Ora nan a puntra Hesus kua ta e mandamentu di mas grandi, el a kontestá: “Stima SEÑOR bo Dios ku henter bo kurason, i ku henter bo alma, i ku henter bo mente.” (Mateo 22:37) Pero promé ku hende por stima Dios, nan mester haña un konosementu eksakto di Dios. (Juan 17:3) Tur hende lo tin e mesun oportunidat pa siña konosé Dios?

Beibel ta e fuente prinsipal di konosementu di Dios. (2 Timoteo 3:16) Hopi hende ta biba den komunidatnan kaminda bo por haña un Beibel fásilmente. E mesun personanan ei tambe kisas ta risibí regularmente e invitashon pa aseptá un estudio personal di Beibel pa nan por haña konosementu eksakto di Dios. (Mateo 28:19) Tin di nan ta muchanan ku ta ser kriá pa mayornan kristian ku ta stima nan i ku diariamente ta duna nan e oportunidat pa siña tokante Dios.​—Deuteronomio 6:​6, 7; Efesionan 6:4.

Sinembargo, tin otro hende ta biba den sirkunstansianan ménos faborabel. Kisas nan ta bini di famianan kaminda mayornan ta maltratá yu i no ta mustra amor na nan. (2 Timoteo 3:​1-5) Hende ku lanta den un ambiente asina kisas lo tin problema pa mira Dios komo un Tata amoroso. Ademas, tin hopi hende ku no a haña chèns di risibí un bon edukashon, lokual ta stroba nan di lesa Beibel. Tambe tin otronan ku nan mente ta siegá pa religion falsu, òf nan ta biba den un famia, un komunidat òf un pais kaminda otro hende no tin mag di siña nan e bèrdatnan di Beibel. (2 Korintionan 4:4) Akaso e sirkunstansianan di e personanan ei ta pone ku nan lo no haña e oportunidat di siña tokante Dios i stim’é?

Hesus a rekonosé ku pa motibu di e difikultatnan ku algun hende ta konfrontá lo no ta fásil pa nan siña stima Dios i obedes’é. (Mateo 19:​23, 24) Ma el rekordá su disipelnan ku apesar ku algun opstákulo por parse insuperabel pa hende, “serka Dios tur kos ta posibel.”​—Mateo 19:​25, 26.

Konsiderá e siguiente datonan: Yehova Dios a sòru pa su Palabra, Beibel, ta e buki mas plamá di tur tempu. Beibel a profetisá ku e bon notisia tokante Dios i su propósito pa e tera lo ser prediká den “henter mundu.” (Mateo 24:14) Awe, Testigunan di Yehova ta prediká e bon notisia ei den mas ku 230 pais i ta produsí literatura basá riba Beibel na mas o ménos 500 idioma. Asta hende ku no por haña un Beibel por siña hopi kos tokante e Dios berdadero si nan opservá e kosnan ku el a traha.​—Romanonan 1:20.

Ademas, e Palabra di Dios ta bisa ku Yehova “ta skudriñá tur kurason i ta komprondé tur intenshon di e pensamentunan. Si bo busk’é, e lo laga bo hañ’é.” (1 Krónikanan 28:9) Pues, ounke Yehova no ta primintí ku tur hende lo haña eksaktamente e mesun oportunidat, e ta sòru sí pa tur hende di kurason onrado haña un oportunidat. Lo e asta hasi sigur ku e hendenan ku nunka no a haña chèns di siña tokante dje risibí e oportunidat ei pa medio di resurekshon den un mundu nobo di hustisia.​—Echonan 24:15.