“Papia e Palabra di Dios ku Kurashi”

“Nan . . . a ser yená ku spiritu santu i tabata papia e palabra di Dios ku kurashi.”​—ECHO. 4:31, NW.

1, 2. Dikon nos tin ku hasi esfuerso pa ta efektivo den nos sirbishi?

TRES dia promé ku Hesus su morto, el a bisa su disipelnan: “E evangelio akí di e reino lo wòrdu prediká den henter mundu komo un testimonio na tur nashon, i e ora ei e fin lo yega.” I promé ku el a bai shelu despues di a resusitá, el a duna su disipelnan e asignashon pa ‘hasi hende di tur nashon disipel di dje, i siña nan pa kumpli ku tur loke el a ordená nan.’ Ademas, el a primintí nan ku lo e ta ‘ku nan semper, te na fin di mundu.’​—Mat. 24:14; 26:​1, 2; 28:​19, 20.

² Pues, komo Testigunan di Yehova, nos ta hasiendo un trabou ku a kuminsá for di promé siglo. No tin ningun trabou mas importante ku esun di prediká e Reino i hasi disipel, pasobra e ta salba bida di hende. P’esei, ta masha importante pa nos ta efektivo den nos trabou di prediká i di hasi disipel. Den e artíkulo akí, nos lo mira kon spiritu santu por yuda nos papia ku kurashi ora nos ta den sirbishi. I e siguiente dos artíkulonan lo mustra kon Yehova su spiritu santu por yuda nos pa ta ábil ora di siña hende i pa ta regular den e trabou di prediká.

Nos Mester di Kurashi

3. Dikon nos mester di kurashi pa prediká e Reino?

³ Ounke e asignashon ku nos a haña di Dios pa prediká e Reino ta un gran privilegio, e tin su desafionan. Por ehèmpel, miéntras algun hende ta kla pa aseptá e bon notisia di e Reino di Dios, tin hopi ku ta aktua meskos ku esnan ku a biba den tempu di Noe. Hesus a bisa ku nan “no a hasi kaso te ku e diluvio a bini i a bari nan tur.” (Mat. 24:​38, 39, NW) Otronan ta hasi bofon di nos òf ta oponé nos. (2 Ped. 3:3) Nos por haña oposishon di parti di outoridatnan gubernamental òf religioso, di kompañeronan di skol, koleganan di trabou òf asta di nos famia. Ademas, nos tin ku lucha tambe ku nos propio debilidatnan, manera timides òf miedu ku hende lo rechasá nos. Siendo ku tin asina tantu kos ku por stroba nos di prediká e mensahe di Dios, nos mester di “kurashi” pa sigui prediká. (Efe. 6:​19, 20, BPK) Pero, kon nos por haña kurashi?

4. (a) Kiko ta kurashi? (b) Unda apòstel Pablo a haña kurashi pa papia ku e tesalonisensenan?

⁴ E ekspreshon griego tradusí komo papia ku “kurashi” ta nifiká papia na un manera direkto, stret i ku frankesa. E ta transmití e idea di tin ‘konfiansa i no miedu.’ Pero papia ku kurashi no ke men ku nos mester ta bòt ni brutu. (Kol. 4:6) Pasobra, ounke nos tin kurashi, nos ke ta na pas ku tur hende. (Rom. 12:18) Es mas, segun ku nos ta prediká e bon notisia di e Reino di Dios, nos mester ta balansá; nos tin ku papia ku kurashi i ala bes usa takto pa nos no ofendé hende sin ku nos por yuda. Sí, pa nos por demostrá kurashi na e manera korekto, nos tin ku kultivá sierto kualidatnan ku ta rekerí esfuerso. Pero pa nos por hasi esei, nos no por dependé solamente riba nos mes forsa i abilidatnan. Despues ku apòstel Pablo i su  kompañeronan a ser “maltratá na Filipos,” nan a bai prediká na e habitantenan di Tesalónika. Unda nan a haña e “kurashi” pa hasi esei? Pablo a skirbi: “Den nos Dios.” (Lesa 1 Tesalonisensenan 2:2.) Pues, Yehova Dios por kita nos miedu i duna nos tambe kurashi.

5. Kon Yehova a duna Pedro, Juan i otro disipelnan kurashi?

⁵ Ora e “gobernantenan i e ansianonan i e eskribanan” a ordená apòstel Pedro i Juan pa stòp di prediká, e apòstelnan a bisa nan: “Boso husga si ta korekto den bista di Dios pa skucha na boso mas ku na Dios; pasobra nos no por laga di papia loke nos a mira i tende.” Despues di esei, en bes di hasi orashon pidi Dios pa stòp e persekushon, nan i nan kompañeronan di fe a supliká Yehova ku e palabranan akí: “Señor, tuma nota di nan menasanan i laga bo sirbidónan papia bo palabra ku tur konfiansa.” (Echo. 4:​5, 19, 20, 29) Kon Yehova a kontestá nan orashon? (Lesa Echonan 4:31. *) Yehova a yuda nan haña kurashi mediante su spiritu santu. Dios su spiritu santu por hasi meskos pa nos. Awor kon nos por haña Dios su spiritu santu p’e guia nos den nos trabou di prediká i siña?

Kon Nos Por Haña Kurashi?

6, 7. Kon ta e manera mas direkto pa nos haña Dios su spiritu santu? Duna ehèmpel.

⁶ E manera di mas direkto pa haña Dios su spiritu santu ta di pidi p’e den orashon. Hesus a bisa su oyentenan: “Si boso anto, siendo malbado, sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!” (Luk. 11:13) Sí, konstantemente nos mester resa pidi Dios su spiritu santu. Kisas nos tin miedu di partisipá den sierto aspektonan di e ministerio, manera e trabou di prediká riba kaya, informalmente òf den teritorio di negoshi. Si esei ta e kaso, nos por resa pidi Yehova su spiritu santu i pa E yuda nos haña e kurashi nesesario.​—1 Tes. 5:17.

⁷ Esei ta loke un ruman muhé ku yama Rosa a hasi. * Un dia ku Rosa tabata na trabou, un maestra di skol ku ta traha huntu kuné tabata lesa un informe tokante maltrato di mucha na un otro skol. Loke e maestra a lesa a molesti’é asina tantu ku el a sklama: “Ta unda e mundu akí ta bai?” Esaki tabata un bon oportunidat pa duna testimonio, i Rosa no por a lag’é pasa. Kiko el a hasi p’e haña kurashi pa kuminsá un kòmbersashon? Rosa a bisa: “Mi a resa i a pidi Yehova yuda mi mediante su spiritu santu.” El a logra duna e maestra un ekselente testimonio i a traha un afsprak pa nan sigui kòmbersá. Konsiderá tambe e kaso di un mucha muhé di sinku aña ku yama Milane, ku ta biba na New York. Milane a bisa: “Promé ku mi bai skol, semper ami ku mi mama ta hasi orashon na Yehova.” Kiko nan ta pidi den orashon? Kurashi pa Milane para firme i papia ku otronan tokante su Dios! Su mama a bisa: “Esaki a yuda Milane splika otronan kiko ta su posishon enkuanto hasimentu di aña i dianan di fiesta; el a yud’é tambe pa e no partisipá den e selebrashonnan ei.” Sin duda, e dos ehèmpelnan akí ta mustra ku orashon ta yuda nos haña kurashi!

8. Kiko nos por siña for di e manera ku profeta Jeremias a haña kurashi?

⁸ Awor, reflekshoná riba loke a yuda profeta Jeremias haña kurashi. Ora Yehova a nombra Jeremias komo profeta di e nashonnan, el a bisa: “Mi no sa kon pa papia, pasobra mi ta un mucha.” (Jer. 1:​4-6) Pero ku tempu, Jeremias a bira un persona asina determiná  i dinámiko den su trabou di prediká ku hopi hende a konsider’é komo un profeta di kalamidat. (Jer. 38:4) Ku kurashi, el a proklamá e huisionan di Yehova pa mas ku 65 aña. El a bira bon konosí na Israel komo un hende ku tabata prediká ku kurashi i sin miedu. P’esei, mas o ménos 600 aña despues, ora Hesus tabata papia ku kurashi, algun hende a kere ku ta Jeremias a lanta for di morto. (Mat. 16:​13, 14) Kon profeta Jeremias a vense e timides ku e tabatin na prinsipio? El a deklará: ‘E palabra di Dios a bira manera kandela den mi kurason, será den mi wesunan; mi a kansa di ten’é paden.’ (Jer. 20:9) Sí, Yehova su palabra a ehersé poder riba Jeremias i a impuls’é pa papia.

9. Dikon e palabra di Dios por influensiá nos meskos ku el a influensiá Jeremias?

⁹ Den apòstel Pablo su karta na e hebreonan, el a skirbi: “E palabra di Dios ta bibu i aktivo [òf, “ta ehersé poder,” NW] i [ta] mas skèrpi ku kualke spada di dos filo, i ta penetrá te na e divishon di alma i spiritu, i di skarnir i tuti, i ta kapas pa husga e pensamentunan i intenshonnan di kurason.” (Heb. 4:12) E mensahe, òf palabra, di Dios por influensiá nos meskos ku el a influensiá Jeremias. Kòrda ku ounke Dios a usa hende pa skirbi Beibel, e no ta un kolekshon di buki ku ta kontené sabiduria di hende, pasobra e ta inspirá pa Dios. Na 2 Pedro 1:21, nos ta lesa: “Nunka profesia no a wòrdu duná pa medio di e boluntat di hende, ma hòmbernan santu di Dios a papia, inspirá dor di spiritu santu.” P’esei, ora nos ta tuma tempu pa studia Beibel na un manera signifikativo, nos ta yena nos mente ku e mensahe inspirá mediante spiritu santu. (Lesa 1 Korintionan 2:10.) E mensahe ei por bira “manera kandela” den nos, di manera ku nos no por ten’é pa nos so.

10, 11. (a) Kon nos mester studia Beibel si nos ke haña kurashi pa papia? (b) Menshoná por lo ménos ún kos ku abo ta bai hasi pa mehorá e kalidat di bo estudio personal.

¹⁰ Pa nos estudio personal di Beibel por tin un impakto fuerte riba nos, nos mester studia na un manera ku e mensahe di Beibel ta yega na nos kurason, esta, na e persona ku nos ta di paden. Por ehèmpel, profeta Ezekiel a haña un vishon den kua Yehova a pidié kome e ròl di un buki ku ta kontené un mensahe fuerte ku e mester a hiba pa un pueblo ku no kier a tende. Ezekiel mester a apsorbá henter e mensahe; e mester a laga esaki bira parti di dje i influensiá su emoshonnan. Esei lo a hasi su tarea di hiba e mensahe algu dushi manera miel.​—Lesa Ezekiel 2:​8–3:4, 7-9.

¹¹ Nos situashon ta similar na esun di Ezekiel. Awe tin hopi hende ku no ke tende loke Beibel ta bisa. P’esei, pa nos por sigui  proklamá e palabra di Dios, ta importante pa nos studia e Skritura na un manera ku nos por apsorbá su mensahe kompletamente. Sí, nos tin ku komprondé e Skritura bon i kere loke e ta bisa. Pues, nos mester tin e kustumber di studia regularmente i no de bes en kuando. Nos mester tin e mesun deseo ku e salmista ku a kanta: “Laga e palabranan di mi boka i e meditashon di mi kurason ta aseptabel den bo bista, o SEÑOR, mi Baranka i mi Redentor.” (Sal. 19:14) Pues, pa e bèrdatnan bíbliko por baha te den profundidat di nos kurason, ta masha importante pa nos tuma tempu pa meditá riba loke nos ta lesa. No tin ningun duda, nos mester hasi esfuerso pa mehorá e kalidat di nos estudio personal. *

12. Dikon reunionnan kristian ta yuda nos sigui guia di spiritu santu?

¹² Nos por benefisiá mashá tambe di Yehova su spiritu santu ora nos ta ‘stimulá otro pa stima i hasi bon obra i no ta laga di asistí na nos mes reunionnan.’ (Heb. 10:​24, 25) Pues, ora nos ta hasi esfuerso pa asistí regularmente na reunionnan kristian, ta skucha ku atenshon i ta apliká loke nos ta siña, nos ta permití spiritu santu guia nos. Al fin i al kabo, Yehova su spiritu santu ta duna guia mediante e kongregashon.​—Rev. 3:6.

Kiko Ta e Benefisionan di Kurashi?

13. Kiko nos por siña for di loke kristiannan di promé siglo a logra den e trabou di prediká?

¹³ Spiritu santu ta e forsa di mas poderoso den universo, i e por duna hende poder pa hasi e boluntat di Yehova. Bou di su influensia, kristiannan di promé siglo a logra hasi un tremendo trabou den e predikashon. Nan a prediká e bon notisia “den henter kreashon bou di shelu.” (Kol. 1:23) Pero mayoria di esnan ku a hasi e trabou di prediká no tabata “eduká ni siñá.” En bista di esei, nos por komprondé bon kla ku un forsa superior a motivá nan.​—Echo. 4:13.

14. Kiko por yuda nos ser “ferviente den spiritu”?

¹⁴ Ora nos ta biba na armonia ku e guia di spiritu santu, esei ta motivá nos pa kumpli ku nos ministerio ku kurashi. Si nos ta resa regularmente pidi Dios su spiritu santu, ta hasi estudio personal diligentemente, ta hasi orashon ora nos ta meditá riba loke nos ta lesa i ta asistí regularmente na reunionnan kristian, nos ta saka vários benefisio ku por yuda nos ser “ferviente den  spiritu.” (Rom. 12:11) Relashoná ku “un hudiu ku yama Apolos, . . . un hòmber elokuente,” Beibel ta bisa: “Siendo ferviente den spiritu, e tabata papia i siña eksaktamente e kosnan tokante di Hesus.” (Echo. 18:​24, 25) Si nos tambe ta “ferviente den spiritu,” nos por demostrá mas kurashi den nos sirbishi di kas pa kas i ora nos ta duna testimonio informal.

15. Ki benefisio nos ta saka ora nos ta papia ku mas kurashi?

¹⁵ Ora nos ta papia ku mas kurashi den e trabou di prediká, nos ta saka hopi benefisio. Por ehèmpel, nos ta bira mas positivo pasobra nos ta komprondé mihó kon importante i benefisioso nos trabou ta. Nos ta bira mas entusiasmá pasobra nos ta haña mas goso ora nos ta efektivo den sirbishi. I nos ta haña mas zelo pasobra nos ta bira mas konsiente di e urgensia di e trabou di prediká.

16. Kiko nos mester hasi si nos zelo pa e sirbishi di Dios a mengua?

¹⁶ Pero kiko nos tin ku hasi si nos a pèrdè nos zelo pa e sirbishi di Dios òf si nos zelo a mengua? E ora ei, ta bon pa nos analisá nos mes. Pablo a skirbi: “Saminá boso mes pa wak si boso ta den e fe; saminá boso mes!” (2 Kor. 13:5) Puntra bo mes: ‘Ainda mi ta ferviente den spiritu? Mi ta resa pidi Yehova su spiritu santu? Mi orashonnan ta demostrá ku mi ta dependé riba Yehova pa hasi su boluntat? Nan ta kontené palabranan di gratitut pa e trabou ku el a enkargá nos kuné? Kon ta ku mi kustumbernan di estudio personal? Kuantu tempu mi ta tuma pa meditá riba loke mi ta lesa i tende? Te kon leu mi ta partisipá den e reunionnan di kongregashon?’ Meditashon riba pregunta manera esakinan por yuda bo identifiká puntonan débil i tuma medida pa drecha nan.

Laga Dios Su Spiritu Santu Duna Bo Kurashi

17, 18. (a) Kon ekstenso e trabou di prediká e Reino ta ser hasí awe? (b) Kon nos por desplegá “tur frankesa” ora nos ta deklará e bon notisia di e Reino di Dios?

¹⁷ Despues ku Hesus a resusitá, el a bisa su disipelnan: “Boso lo risibí poder ora spiritu santu bin riba boso, i boso lo ta mi testigunan na Yerusalèm i na henter Hudea i Samaria, i te na e parti mas alehá di mundu.” (Echo. 1:8) E trabou ku a kuminsá e tempu ei ta tuma lugá awe riba un eskala sin presedente. Mas ku shete mion Testigu di Yehova ta deklarando e mensahe di Reino den mas ku 230 pais, i nan ta dediká kasi 1.5 mil mion ora pa aña den e ministerio. Nos tambe ta partisipá ku entusiasmo den e trabou akí ku nunka mas lo ser ripití. Ki emoshonante esei ta!

¹⁸ Meskos ku tabata e kaso den promé siglo, awe tambe, e trabou di prediká ta tuma lugá rònt mundu bou di guia di Dios su spiritu santu. I si nos sigui e guia di spiritu santu, nos lo papia ku “tur frankesa” den nos ministerio. (Echo. 28:31) Pues, laga nos sigui e guia di spiritu santu segun ku nos ta deklará e bon notisia di e Reino di Dios!

[Nota]

Kiko Bo A Siña?

• Dikon nos mester tin kurashi pa papia e palabra di Dios?

• Kiko a yuda e promé disipelnan papia ku kurashi?

• Kon nos por haña kurashi?

• Kon kurashi ta benefisiá nos?

[Preguntanan di Estudio]

[Plachi na página 15]

Kon mayornan por yuda nan yunan haña kurashi?

[Plachi na página 16]

Un orashon breve por yuda bo tuma kurashi pa prediká