“Lo tin skarsedat di kuminda.”​—MARKO 13:8, NW.

● Na Niger, un hòmber ta buska refugio den e pueblo di Quaratadji. Su primu- i rumannan tambe a bini di e partinan isolá di e pais en buska di kuminda. Sinembargo, e hòmber ta drumí su so riba un kama di habri abou. Dikon e ta su so? Sidi, kabesante di e pueblo, ta splika dikon: “E no por perkurá kuminda pa [su famia], i e no por soportá di mira nan den e situashon ei.”

KIKO ECHONAN TA MUSTRA? Rònt mundu, 1 di kada 7 persona no tin sufisiente kuminda pa kome kada dia. Den paisnan afrikano ku ta keda zùit di Sahara e sifranan ta pió, 1 di kada 3 persona ta pasa un periodo di tempu sin sufisiente kuminda. Pa ilustrá esaki, imaginá bo un famia ku ta konsistí di un tata, un mama i un bebi. Si tin kuminda pa solamente dos di nan, ken lo pasa hamber? E tata, e mama òf e bebi? Esaki ta e situashon ku kada famia den e paisnan ei mester trata kuné diariamente.

KIKO TA UN OPHESHON KOMUN? Tera ta produsí mas ku sufisiente kuminda pa tur hende. Ta hende mes mester manehá e rekursonan ei mihó.

E OPHESHON EI TIN BASE? Ta bèrdat ku kunukeronan por produsí i transportá mas kuminda ku nunka promé den historia. Bon mirá, gobièrnunan mester por manehá e stòk di kuminda ku Tera ta produsí i asina resolvé e problema di hamber. Sinembargo, nan a trata di hasi esei pa hopi dékada kaba, pero nan no a logra.

KIKO ABO TA PENSA? E profesia na Marko 13:8 ta kumpliendo? Apesar di avansenan teknológiko, no ta asina ku skarsedat di kuminda ta afligí humanidat na un eskala mundial?

Mayoria di biaha temblor i hamber ta hiba na un otro aspekto di e señal di e último dianan.

[Komentario na página 5]

“Mas ku un tersera parti di mucha ku ta muri di pulmonia, diarea i otro malesa por a sobrebibí si no tabata pa mal nutrishon.”​—ANN M. VENEMAN, EKS DIREKTOR EHEKUTIVO DI FONDO DI NASHONNAN UNÍ PA MUCHA.

[Rekonosementu pa Potrèt na página 5]

© Paul Lowe/Panos Pictures