Hóben—Fortalesé Bo Deseo pa Sirbi Yehova

“Kòrda, awor, riba bo Magnífiko Kreador den e dianan di bo hubentut.”​—EKL. 12:1, NW.

1. Ki invitashon e muchanan na Israel a haña?

MAS O MÉNOS 3.500 aña pasá, Moisés, e profeta di Yehova, a duna e saserdote- i ansianonan di Israel e siguiente instrukshon: “Reuní e pueblo, hòmber, muhé i mucha, . . .  pa nan tende i siña i teme SEÑOR boso Dios, i perkurá di kumpli ku tur e palabranan di e lei akí.” (Deu. 31:12) Hóben, bo a ripará ken a haña invitashon pa reuní pa adorá Yehova? Hende hòmber, hende muhé i mucha. Sí, asta e muchanan mester a skucha, siña i sigui guia di Yehova.

2. Kon Yehova a mustra interes den hóbennan den e kongregashon kristian di promé siglo?

² Den promé siglo, Yehova a sigui mustra interes den e hóbennan entre su pueblo. Por ehèmpel, el a inspirá apòstel Pablo pa e inkluí instrukshon spesífiko pa hóbennan den algun di e kartanan ku el a manda pa e kongregashonnan. (Lesa Efesionan 6:1 i Kolosensenan 3:20.) Hóbennan kristian ku a apliká e konsehonan ei a haña mas apresio pa nan amoroso Tata selestial i a risibí su bendishon.

3. Kon hóbennan awe ta demostrá ku nan ke sirbi Dios?

³ Kiko di nos tempu? Yehova ta invitá hóbennan awe pa reuní ku su pueblo pa ador’é? Sí! I pa henter e pueblo di Dios ta un goso pa mira kon hopi hóben rònt mundu ta sirbi Dios i ta hasi kaso di e siguiente konseho di Pablo: “Laga nos konsiderá kon pa stimulá otro pa stima i hasi bon obra, i no laga di asistí na nos mes reunionnan, manera ta kustumber di algun, ma enkurashá otro; i muchu mas ainda, ora boso ta mira ku e dia ta yegando serka.” (Heb. 10:​24, 25) Ademas, hopi mucha ta partisipá huntu ku nan mayornan den e trabou di prediká e bon notisia di e Reino di Dios. (Mat. 24:14) I tur aña, míles i míles di hóben ta batisá, demostrando asina nan amor sinsero pa Yehova. I komo disipel di Kristu, nan ta risibí hopi bendishon.​—Mat. 16:24; Mar. 10:​29, 30.

Aseptá e Invitashon Awor!

4. Ki edat un hóben mester tin pa aseptá e invitashon pa sirbi Dios?

⁴ Eklesiastés 12:1 (NW) ta bisa: “Kòrda, awor, riba bo Magnífiko Kreador den e dianan di bo hubentut.” Pero ki edat un hóben mester tin pa e por aseptá e invitashon kaluroso ei pa adorá i sirbi Yehova? Beibel no ta menshoná ningun edat. P’esei no tene bo mes atras, pensando ku bo ta muchu yòn pa obedesé Yehova i sirbié, pasobra edat no ta e kos di mas importante. Pues, nos ta animá bo pa aseptá e invitashon akí sin tarda.

5. Kon mayornan por yuda nan yunan progresá den e bèrdat?

⁵ Hopi di boso a risibí yudansa pa progresá den e bèrdat, sea ta di ámbos mayor òf di un so. Den sierto sentido, boso ta meskos ku Timoteo, kende a biba den promé siglo. For di su infansia, su mama Eunise i su wela Loida a siñ’é e skrituranan santu. (2 Tim. 3:​14, 15) Probablemente, bo mayornan tambe  ta eduká bo den un manera similar: nan ta studia Beibel ku bo, hasi orashon ku bo, hiba bo na e reunionnan di kongregashon i na asambleanan di e pueblo di Dios i ta traha huntu ku bo den sirbishi di vèlt. Asina, nan ta kumpli ku e responsabilidat sumamente importante ku Yehova mes a enkargá nan kuné, esta, di siña bo Su kamindanan. Bo ta apresiá nan amor pa bo i e interes ku nan tin den bo?​—Pro. 23:22.

6. (a) Ki klase di adorashon ta hasi Yehova kontentu? (b) Kiko nos lo konsiderá awor?

⁶ Pero, hóben, segun ku bo ta krese, Yehova ke pa bo mes “komprobá kiko ta e bon i agradabel i perfekto boluntat di Dios,” meskos ku Timoteo a hasi. (Rom. 12:2) Unabes bo hasi esei, lo bo partisipá den aktividatnan di kongregashon—manera asistí i duna komentario na reunionnan, yuda den kongregashon i prediká—no pasobra bo mayornan ke, sino pasobra abo mes ke hasi Dios su boluntat. Si bo sirbi Yehova di buena gana, e ta keda masha kontentu. (Sal. 110:3) Awor, kon bo por demostrá ku bo ke fortalesé bo deseo pa skucha Yehova i sigui su guia? Bo por hasi esei mediante estudio bíbliko, orashon i bon kondukta. Laga nos analisá e tres maneranan importante akí ún pa ún.

Siña Konosé Yehova Komo Persona

7. Ki ehèmpel Hesus a pone komo un studiante di e Skritura, i kiko a kontribuí na esaki?

⁷ E promé manera ku bo por demostrá ku bo ke fortalesé bo deseo pa sirbi Yehova ta di lesa Beibel tur dia. Sí, lesamentu regular di e Palabra di Dios por yuda bo satisfasé bo nesesidat spiritual i atkerí konosementu balioso. (Mat. 5:3, NW) Hesus tabata un bon ehèmpel den esaki. Ora e tabatin 12 aña di edat, su mayornan a hañ’é den e tèmpel, “sintá meimei di e siñadónan, ta skucha nan i ta hasi nan pregunta.” (Luk. 2:​44-46) Pues, for di mucha, Hesus a kultivá un anhelo pa e Skritura i tabata komprond’é bon. Kiko a kontribuí na esei? Sin duda, loke a hunga un ròl importante ta e echo ku su mama, Maria, i su tata di kriansa, Hosé, tabata fiel sirbidó di Dios. I nan a siñ’é tokante Dios for di infansia.​—Mat. 1:​18-20; Luk. 2:​41, 51.

8. (a) Ki ora mayornan mester kuminsá inkulká amor pa e Palabra di Dios den nan yunan? (b) Relatá un eksperensia ku ta konfirmá e balor di entrená yunan for di infansia.

⁸ Awendia ta meskos. Mayornan ku ta teme Dios ta rekonosé e importansia di inkulká amor pa bèrdatnan bíbliko den kurason di nan yunan for di infansia. (Deu. 6:​6-9) Esei ta loke un ruman muhé ku yama Rubi a kuminsá hasi djis despues ku su promé yu hòmber, Joseph, a nase. Tur dia e tabata lesa p’e for di e publikashon Mi Buki di Relato Bíbliko. I segun ku Joseph tabata krese, e tabata yud’é siña vários teksto for di kabes. E entrenamentu akí a benefisiá Joseph? No tin duda. Djis despues ku el a kuminsá papia, e por a konta hopi relato di Beibel ku su mes palabranan. I ora e tabatin sinku aña di edat, el a duna su promé parti den e Skol di Ministerio Teokrátiko.

9. Dikon ta importante pa bo lesa Beibel i meditá riba loke bo ta lesa?

⁹ Hóben, pa bo progresá, bo mester tin e kustumber di lesa Beibel tur dia, i bo mester sigui hasi esei henter bo bida. (Sal. 71:17) Dikon lesamentu di Beibel lo yuda bo progresá? Wèl, tuma nota di loke Hesus a bisa su Tata den orashon: “Esaki ta bida eterno, ku nan por konosé bo, e úniko Dios berdadero.” (Juan 17:3) Sí, segun ku bo ta atkerí mas konosementu di Yehova, e ta bira un Persona mas real pa bo, i bo amor p’e ta bira mas fuerte. (Heb. 11:27) P’esei, kada biaha ku bo lesa un porshon di Beibel, usa e oportunidat ei pa siña mas tokante Yehova. Puntra bo mes: ‘Kiko e relato akí ta siña mi di Yehova komo Persona? Kon e pasashi di Beibel akí ta mustra ku Dios ta stima mi i ta interesá den mi?’ Si bo ta tuma tempu pa meditá  riba preguntanan asina, lo bo haña sa kon Yehova ta pensa i sinti i kiko e ta rekerí di bo. (Lesa Proverbionan 2:​1-5.) I meskos ku e hóben Timoteo, lo bo “keda konvensí” di loke bo ta siña for di e Skritura, i lo bo ser motivá pa adorá Yehova di henter bo kurason.​—2 Tim. 3:14.

Kon Orashon Ta Fortalesé Bo Amor pa Yehova?

10, 11. Kon orashon ta yuda bo fortalesé bo deseo pa sirbi Dios?

¹⁰ E di dos manera ku bo por fortalesé bo deseo pa sirbi Yehova di henter bo kurason ta mediante orashon. Na Salmo 65:2, nos ta lesa: “Abo ku ta skucha orashon, serka bo tur hende ta bin.” Asta tempu ku Israel tabata e pueblo ku Dios tabatin un pakto kuné, stranheronan tambe por a bini na e tèmpel di Yehova i aserk’é den orashon. (1 Rei. 8:​41, 42) Pues, Dios no ta hasi distinshon di persona. P’esei, tur hende ku ta kumpli ku su mandamentunan por tin e siguransa ku lo e skucha nan. (Pro. 15:8) I no tin duda, ora e salmista a menshoná “tur hende,” el a referí na abo ku ta hóben tambe.

¹¹ Bo sa ku e base pa un amistat berdadero ta bon komunikashon. P’esei, probablemente, bo ta gusta kompartí bo pensamentu-, preokupashon- i sintimentunan ku un bon amigu. Di mes manera, mediante orashon sinsero, bo por komuniká ku bo Gran Kreador. (Fil. 4:​6, 7) Ora bo ta papia ku Yehova, deshogá bo kurason manera lo bo hasi serka un mayor amoroso òf un bon amigu. De echo, e manera ku bo ta hasi orashon ta revelá loke bo ta sinti pa Yehova. Segun ku bo amistat ku Yehova ta bira mas íntimo, lo bo ripará ku bo orashonnan ta bira mas signifikativo.

12. (a) Kiko un orashon signifikativo ta enserá? (b) Kiko lo yuda bo realisá ku Yehova ta serka bo?

¹² Kòrda sí ku no ta palabra so ta hasi bo orashon signifikativo; bo tin ku ekspresá bo sintimentunan di mas profundo tambe. Pues, ora bo ta hasi orashon, ekspresá e gran konfiansa ku bo tin den Yehova, bo amor i bo rèspèt profundo p’e. I segun ku bo ta ripará kon Yehova ta kontestá bo orashonnan, lo bo eksperensiá personalmente, mas ku nunka promé, ku e “ta serka di tur esnan ku ta sklama na dje.” (Sal. 145:18) Sí, Yehova lo hala serka bo i duna bo e forsa nesesario pa bo por resistí e Diabel i tuma desishonnan korekto den bida.​—Lesa Santiago 4:​7 i 8.

13. (a) Kon amistat ku Dios a yuda un ruman muhé? (b) Kon amistat ku Dios ta yuda bo trata ku preshon di pareunan?

¹³ Konsiderá e ehèmpel di Cherie, kende su bon relashon ku Yehova a dun’é fortalesa. Na skol sekundario, el a gana vários premio pasobra e tabata sobresalí tantu den su vaknan komo den deporte. Ora el a kaba skol, nan a ofresé un beka pa sigui un estudio avansá. Cherie a bisa: “E oferta tabata atraktivo, i mi entrenadó- i kompañeronan di skol tabata pone masha preshon riba mi pa mi asept’é.” Sinembargo, Cherie a realisá ku si e  sigui un estudio avansá, e tin ku dediká mayoria di su tempu na estudio i tambe na preparashon pa eventonan deportivo, i esakinan lo lag’é ku masha tiki tempu pa sirbi Yehova. Kiko Cherie a hasi? El a bisa: “Despues di a hasi orashon na Yehova, mi a nenga e beka i a kuminsá sirbi komo pionero regular.” Ora e tabatin sinku aña ta sirbi komo pionero, el a bisa: “Mi no tin niun tiki duele di loke mi a hasi. Sabiendo ku mi a tuma un desishon ku ta hasi Yehova kontentu ta hasi mi felis. Si realmente bo pone e Reino di Dios na promé lugá den bo bida, tur otro kos lo ser agregá na bo.”​—Mat. 6:33.

Bon Kondukta Ta Demostrá Ku Bo ‘Kurason Ta Puru’

14. Dikon bo bon kondukta ta importante pa Yehova?

¹⁴ E di tres manera ku bo por demostrá ku bo ta sirbi Yehova di henter bo kurason ta mediante bon kondukta. Yehova ta bendishoná hóbennan ku ta keda moralmente limpi. (Lesa Salmo 24:​3-5.) E hóben Samuel a nenga di imitá e kondukta inmoral di e yu hòmbernan di Sumo Saserdote Elí. I otro personanan a tuma nota di Samuel su ekselente kondukta, pasobra Beibel ta bisa: “Awor e mucha hòmber Samuel tabata krese den estatura i den grasia, tantu serka Señor komo serka hende.”​—1 Sam. 2:26.

15. Menshoná algun motibu pakiko bo ta desplegá un bon kondukta.

¹⁵ Nos ta biba den un mundu yen di hende arogante, desobediente na mayornan, ingrato, desleal, grosero, sobèrbè, ku ta stima nan mes mas ku tur kos i ku ta stima plaser en bes di Dios. Anto eseinan ta djis algun di e karakterístikanan ku apòstel Pablo a menshoná. (2 Tim. 3:​1-5) Pues, nos ta komprondé ku por ta un desafio pa hóbennan desplegá un kondukta ehemplar den e ambiente yen di maldat akí. Sinembargo, kada bes ku bo hasi loke ta bon i evitá di hasi loke ta malu, bo ta demostrá ku bo a skohe e banda di Yehova den e kuestion di soberania universal. (Jòb 2:​3, 4) Ademas, bo por tin e satisfakshon ku bo a aseptá e kaluroso invitashon akí di Yehova: “Sea sabí, mi yu, i hasi mi kurason kontentu, pa mi por kontestá esun ku reprochá mi.” (Pro. 27:11) Es mas, sabiendo ku bo tin Yehova su aprobashon, esaki ta fortalesé bo deseo pa sirbié.

16. Kon un ruman muhé a hasi Yehova su kurason kontentu?

¹⁶ Komo tiner, un ruman muhé kristian ku yama Carol a sigui prinsipionan bíbliko tempu e tabata bai skol. I su bon kondukta a hala atenshon di otronan. Kon asina? Debí na Carol su konsenshi bíblikamente entrená, e no tabata partisipá den selebrashon di dianan di fiesta ni den seremonianan patriótiko, i su kompañeronan di klas tabata tent’é. Na algun di e okashonnan ei, el a haña chèns di splika su kreensianan. Despues di hopi aña, Carol a risibí un karchi di un eks-kompañero di klas, kende a skirbi: “Semper mi a deseá di tuma kontakto ku bo pa mi gradisí bo. Bo bon kondukta i ehèmpel komo un hóben kristian i bo kurashi pa para firme i no selebrá dianan di fiesta a hala mi atenshon. Bo ta e promé Testigu di Yehova ku mi a konosé.” Carol su ehèmpel a hasi asina un impreshon riba su kompañero di klas ku e tambe a kuminsá studia Beibel despues. Den su karchi,  el a bisa Carol ku e tin mas ku 40 aña batisá komo Testigu di Yehova. Hóben, si bo desplegá kurashi i sigui prinsipionan bíbliko meskos ku Carol a hasi, abo tambe por motivá hende di kurason sinsero pa siña konosé Yehova.

Hóbennan Ku Ta Alabá Yehova

17, 18. (a) Kiko bo ta pensa di e hóbennan den bo kongregashon? (b) Ki futuro ta spera hóbennan ku ta teme Dios?

¹⁷ Pa nos tur ku ta den e organisashon mundial di Yehova ta un plaser pa mira e míles i míles di hóbennan zeloso ku ta partisipá den adorashon berdadero. E hóbennan akí ta fortalesé nan deseo pa adorá Yehova mediante lesamentu diario di Beibel, orashon i un kondukta ku ta na armonia ku Dios su boluntat. Hóbennan ehemplar asina ta un fuente di refreskamentu pa nan mayornan i pa henter e pueblo di Yehova.​—Pro. 23:​24, 25.

¹⁸ Den futuro, e hóbennan fiel akí lo ta entre esnan ku lo sobrebibí i drenta e mundu nobo ku Dios a primintí. (Rev. 7:​9, 14) E tempu ei, nan lo disfrutá di hopi bendishon segun ku nan apresio pa Yehova ta sigui oumentá, i nan lo por alab’é pa semper.​—Sal. 148:​12, 13.

Bo Por Splika?

• Kon hóbennan por partisipá den adorashon berdadero awe?

• Dikon meditashon ta esensial pa bo por benefisiá di lesamentu di Beibel?

• Kon orashon ta yuda bo hala serka Yehova?

• Kiko un kristian ta demostrá ku su bon kondukta, i ki benefisio esei ta trese kuné?

[Preguntanan di Estudio]

[Plachi na página 16]

Bo tin kustumber di lesa Beibel tur dia?