Hala Serka Dios

Esun “Ku Ta Skucha Orashon”

1 KRÓNIKANAN 4:​9, 10

YEHOVA DIOS realmente ta kontestá orashon sinsero di su sirbidónan deboto? Un relato den Beibel tokante un hòmber no masha konosí ku yama Jabes ta mustra ku en bèrdat Yehova ta Esun “ku ta skucha orashon.” (Salmo 65:2) E relato breve akí ta den un parti di Beibel kaminda ménos bo ta ferwagt di hañ’é, esta, meimei di e listanan di nòmber di famia ku e buki di Promé Krónikanan ta habri kuné. Laga nos analisá 1 Krónikanan 4:​9 i 10.

Tur loke nos sa tokante Jabes ta den e dos versíkulonan akí. Segun versíkulo 9, su mama “a yam’é Jabes, bisando: ‘Pasobra ta ku doló mi a hañ’é.’” * Dikon su mama a skohe e nòmber ei? Akaso el a pasa hopi mas doló ku normal ora di duna lus na e yu akí? Òf kisas el a bira biuda i tabata lamentá ku su kasá no tabat’ei pa risibí nan yu na mundu? Beibel no ta bisa. Pero un dia e mama akí lo a haña motibu pa ta masha orguyoso di e yu akí. E rumannan di Jabes tal bes tabata hende rekto, ma “Jabes tabata mas onorabel ku su ruman hòmbernan.”

Jabes tabata un hòmber di orashon. El a kuminsá su orashon rogando Dios pa bendishon’é. Despues el a hasi tres petishon ku ta demostrá ku su fe tabata grandi.

Di promé, Jabes a supliká Dios: “Hasi mi teritorio mas grandi.” (Versíkulo 10) E hòmber onorabel akí no tabata haragan pa mas tereno, kudishando loke tabata pertenesé na su próhimo. Su petishon sinsero kisas tabatin mas di haber ku hende ku e tabatin di haber ku tereno. Loke kisas e tabata pidi Dios ta pa ekspandé su teritorio na un manera pasífiko pa esaki por a akomodá mas hende ku ta adorá e Dios berdadero. *

Di dos, Jabes a supliká Dios pa Su “man” ta kuné. E man simbóliko di Dios ta su poder den akshon ku e ta usa pa yuda hende ku ta ador’é. (1 Krónikanan 29:12) Jabes a akudí na Yehova pa e por a risibí e petishonnan di su kurason, sabiendo ku e man di Dios no ta kòrtiku pa yuda esnan ku ta mustra fe den dje.​—Isaias 59:1.

Di tres, Jabes a pidi den orashon: “Warda mi di malu, pa pena no toka mi!,” òf segun e Tradukshon di Mundu Nobo, “pa [malu] no hasi mi daño.” Esei ta indiká ku kisas Jabes no tabata pidi pa skapa di kalamidat, sino pa Dios no laga e efektonan di maldat vens’é òf pon’é pena.

E orashon di Jabes a revelá su gran interes den adorashon berdadero i tambe su fe i konfiansa den Yehova, Esun ku ta skucha orashon. Kon Yehova a reakshoná? E relato breve akí ta terminá ku e palabranan: “I Dios a dun’é loke ku el a pidi.”

Yehova, Esun ku ta skucha orashon, no a kambia. E ta keda hopi kontentu ku orashon di su sirbidónan. Esnan ku pone nan fe i konfiansa den dje por ta sigur di lo siguiente: “Si nos pidi kualke kos konforme su boluntat, e ta tende nos.”​—1 Juan 5:14.

[Nota]