Hóben​—Sigui e Guia di e Palabra di Dios

“Atkerí sabiduria! Atkerí komprondementu!”​—PRO. 4:5.

1, 2. (a) Kiko a yuda apòstel Pablo trata ku konflikto interno? (b) Kon bo por atkerí sabiduria i komprondementu?

“ORA mi ta deseá di hasi loke ta bon, maldat ta presente den mi.” Hóben, bo sa ken a bisa e palabranan ei? Sí, apòstel Pablo. Maske Pablo tabata stima Yehova, vários biaha e tabatin un lucha pa hasi loke ta bon. Kon e konflikto interno akí a lag’é sinti? El a skirbi: “Hende miserabel ku mi ta!” (Rom. 7:​21-24) Bo por komprondé kon Pablo a sintié? Bo tambe ta haña ku tin ora ta difísil pa hasi loke ta bon? Esei ta molestiá bo meskos ku tabata e kaso ku Pablo? Si ta asina, no desanimá. Pablo a vense e desafionan ku el a konfrontá, i abo tambe por.

² Pablo tabatin éksito pasobra el a sigui e guia di “palabranan sano.” (2 Tim. 1:​13, 14) Debí na esei, el a haña e sabiduria i komprondementu nesesario pa trata ku desafio i tuma desishon korekto. Pues, Yehova por yuda abo tambe haña sabiduria i komprondementu. (Pro. 4:5) Den su Palabra, Beibel, bo ta haña e mihó konseho ku tin. (Lesa 2 Timoteo 3:​16 i 17.) P’esei, laga nos konsiderá kon prinsipionan bíbliko por yuda bo ora bo ta trata ku bo mayornan, usa plaka, i ora bo ta bo so.

Sigui e Guia di e Palabra di Dios den Famia

3, 4. (a) Dikon bo por sinti ku ta difísil pa kumpli ku e reglanan di bo mayornan? (b) Dikon mayornan ta pone regla?

³ Bo ta haña ku ta difísil pa kumpli ku e reglanan di bo mayornan? Si esei ta e kaso, kiko por ta e motibu? Kisas bo ke tin mas libertat? Esaki ta un deseo normal pa un persona ku ta birando adulto. Pero miéntras bo ta den kas di bo mayornan, bo tin ku obedesé nan.​—Efe. 6:​1-3.

⁴ Si bo ta komprondé dikon bo mayornan ta pone regla, ta mas fásil pa bo kumpli ku nan. Ta sierto ku de bes en kuando bo por sinti meskos ku Beatriz * di 18 aña, kende a bisa relashoná ku su mayornan: “Nan a lubidá ku nan tambe tabata hóben. Nan no gusta pa mi duna mi opinion ni tuma mi mes desishonnan; nan no ke aseptá ku mi a bira grandi.” Kisas meskos ku Beatriz, bo ta haña ku bo mayornan mester duna bo mas libertat. Sinembargo, e motibu prinsipal pakiko bo mayornan ta pone regla ta pasobra nan ta stima bo. Ademas, mayornan kristian sa ku nan tin ku duna kuenta na Yehova pa e manera ku nan ta perkurá pa bo.​—1 Tim. 5:8.

5. Kon obedensia na bo mayornan ta benefisiá bo?

⁵ Suponé ku bo tin un debe na banko. Si bo ta kumpli ku bo pagonan manera mester ta, bo ta gana konfiansa di e banko. I otro biaha, nan lo ta kla pa fia bo asta mas. Di igual manera, bo tin un debe serka bo mayornan; bo debe nan obedensia i rèspèt. (Lesa Proverbionan 1:8.) Mas obediente bo ta, mas libertat nan lo por duna bo. (Luk. 16:10) Ma si konstantemente bo ta keda sin kumpli ku regla di bo mayornan, no keda sorprendí si nan redusí òf asta kita bo libertat.

6. Kon mayornan por yuda nan yunan pa ta obediente?

 ⁶ Un manera ku mayornan por yuda nan yunan obedesé nan reglanan ta mediante nan ehèmpel. Nan obedensia di buena gana na Yehova su rekisitonan ta demostrá ku Dios su reglanan ta rasonabel. Esei lo yuda e yunan komprondé ku e reglanan ku nan mayornan ta pone tambe ta rasonabel. (1 Juan 5:3) Ademas, Beibel ta menshoná vários okashon ku Yehova a duna su sirbidónan oportunidat di ekspresá nan opinion relashoná ku sierto asuntunan. (Gén. 18:​22-32; 1 Rei. 22:​19-22) Pues, mayornan tambe por permití nan yunan duna nan opinion riba sierto tópikonan.

7, 8. (a) Ki desafio algun hóben ta konfrontá? (b) Kiko bo tin ku komprondé pa bo por benefisiá di disiplina?

⁷ Kisas hóbennan tin ku trata ku loke nan ta konsiderá krítika inhustu di nan mayornan. P’esei tin biaha, bo por sinti meskos ku e hóben Craig, kende a bisa: “Mi mama tabata blo kana mi tras manera polis pa wak si mi a hasi algu robes.”

⁸ Hopi biaha, ora nos haña korekshon òf disiplina, nos ta konsiderá esaki komo un krítika. I Beibel ta mustra ku asta ora e disiplina akí ta kompletamente hustu, e ta difísil pa aseptá. (Heb. 12:11) Kiko por yuda bo benefisiá di disiplina? Ta importante pa bo kòrda ku bo mayornan ta disipliná bo pasobra nan ta stima bo. (Pro. 3:12) Nan ke evitá ku bo ta desaroyá mal kustumber i ke yuda bo kultivá bon kustumber. Probablemente, bo mayornan ta realisá ku si nan no korigí bo ta komo si fuera nan ta odia bo. (Lesa Proverbionan 13:24.) Ademas, bo tin ku komprondé ku hende ta hasi fout den bida segun ku nan ta siña. P’esei, ora bo ta haña disiplina òf korekshon, pakiko no buska e sabiduria ku tin tras di dje? “Pasobra probecho di [sabiduria] ta mihó ku probecho di plata, i su ganashi mas ku oro fini.”​—Pro. 3:​13, 14.

9. Kiko hóbennan por hasi en bes di sigui pensa riba loke ta parse un inhustisia?

⁹ Mayornan tambe ta faya. (Sant. 3:2) P’esei, tin biaha nan por papia sin pensa ora nan ta disipliná bo. (Pro. 12:18) Kiko por pone nan aktua di e manera ei? Kisas nan tin strès òf nan ta kulpa nan mes pa e erornan ku abo a kometé. P’esei, en bes di sigui pensa riba loke abo ta konsiderá un inhustisia, ta bon pa bo mustra apresio sinsero pa e echo ku nan ke yuda bo. Sí, ta bon pa bo siña aseptá disiplina for di awor pasobra esei lo yuda bo ora bo bira grandi.

10. Kiko bo tin ku hasi pa ta mas fásil pa bo aseptá i benefisiá di e disiplina i reglanan di bo mayornan?

¹⁰ Hóben, kiko bo tin ku hasi pa ta mas fásil pa bo aseptá i benefisiá di e disiplina i reglanan di bo mayornan? Bo tin ku mehorá bo manera di komuniká. Kon bo por hasi esei? Di promé, bo tin ku skucha. Beibel ta bisa ku nos mester ta “lihé pa tende, no lihé pa papia i no lihé pa rabia.” (Sant. 1:19) En bes di ta lihé pa hustifiká bo mes, trata di kontrolá bo emoshonnan i skucha bo mayornan. Konsentrá riba loke nan ta bisa i no riba e manera ku nan ta papia ku bo. Kaba, na un manera respetuoso, atmití bo eror i mustra ku bo a komprondé loke nan a bisa. Pero kiko si bo ke splika pakiko bo a bisa òf hasi algu ku nan no a gusta? Den mayoria di kaso, ta sabí pa ‘frena bo lepnan’ te ora ku bo a kumpli ku deseo di bo mayornan. (Pro. 10:19) Ora bo mayornan mira ku bo ta presta atenshon i ta obedesé nan, nan ta mas inkliná pa skucha bo. E manera di aktua madurá ei ta mustra ku bo ta sigui e guia di e Palabra di Dios.

 Sigui e Guia di e Palabra di Dios ora di Usa Plaka

11, 12. (a) Kiko e Palabra di Dios ta urgi nos relashoná ku plaka, i dikon? (b) Kon bo mayornan por yuda bo manehá plaka?

¹¹ Den e mesun versíkulo ku Beibel ta bisa ku “plaka ta protekshon,” e ta mustra ku sabiduria ta asta mas balioso ku plaka. (Ekl. 7:12) E Palabra di Dios ta urgi nos pa nos tin un punto di bista korekto di plaka i pa no stima plaka. Dikon nos no mester kultivá amor pa plaka? Konsiderá e ilustrashon akí: Un kuchú skèrpi den man di un kòki kapas por ta algu masha útil. Pero den man di un persona ku no ta paga tinu òf ku ta negligente, e mesun kuchú ei por kousa daño serio. Di mes manera, plaka por ta útil basta bo us’é bon. Ma esnan ku “kier bira riku,” hopi bes ta sakrifiká nan amistatnan, famianan i asta nan relashon ku Dios. I komo resultado di esei, nan ta hinka nan mes “ku hopi doló.”​—Lesa 1 Timoteo 6:​9 i 10.

¹² Kon bo por siña usa plaka na un manera sabí? Bo por pidi bo mayornan yuda bo traha un presupuesto. Salomon a skirbi: “Un hende sabí lo tende i lo oumentá su konosementu, i un hende di komprondementu lo atkerí bon konseho.” (Pro. 1:5) Un hóben ku yama Anna a pidi su mayornan yudansa. El a bisa: “Mi tata a siña mi traha presupuesto i a laga mi mira e importansia di manehá mi plaka na un manera sabí.” Anna su mama tambe a siñ’é algun kos práktiko. Anna a bisa: “El a siña mi ku mi mester kompará preis promé ku mi kumpra algu.” Kon esaki a benefisiá Anna? El a kontestá: “Awor mi por manehá mi plaka bon. Mi ta wak bon kon mi ta gasta mi plaka, p’esei, mi no tin debe innesesario. Asina, mi ta biba trankil.”

13. Kon bo por dominá bo mes ora di gasta plaka?

¹³ Si bo ta kumpra kos pa loko òf ta gasta plaka djis pa impreshoná bo amigunan, bo por haña bo den debe masha lihé. Kiko por yuda bo evitá e trampanan akí? Dominio propio. Ellena, kende tabatin 21 aña, tambe a siña dominá su mes. El a bisa: “Ora mi ta sali ku mi amiganan, di antemano mi ta stipulá kuantu plaka mi ke gasta. . . . Ademas, mi a ripará ku ta bon pa bai hasi kompra ku amiganan ku ta wak bon kon nan ta usa nan plaka i ku ta animá mi pa kompará preis i no kore kumpra e promé kos ku mi mira.”

14. Dikon nos tin ku tene kuidou ku e “engaño di rikesa”?

¹⁴ Ounke bo mester di plaka i sa kon pa us’é, kòrda sí ku Hesus a bisa ku ta esnan ku ta “konsiente di nan nesesidat spiritual” ta berdaderamente felis. (Mat. 5:3, NW) El a spièrta nos ku e “engaño di rikesa” por stroba hende di perkurá pa nan nesesidat spiritual. (Mar. 4:19) Pues ta masha importante pa bo sigui e guia di e Palabra di Dios i mantené un punto di bista balansá di plaka.

Sigui e Guia di e Palabra di Dios ora Bo Ta Bo So

15. Ki ora ta mas difísil pa bo keda leal na Dios?

¹⁵ Ki ora bo ta kere ku ta mas difísil pa keda leal na Dios? Ora bo ta huntu ku otro  hende òf ora bo ta bo so? Wèl, ora bo ta na skol òf na trabou, bo ta mas alerta pa no hasi nada pa daña bo relashon ku Dios. Pero ta ora bo ta bo so i ta relahá, bo tin mas chèns di violá bo prinsipionan moral.

16. Dikon bo tin ku obedesé Yehova asta ora bo ta bo so?

¹⁶ Dikon bo tin ku obedesé Yehova asta ora bo ta bo so? Kòrda: Bo por hasi Yehova su kurason tristu òf kontentu. (Gén. 6:​5, 6; Pro. 27:11) Loke bo ta hasi tin efekto riba Yehova pasobra ‘e ta interesá den bo.’ (1 Ped. 5:7, NW) E ke pa bo presta atenshon na su mandamentunan pa bo prosperá. (Isa. 48:​17, 18) Ora algun sirbidó di Yehova den Israel di antigwedat a ignorá su konsehonan, nan a hasié tristu. (Sal. 78:​40, 41) Di otro banda, Yehova tabata stima profeta Daniel, i un angel a yam’é un “hòmber masha stimá.” (Dan. 10:11) Dikon? Pasobra Daniel a keda leal na Dios tantu den públiko komo den privá.​—Lesa Daniel 6:10.

17. Ki preguntanan bo por hasi bo mes ora di skohe entretenimentu?

¹⁷ Pa bo keda leal na Dios ora bo ta bo so, bo tin ku ‘entrená bo mente pa bo por diserní loke ta bon i loke malu.’ Kaba, bo tin ku ‘praktiká,’ òf hasi loke bo sa ku ta bon. (Heb. 5:14) Por ehèmpel, ora di skohe muzik, pelíkula òf site di Internet, e siguiente preguntanan por yuda bo skohe loke ta bon i evitá loke ta malu. Puntra bo mes: ‘Loke mi ta skohe lo animá mi pa ta kompasivo òf lo e laga mi “gosa di mira kalamidat” di otro hende?’ (Pro. 17:5) ‘Lo e yuda mi stima loke ta bon i “odia maldat”?’ (Amos 5:15) Loke bo ta hasi ora bo ta bo so ta revelá kiko realmente tin den bo kurason.​—Luk. 6:45.

18. Ki akshon bo tin ku tuma si den sekreto bo ta hasiendo loke bo sa ku ta malu, i dikon?

¹⁸ Ki akshon bo tin ku tuma si den sekreto bo ta hasiendo loke bo sa ku ta malu? Kòrda, “esun ku skonde su pikánan lo no prosperá, ma esun ku konfesá i laga nan lo haña miserikòrdia.” (Pro. 28:13) Lo no ta sabí pa sigui hasi loke ta malu i “hasi spiritu santu di Dios tristu.” (Efe. 4:30) Bo tin ku konfesá bo piká. Esei ta un obligashon ku bo tin ku Dios, ku bo mayornan i ku bo mes. Den un kaso asina, “e ansianonan” di kongregashon por ta di gran yudansa. Disipel Santiago a bisa: “Laga nan hasi orashon [pa esun ku a hasi malu], huntando é ku zeta den e nòmber di Señor [Yehova]; i e orashon hasí den fe lo restorá esun ku ta malu, i Señor [Yehova] lo lant’é, i si el a kometé piká, e lo wòrdu pordoná.” (Sant. 5:​14, 15) Ta bèrdat ku esaki por trese un poko bèrgwensa i konsekuensianan desagradabel. Pero si bo tuma kurashi i pidi yudansa, lo bo spar bo mes di mas daño i lo bo haña e alivio ku un konsenshi limpi ta trese kuné.​—Sal. 32:​1-5.

 Hasi Yehova Su Kurason Kontentu

19, 20. Kiko ta Yehova su deseo pa bo, i kiko abo tin ku hasi?

¹⁹ Yehova ta “e Dios felis,” i ke pa abo tambe ta felis. (1 Tim. 1:11, NW) E ta masha interesá den bo. Yehova ta mira bo esfuerso pa hasi loke ta bon asta si otro hende no ta mira esei. Nada no ta skondí pa Yehova. E ta wak bo, no pa buska fout, sino pa yuda bo hasi loke ta bon. Sí, Dios su ‘wowo ta move bai bin dor di henter tera, pa e por sostené fuertemente esnan ku nan kurason ta kompletamente di dje.’​—2 Kró. 16:9.

²⁰ P’esei, semper sigui e guia di e Palabra di Dios. Asina, lo bo haña e sabiduria i komprondementu nesesario pa trata ku problema i pa tuma desishonnan difísil. Di e manera ei, lo bo agradá bo mayornan i Yehova i lo bo disfrutá di un bida realmente felis.

[Nota]

Kon Lo Bo Kontestá?

• Kiko hóbennan tin ku hasi pa nan por aseptá i benefisiá di e disiplina i reglanan di nan mayornan?

• Dikon ta importante pa nos tin un punto di bista balansá di plaka?

• Kon bo por keda leal na Yehova asta ora bo ta bo so?

[Preguntanan di Estudio]

[Plachi na página 13]

Lo bo keda leal na Dios ora bo ta bo so?