“Laga nos ta alerta i sobrio.”​—1 TES. 5:6.

1, 2. Kiko un famia tin ku hasi si nan ke keda alerta den sentido spiritual?

REFERIENDO na ‘e dia grandi i temibel di Yehova,’ apòstel Pablo a skirbi e kristiannan na Tesalónika: “Rumannan, [boso] no ta den skuridat, ku e dia ei lo a sorprendé boso manera un ladron; pasobra boso tur ta yunan di lus i yunan di dia. Nos no ta di anochi ni di skuridat; asina anto, no laga nos drumi manera otronan ta hasi, ma laga nos ta alerta i sobrio.”​—Joel 2:31; 1 Tes. 5:​4-6.

² E konseho ku Pablo a duna e rumannan di Tesalónika ta masha apropiá pa kristiannan ku ta biba den ‘tempu di fin.’ (Dan. 12:4) Dikon? Pasobra segun ku su sistema malbado ta yegando su fin, Satanas ta mas determiná ku nunka pa kita adoradónan berdadero di sirbi Dios. P’esei, ta sabí pa nos tuma na serio Pablo su konseho pa keda alerta den sentido spiritual. Si un famia kristian ke keda alerta, kada miembro di e famia mester kumpli ku e papel ku Yehova a duna nan. Pues, ki papel esposo-, esposa- i yunan ta hunga den yuda nan famia keda “alerta”?

Esposonan​—Imitá “e Bon Wardador”

3. Segun 1 Timoteo 5:8, kiko e responsabilidat di e hòmber komo kabes di famia ta enserá?

³ Beibel ta bisa: “E hòmber ta e kabes di e muhé.” (1 Kor. 11:3) Kiko e responsabilidat di e hòmber komo kabes di famia ta enserá? E Skritura ta bisa: “Si un hende no proveé pa su mes hendenan, i spesialmente pa esnan di su kas, el a nenga e fe i ta pió ku un inkrédulo.” (1 Tim. 5:8) Sí, un hòmber mester perkurá materialmente pa su famia. Pero si e ke yuda su famia keda spiritualmente alerta, e tin ku hasi mas ku djis pone pan riba mesa. E tin ku edifiká su famia spiritualmente tambe, yudando nan fortalesé nan relashon ku Dios. (Pro. 24:​3, 4) Kon e por hasi esei?

4. Kiko un esposo tin ku hasi pa e por tin éksito den edifiká su famia spiritualmente?

⁴ Siendo ku “e esposo ta kabes di e esposa, meskos ku Kristu tambe ta kabes di e iglesia,” un hòmber kasá tin ku analisá kon Hesus ta dirigí e kongregashon i imitá su ehèmpel. (Efe. 5:23) Wak kon Hesus a deskribí su relashon ku su siguidónan. (Lesa Juan 10:​14 i 15.) Awor kiko un esposo tin ku hasi si e ke tin éksito den edifiká su famia spiritualmente? E klave ta: Studia loke Hesus a bisa i hasi komo “e bon wardadó” i “sigui den su pasonan.”​—1 Ped. 2:21.

5. Kon bon e Bon Wardador konosé e kongregashon?

⁵ Laga nos analisá awor kiko un kabes di famia por siña for di Kristu su ehèmpel. E relashon ku tin entre un wardadó di karné i su karnénan ta basá riba konosementu i konfiansa. E wardadó konosé su karnénan bon, i e karnénan konosé nan wardadó i ta konfi’é. Nan ta rekonosé su bos i obedes’é. Hesus a bisa: “Mi konosé mi karnénan i nan konosé Mi.” (Juan 10:14, BPK) No ta djis ariba ariba Hesus konosé e kongregashon. E palabra griego tradusí komo “konosé” ta referí na konosementu íntimo. Sí, e Bon Wardador konosé kada un di su karnénan bon. E sa kiko ta nan nesesidatnan, i e konosé nan debilidat- i bon kualidatnan. E ta konsiente di  tur loke ta pasa ku su karnénan. I e karnénan konosé nan wardadó bon i ta konfi’é komo nan lider.

6. Kon esposonan por imitá e Bon Wardador?

⁶ Pa un esposo por kumpli ku su responsabilidat bíbliko komo kabes di famia, e mester imitá e ehèmpel di Kristu. E tin ku mira su mes komo un wardadó i esnan bou di su kuido komo karné. E tin ku hasi esfuerso pa konosé su famia bon. Esei ta posibel? Sí, basta e ta komuniká bon ku kada miembro di su famia, ta skucha nan preokupashonnan i ta dirigí aktividatnan di e famia. E tin ku tene kuenta tambe ku su famia ora di tuma desishon relashoná ku Adorashon Komo Famia, reunion kristian, sirbishi di vèlt, rekreo i entretenimentu. Pues, un esposo kristian mester hasi esfuerso pa konosé tantu e Palabra di Dios komo e miembronan di su famia bon. Esei ta hasi posibel pa e dirigí su famia bon di manera ku nan lo tin mas konfiansa den dje komo kabes. I e na su turno lo tin e satisfakshon di mira su famia uní den adorashon berdadero.

7, 8. Kon un esposo por imitá e Bon Wardador ora di mustra kariño i amor na esnan bou di su kuido?

⁷ Un bon wardadó ta stima su karnénan. Ora nos ta studia e relatonan di Evangelio tokante e bida i ministerio di Hesus, nos ta sinti nos konmoví pa e manera ku el a mustra amor na su disipelnan. El a asta ‘duna su bida pa e karnénan.’ Meskos ku Hesus, esposonan tambe mester mustra amor na esnan bou di nan kuido. Un esposo ku ke tin Dios su aprobashon no ta dominá su esposa; mas bien, e ta sigui stima su kasá “meskos ku Kristu tambe a stima e iglesia.” (Efe. 5:25) E ta papia na un manera bondadoso i ku komprenshon ku su esposa, pasobra e esposa meresé onor.​—1 Ped. 3:7.

⁸ Ora di instruí yunan, e kabes di famia tin ku pega firmemente na prinsipionan bíbliko. Sinembargo, e mester ta kariñoso ku su yunan i disipliná nan na un manera amoroso. Algun yu kisas tin mester di mas tempu ku otronan pa komprondé loke nan mayornan ta ferwagt di nan. Den kasonan asina, e tata mester mustra mas pasenshi. Ora kabesnan di famia ta sigui e ehèmpel di Hesus konsistentemente, nan ta krea un hogar kaminda miembronan di famia ta sinti nan sigur. Nan famia lo disfrutá di e siguridat spiritual ku e salmista a deskribí den un kantika.​—Lesa Salmo 23:​1-6.

9. Meskos ku e patriarka Noe, ki responsabilidat esposonan kristian tin, i kiko lo yuda nan kumpli ku esaki?

⁹ Un otro bon ehèmpel ku kabesnan di famia por imitá ta esun di Noe. E patriarka Noe a biba den un tempu di fin. Pero Yehova a preserv’é “huntu ku shete otro persona mas, ora ku el a trese un diluvio riba e mundu di e impionan.” (2 Ped. 2:5) Noe tabatin e responsabilidat di yuda su famia sobrebibí e Diluvio. Den e último dianan di e sistema akí, kabesnan di famia tin e mesun responsabilidat. (Mat. 24:37) Pues, ta masha importante pa nan studia e ehèmpel di e Bon Wardador i hasi esfuerso pa imit’é.

Esposanan​—Edifiká Boso Kas

10. Pa un esposa, kiko ser sumiso na su esposo ta enserá?

¹⁰ Apòstel Pablo a skirbi: “Esposanan, sea sumiso na boso mes esposo, manera na Señor.” (Efe. 5:22) E palabranan akí no ta rebahá hende muhé di ningun manera. Promé ku Yehova a krea e promé muhé, Eva, el a bisa: “No ta bon pa e hòmber ta so; lo mi traha un yudadó p’e ku ta pas kuné.” (Gén. 2:18) Komo un “yudadó” i komplemento, e hende muhé tin un papel onorabel den famia. E ta apoyá su esposo segun ku e esposo ta kumpli ku e responsabilidatnan di famia.

11. Kon un esposa ehemplar ta edifiká su kas?

¹¹ Un esposa ehemplar òf sabí ta traha na bienestar di su famia. (Lesa Proverbionan  14:1.) E tin masha rèspèt pa su esposo komo kabes di famia. E no ta manifestá un aktitut rebelde i di independensia ku ta asina komun den mundu; mas bien, e ta sumiso na su kasá. (Efe. 2:2) Pero un esposa bobo no ta respetá su kasá komo kabes di famia. E ta lihé pa papia malu di su esposo. En kambio, un esposa sabí ta hasi esfuerso pa tantu su yunan komo otro hende haña mas rèspèt pa su esposo. E no ta kritiká su kasá ni pleita kuné; mas bien, e ta apoyá su esposo den su papel komo kabes di famia. Pa loke ta asuntu finansiero, e esposa bobo ta malgastá e plaka ku e famia a traha duru p’e. Ma un esposa sabí no ta hasi esei; e ta apoyá i kooperá ku su esposo. E ta manehá plaka na un manera prudente i ta ekonomisá. Ademas, e no ta pone preshon riba su esposo pa traha overtaim.

12. Kon un esposa por yuda su famia ‘keda alerta’?

¹² Un esposa ehemplar ta yuda su famia ‘keda alerta,’ kooperando ku su esposo den eduká e yunan spiritualmente. (Pro. 1:8) Ku entusiasmo e ta apoyá e programa di Adorashon Komo Famia. Ademas, e ta sostené su kasá ora e ta instruí i disipliná e yunan. Ki un gran diferensia kompará ku un esposa bobo ku no ta kooperá ku su esposo! Su bobedat ta perhudiká su yunan, tantu físikamente komo spiritualmente.

13. Dikon ta importante pa un esposa apoyá su kasá den su aktividatnan teokrátiko?

¹³ Un esposa ku ta apoyá su kasá ta sinti un goso ora su esposo ta aktivo den kongregashon. Sea ku e esposo ta un sirbidó ministerial, ansiano òf kisas miembro di Komité di Kontakto ku Hospital òf di Komité di Mantenshon di Salòn di Reino, e esposa ta kontentu ku e privilegio ku su esposo tin. E esposa ta apoyá su kasá ku echo i palabra, i esei sigur ta enserá sakrifisio. E ta konsiente ku e echo ku su kasá ta okupá ku aktividat teokrátiko ta yuda henter e famia keda alerta spiritualmente.

14. (a) Kiko por ta un desafio pa un esposa ku ta apoyá su kasá, i kon e por trata ku e desafio? (b) Kon un esposa por kontribuí na e bienestar di henter su famia?

¹⁴ Tin biaha por ta un desafio pa un esposa ehemplar apoyá su kasá ora su esposo tuma un desishon ku e no ta di akuerdo kuné. Asta den un kaso asina, e esposa ta manifestá “un spiritu suave i ketu” i ta kooperá ku su kasá. (1 Ped. 3:4) Un bon esposa ta hasi esfuerso pa sigui e ekselente ehèmpel di hende muhénan di ántes ku tabata teme Dios, manera por ehèmpel Sara, Ruth, Abigail i Maria, mama di Hesus. (1 Ped. 3:​5, 6) E ta hasi esfuerso tambe pa imitá ruman muhénan di edat djawe ku ta “reverente den nan komportashon.” (Tito 2:​3, 4) Un esposa ehemplar ku ta mustra amor i rèspèt pa su esposo  ta yuda hasi nan matrimonio eksitoso i ta kontribuí na e bienestar di henter e famia. Su hogar lo ta un lugá agradabel i dushi pa e famia. Pa un ruman hòmber ku ta stima Yehova i ku ta okupá den aktividatnan kristian, un esposa birtuoso tin un balor impagabel.​—Pro. 31:10.

Hóbennan​—Tene Boso ‘Bista Fihá Riba Loke Ta Invisibel’

15. Kon hóbennan por kooperá ku nan mayornan pa e famia por ‘keda alerta’?

¹⁵ Hóbennan, den ki manera boso por kooperá ku boso mayornan pa e famia por ‘keda alerta’ spiritualmente? Pensa riba e premio ku Yehova a pone boso dilanti. Ora boso tabata chikitu, kisas boso mayornan a usa plachi pa mustra boso kon bida lo ta den Paradeis. Segun ku boso tabata krese, boso mayornan a usa Beibel i publikashonnan basá riba Beibel pa yuda boso visualisá kon lo ta pa biba pa semper den e mundu nobo. Awor, si boso ta tene boso bista fihá riba sirbishi na Yehova i ta plania boso bida na armonia ku esei, boso lo ‘keda alerta.’

16, 17. Kiko hóbennan por hasi pa kore e kareda di bida ku éksito?

¹⁶ Ta bon pa boso hasi kaso di e konseho na 1 Korintionan 9:24. (Les’é.) Apòstel Pablo a kompará nos sirbishi na Yehova ku un kareda i bida eterno ku e premio. Kore e kareda ei ku e meta di gana. Skohe e estilo di bida ku lo yuda bo optené e premio di bida eterno. Hopi hóben a pèrdè e premio ei for di bista pasobra nan a kore tras di kosnan material. Ki un bobedat! Biba pa akumulá rikesa no ta hasi un persona berdaderamente felis. Ademas, loke plaka por kumpra ta temporal. Pues, tene boso ‘bista fihá riba loke ta invisibel.’ Dikon? Pasobra “loke ta invisibel ta dura pa semper.”​—2 Kor. 4:18, BPK.

¹⁷ “Loke ta invisibel” ta enserá tur bendishon di Reino. Plania boso bida di tal manera ku boso por disfrutá di e bendishonnan ei. Boso ta haña berdadero felisidat ora boso ta usa boso bida den Yehova su sirbishi. Esaki ta habri kaminda pa boso alkansá metanan di término kòrtiku i di término largu. * Si boso pone metanan spiritual realístiko, boso por keda enfoká riba boso sirbishi na Dios ku e prospekto di risibí e premio di bida eterno.​—1 Juan 2:17.

18, 19. Kon un hóben por sa si e tin un bon relashon ku Yehova?

¹⁸ Hóbennan, e promé paso riba e kaminda ku ta hiba na bida ta pa kultivá un bon relashon ku Yehova. Abo a dal e paso ei kaba? Puntra bo mes: ‘Mi ta partisipá den aktividatnan spiritual djis pa komplasé mi mayornan òf pasobra mi tin un bon relashon ku Yehova? Mi ta kultivá kualidatnan ku ta agradá Dios? Mi ta hasi esfuerso pa mi tin un bon programa di aktividat spiritual? Por ehèmpel, mi ta hasi orashon, studia Beibel, asistí na reunion i bai sirbishi riba un base regular? Mi ta traha pa mi tin un relashon personal ku Dios, pa hala serka dje?’​—Sant. 4:8.

¹⁹ Laga nos konsiderá e ehèmpel di Moisés. Maske el a lanta den e kultura egipsio, el a skohe pa ser identifiká komo un adoradó di Yehova en bes di e yu hòmber di e yu muhé di Fárao. (Lesa Hebreonan 11:​24-27.)  Hóbennan kristian, boso tambe mester ta determiná pa sirbi Yehova fielmente. Si boso hasi esei, boso lo haña berdadero felisidat, e mihó kalidat di bida awor i e speransa di “gara loke ta bida berdadero.”​—1 Tim. 6:19.

20. Den e kareda pa bida, ken lo optené e premio?

²⁰ Den e weganan di antigwedat, solamente ún koredó ta gana e kareda. Pero esaki no ta e kaso den e kareda pa bida. Pasobra Dios su boluntat ta “pa tur [“klase di,” NW] hende wòrdu salbá i yega na konosementu di e bèrdat.” (1 Tim. 2:​3, 4) Hopi hende promé ku bo a kore e kareda akí ku éksito, i tin hopi ta koriendo huntu ku bo. (Heb. 12:​1, 2) Sinembargo, ta esnan ku perseverá te na fin lo haña e premio. Pues, no laga nada strobá bo di gana e premio!

21. Kiko nos lo konsiderá den e siguiente artíkulo?

²¹ ‘E dia grandi i temibel di Yehova’ ta bini sigur. (Joel 2:31) E dia ei no mester kohe famianan kristian di sorpresa. P’esei ta masha importante pa kada miembro di famia asumí nan responsabilidat bíbliko. Kiko mas boso por hasi pa keda spiritualmente alerta i fortalesé boso relashon ku Dios? E siguiente artíkulo lo trata tres faktor ku ta kontribuí na e bienestar spiritual di henter e famia.

[Nota]

Kiko Bo A Siña?

• Dikon ta importante pa famianan kristian keda “alerta”?

• Kon un esposo por imitá e Bon Wardador?

• Kiko un esposa ehemplar por hasi pa apoyá su esposo?

• Kon hóbennan por kooperá pa nan famia keda spiritualmente alerta?

[Preguntanan di Estudio]

[Plachi na página 12]

Un esposa ku ta apoyá su kasá ta di gran balor pa su esposo