko Hesus a primintí nan?

⁸ Segun e relato paralelo di Marko, Hesus a indiká ku su disipelnan lo a bira parti di un hermandat spiritual. El a bisa: “No tin ningun hende ku a bandoná kas òf ruman hòmbernan òf ruman muhénan òf mama òf tata òf yunan òf kunukunan pa mi motibu i pa motibu di evangelio, ku lo no risibí shen bes mas tantu den e tempu akí: kasnan i ruman hòmbernan i ruman muhénan i mamanan i yunan i kunukunan, huntu ku persekushonnan; i den e siglo ku ta bin, bida eterno.” (Mar. 10:​29, 30) Kristiannan di promé siglo, manera Lidia, Akila, Prisila i Gayo a perkurá ‘kas’ pa nan rumannan den fe i a bira nan “ruman hòmbernan, ruman muhénan i mamanan,” manera Hesus a primintí.​—Echo. 16:​14, 15; 18:​2-4; 3 Juan 1, 5-8.

⁹ Loke Hesus a bisa ta haña mayor kumplimentu awe. E “kunukunan” ku su siguidónan ta laga atras ta referí na trabou òf fuente di entrada ku hopi di nan—entre otro, misioneronan, miembronan di famia di Bètel i sirbidónan internashonal—a bandoná boluntariamente pa promové interesnan di Reino den vários pais. Sí, hopi ruman a bandoná nan kas pa hiba un bida simpel, i ta un goso pa tende nan eksperensianan ku ta mustra kon Yehova a perkurá pa nan i kon felis nan ta pasobra nan ta sirbié. (Echo. 20:35) Es mas, ta tur Yehova su sirbidónan batisá por disfrutá di e hermandat mundial akí. Esei sigur ta un bendishon ku “buska promé e reino di Dios i Su hustisia” ta trese kuné.​—Mat. 6:33.

‘Bou di Protekshon di e Haltísimo’

10, 11. Ken Yehova ta protehá i kon e ta hasi esei?

¹⁰ Dedikashon i boutismo ta trese un otro bendishon, esta, e privilegio di biba ‘bou di protekshon di e Haltísimo.’ (Sal. 91:1) Yehova ta protehá nos kontra daño spiritual. Pero,  hende ku no ta konfia den Dios i no ta mira kosnan desde Su punto di bista no por disfrutá di e protekshon ei. Ora nos ta biba na armonia ku nos dedikashon i ta pone tur nos konfiansa den Yehova, ta komo si fuera nos ta bisa: “[Bo ta] mi refugio i mi fòrti, mi Dios, den kende mi ta konfia!” (Sal. 91:2) Yehova Dios a bira nos refugio. (Sal. 91:9) No tin mihó protekshon ku esun di Yehova!

¹¹ Si nos ta ‘bou di protekshon’ di Yehova, esei ta enserá tambe ku nos a ser bendishoná ku e privilegio di kultivá un relashon íntimo kuné. E relashon ei ta kuminsá ora nos dediká nos mes i batisá. I segun ku nos ta sigui studia Beibel, ta hasi orashon intenso i esfuerso pa obedesé Dios den tur kos, nos ta hala mas serka dje i nos amistat kuné lo bira mas estrecho. (Sant. 4:8) Pero ningun hende no a yega di tin un amistat asina será ku Yehova manera Hesus, kende semper a pone su konfiansa den su Kreador. (Juan 8:29) P’esei, laga nos nunka duda den Yehova ni den su poder i deseo pa yuda nos kumpli ku nos promesa di dedikashon. (Ekl. 5:4) Dios su provishonnan spiritual ta prueba irefutabel ku e realmente ta stima nos i ku e ke pa nos ta eksitoso den nos sirbishi na dje.

Balorá Nos Paradeis Spiritual

12, 13. (a) Kiko e paradeis spiritual ta? (b) Kon nos lo por yuda personanan nobo den kongregashon?

¹² Dedikashon i boutismo ta habri kaminda tambe pa nos biba den e paradeis spiritual, ku ta un otro bendishon. Esaki ta un ambiente spiritual úniko ku rumannan den fe ta disfrutá di dje; nan ta na “pas” ku Yehova Dios i ku otro. (Sal. 29:11; Isa. 54:13, NW) No tin nada na mundu ku nos por kompará ku nos paradeis spiritual. Esaki ta bisto spesialmente na kongresonan internashonal, kaminda nos rumannan di diferente nashonalidat, idioma i grupo étniko ta reuní huntu den un ambiente di pas, union i amor fraternal.

¹³ E paradeis spiritual ku nos ta disfrutá di dje ta masha distinto di e kondishonnan deplorabel ku ta reina den e mundu awe. (Lesa Isaias 65:​13 i 14.) Mediante nos trabou di prediká e mensahe di Reino, nos tin e privilegio di invitá hende pa bin den e paradeis spiritual. Ta un bendishon tambe pa yuda esnan ku resientemente a kuminsá forma parti di e kongregashon i ku lo benefisiá di entrenamentu den sirbishi. Ansianonan por duna nos e privilegio di yuda algun persona ku ta nobo, meskos ku Akila i Prisila ‘a splika’ Apolos “e kaminda di Dios na un manera mas eksakto.”​—Echo. 18:​24-26.

Sigui Siña for di Hesus

14, 15. Ki bon motibu nos tin pa sigui siña for di Hesus?

¹⁴ Nos tin bon motibu pa sigui siña for di Hesus. Den su eksistensia prehumano, el a traha míles i míles di aña huntu ku su Tata. (Pro. 8:​22, 30) Hesus tabata sa ku e mihó kaminda di bida ta esun enfoká riba sirbishi na Dios i dunamentu di testimonio di e bèrdat. (Juan 18:37) Hesus a komprondé bon kla ku kualke otro manera di biba lo tabata basá riba egoismo i un punto di bista limitá. E tabata sa ku lo e bai enfrentá pruebanan severo i ku nan lo a mat’é. (Mat. 20:​18, 19; Heb. 4:15) Komo nos Ehèmpel, Hesus a siña nos kon pa mantené integridat.

¹⁵ Djis despues di Hesus su boutismo, Satanas a tent’é pa e bandoná e mihó kaminda di bida, pero e no tabatin éksito. (Mat. 4:​1-11) Esaki ta siña nos ku sin importá kiko Satanas hasi, nos por mantené nos integridat. Probablemente, Satanas ta fiha su atenshon riba esnan ku ta bai batisá i esnan ku ta resien batisá. (1 Ped. 5:8) Oposishon por bini di miembronan di famia ku tin un punto di bista robes di Testigunan di Yehova i ku ta kere ku nan mester protehá nos. Sinembargo, e pruebanan ei ta duna nos oportunidat di usa  takto i demostrá kualidatnan kristian ekselente manera rèspèt segun ku nos ta kontestá pregunta i duna testimonio. (1 Ped. 3:15) Esaki por tin un bon efekto riba esnan ku skucha nos.​—1 Tim. 4:16.

Keda Riba e Mihó Kaminda di Bida!

16, 17. (a) Kiko ta e 3 rekisitonan pa bida ku Deuteronomio 30:​19 i 20 ta menshoná? (b) Kon Hesus, Juan i Pablo a apoyá loke Moisés a skirbi?

¹⁶ Mas o ménos 1.500 aña promé ku Hesus a bini na tera, Moisés a animá e israelitanan pa skohe e mihó kaminda di bida ku tabata disponibel e tempu ei. El a bisa nan: “Mi ta yama shelu i tera komo testigu kontra boso awe, ku mi a pone bida i morto boso dilanti, e bendishon i e maldishon. P’esei, skohe bida pa bo biba, abo i bo desendientenan, dor di stima SEÑOR bo Dios, dor di obedesé su bos i dor di tene duru na dje.” (Deu. 30:​19, 20) Israel tabata infiel na Dios. No opstante, e tres rekisitonan básiko pa bida ku Moisés a menshoná a keda meskos. Hesus i otronan a ripití e rekisitonan ei.

¹⁷ Di promé, nos mester ‘stima Yehova nos Dios.’ Nos ta demostrá ku nos ta stima Dios ora nos ta aktua na armonia ku su kaminda hustu. (Mat. 22:37) Di dos, nos mester ‘obedesé Yehova su bos.’ I un manera pa hasi esei ta di studia su Palabra i warda su mandamentunan. (1 Juan 5:3) Ademas, nos mester asistí regularmente na reunionnan kristian kaminda nos ta haña splikashon di Beibel. (Heb. 10:​23-25) Di tres, nos mester ‘tene duru na Yehova.’ Pues, laga nos semper ehersé fe den Dios i sigui su Yu, sin importá kiko nos tin ku enfrentá.​—2 Kor. 4:​16-18.

18. (a) Kon E Toren di Vigilansia (na ingles) a deskribí e bèrdat na aña 1914? (b) Kiko mester ta nos punto di bista di e lus di bèrdat awe?

¹⁸ Un bida na armonia ku bèrdatnan bíbliko ta realmente un bendishon! Na 1914 a publiká e siguiente deklarashon signifikante den E Toren di Vigilansia (na ingles): ‘Akaso nos no ta un pueblo felis i bendishoná? Nos Dios no ta fiel? Si un hende sa di algu mihó ku esaki, lag’é siguié. Si kualke un di boso haña algu mihó, laga nos sa. Nos no sa di nada mihó, ni sikiera algu ku ta parse loke nos a haña den e Palabra di Dios. . . . No tin palabra pa deskribí e pas, goso i bendishon ku nos ta eksperensiá komo resultado di konosementu eksakto di e Dios berdadero. E relato di e Sabiduria, Hustisia, Poder i Amor di Dios ta satisfasé nos nesesidat mental i emoshonal plenamente. P’esei, nos no ta sigui buska mas. Nos no ta deseá nada otro; nos ke oumentá nos konosementu di Dios.’ (The Watch Tower, 15 di desèmber 1914, página 377 i 378) Awe, nos tambe ta masha gradisidu pa e lus spiritual i e bèrdat. Sí, awor nos tin asta mas motibu pa alegrá ku nos ‘ta kana den e lus di Yehova.’​—Isa. 2:5; Sal. 43:3; Pro. 4:18.

19. Dikon esnan ku ta kualifiká pa boutismo tin ku dal e paso ei sin tarda?

¹⁹ Si bo ke ‘kana den e lus di Yehova,’ pero bo no ta un kristian dediká i batisá ainda, no tarda. Hasi tur loke ta nesesario pa kumpli ku e rekisitonan bíbliko pa boutismo. Esei ta e úniko manera ku nos por mustra nos gratitut pa loke Dios i Kristu a hasi pa nos. Duna Yehova e kos di mas presioso ku bo tin, esta, bo bida. Demostrá ku bo ta determiná pa hasi Dios su boluntat, siguiendo e ehèmpel di su Yu. (2 Kor. 5:​14, 15) Sin ningun duda, esei ta e mihó kaminda di bida!

Kon Lo Bo Kontestá?

• Kiko nos boutismo ta simbolisá?

• Ki bendishon dedikashon na Dios i boutismo ta trese kuné?

• Dikon ta asina importante pa siña for di Hesus?

• Kiko lo yuda nos keda riba e mihó kaminda di bida?

[Preguntanan di Estudio]

[Plachi na página 28]

Bo boutismo ta demostrá ku bo a skohe e mihó kaminda di bida

[Plachi na página 29]

Bo ta biba ‘bou di protekshon’ di e Haltísimo?