E artíkulo akí ta trata algun pregunta ku kisas bo tin i e ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Ki speransa tin pa hende ku a muri?

Ora Hesus a yega Betania, un pueblito no muchu leu for di Yerusalèm, su amigu Lázaro ya tabata morto pa kuater dia. Hesus a bai na e graf huntu ku Marta i Maria, e rumannan muhé di e defuntu. No a tarda muchu ku un multitut di hende a yega einan. Bo por imaginá bo kon kontentu Marta i Maria tabata ora ku Hesus a resusitá Lázaro?​—Lesa Juan 11:​20-24, 38-44.

Marta tabatin fe ku lo bai tin resurekshon di e mortonan. Pa hopi tempu fiel sirbidónan di Yehova tabata sa ku den futuro Dios lo lanta e mortonan pa biba riba tera atrobe.​—Lesa Jòb 14:​14 i 15.

2. Kiko ta e kondishon di e mortonan?

Aunke ku e forsa di bida, òf “rosea di e spiritu di bida,” ta tene hende i bestia na bida, nos no ta simplemente sernan spiritual ku ta biba den un kurpa di karni. (Génesis 7:​21, 22) Nos ta kriaturanan físiko trahá for di stòf di tera. (Génesis 2:7; 3:19) Ora nos selebro muri, nos pensamentunan ta peresé. Pues, despues ku Lázaro a ser resusitá, e no a bisa nada tokante niun eksperensia ku el a pasa aden miéntras e tabata morto, pasobra e mortonan no sa nada.​—Lesa Salmo 146:4; Eklesiastés 9:​5 i 10.

Ta klaru, hende morto no por sufri. Pues e siñansa ku Dios ta tormentá hende despues di morto ta falsu. E siñansa ei ta kalumniá Dios. E idea so di tormentá hende den kandela ta algu repugnante pa Dios.​—Lesa Jeremias 7:31.

 3. Nos por papia ku e mortonan?

Hende morto no por papia. (Salmo 115:17) Pero ora angel malbado ta papia ku hende, na un manera engañoso nan ta hasi komo si fuera nan ta spiritu di un persona ku a fayesé. (2 Pedro 2:4) Yehova ta prohibí hende di papia ku e mortonan.​—Lesa Deuteronomio 18:​10 i 11.

4. Ken lo haña resurekshon?

Den e mundu nobo, miónes di hende ku ta drumí den graf lo haña resurekshon. Asta algun hende ku a yega di hasi kosnan malu debí ku nan no tabata konosé Yehova lo haña resurekshon.​—Lesa Lukas 23:43; Echonan 24:15.

Tur hende ku resusitá lo haña e oportunidat di siña e bèrdat tokante Yehova i pa demostrá nan fe den Hesus mediante nan obedensia na dje. (Revelashon 20:​11-13) Tur esnan ku resusitá i ta hasi bon lo tin e prospekto di disfrutá di bida eterno riba tera. Sinembargo, algun persona ku resusitá lo sigui hasi malu. Nan resurekshon lo resultá di ta “un resurekshon di huisio.”​—Lesa Juan 5:​28 i 29.

5. Kiko resurekshon ta siña nos tokante Yehova?

Resurekshon a bira posibel debí ku Dios a manda su Yu pa e duna su bida pa nos. Pues esei ta un ekspreshon di Yehova su amor i bondat inmeresí.​—Lesa Juan 3:16; Romanonan 6:23.

Pa mas informashon, wak kapítulo 6 i 7 di e buki akí, publiká pa Testigunan di Yehova.

[Plachi na página 11]

Adam a ser kreá for di stòf di tera