Bo Tabata Sa?

Dikon e buki di 1 Korintionan ta papia di karni sakrifiká na ídolonan?

▪ Apòstel Pablo a skirbi: “Kome tur loke ta wòrdu bendí na marshe-di-karni, sin hasi pregunta pa motibu di konsenshi.” (1 Korintionan 10:25) Di unda e karni ei a bini?

Sakrifisio di bestia a forma un parti hopi importante di e seremonia ku tabata tuma lugá den e tèmpelnan griego i romano. Pero no ta tur e karni di bestianan sakrifiká nan tabata kome durante e seremonia. E karni ku a sobra nan a hiba marshe di karni pa bende. E buki Idol Meat in Corinth ta bisa: ‘Tabatin bes ku nan a yama esnan ku tabata efektuá e seremonia religioso akí kòki i/òf karnisero. E personanan akí tabata bende den e marshe un parti di e porshon di karni ku nan a risibí komo pago pa mata bestia pa sakrifisio.’

Pues, no ta tur e karni ku hende por a kumpra na marshe tabata karni ku a sobra di seremonianan religioso. Ora arkeólogonan a koba na un marshe di karni (latin, macellum) di Pompei, nan a topa skelètnan kompletu di karné. E eksperto riba tereno di Beibel, Henry J. Cadbury a bisa ku esaki ta indiká ku “na macellum a bende bestia bibu òf matá. Tambe nan a bende karni sakrifiká òf karni kla kòrta ku a bin for di tèmpel.”

Pablo su punto tabata ku maske kristiannan no a partisipá den adorashon pagano, riba su mes karni sakrifiká den tèmpel no a ser kontaminá.

Kon bin den tempu di Hesus tabatin tenshon entre hudiu i samaritano?

▪ Juan 4:9 ta bisa ku “hudiu no tin nada di haber ku samaritano.” E separashon akí probablemente a kuminsá den tempu ku Jeroboam a establesé adorashon di imágen den e reino di nort di dies tribu di Israel. (1 Reinan 12:​26-30) E samaritanonan tabata di Samaria, e kapital di e reino di nort. Ora e asirionan a konkistá e reino di dies tribu na aña 740 promé ku nos era, e konkistadónan a laga stranheronan pagano establesé nan mes den Samaria. Ora ku e stranheronan akí a kuminsá kasa ku e hendenan lokal, e adorashon di e samaritanonan a bira mas kontaminá.

Siglonan despues, ora ku hudiunan a bolbe for di eksilio na Babilonia i kier a purba reedifiká Yehova su tèmpel i e murayanan di Yerusalèm, e samaritanonan a oponé nan. (Esdras 4:​1-23; Nehemias 4:​1-8) Rivalidat religioso a intensifiká ora ku e samaritanonan a konstruí nan propio tèmpel riba Seru Gerizim, probablemente den siglo 4 promé ku nos era.

Den tempu di Hesus, e promé kos ku tabata bini na hende su mente ora nan tende e palabra “samaritano” tabata religion i no sitio geográfiko. E palabra akí tabata referí na e miembronan di e sekta ku tabata kresiendo den Samaria. E samaritanonan ainda tabata adorá riba Seru Gerizim, i e hudiunan no tabata respetá ni apresiá nan.​—Juan 4:​20-22; 8:48.

[Plachi na página 12]

Tayó di serámika ku ta mustra sakrifisio di animal, siglo 6 promé ku nos era

[Credit line

Musée du Louvre, Paris

[Plachi na página 12]

JEROBOAM A ESTABLESÉ ADORASHON DI IMÁGEN