Abo Ta Sigui e Guia Amoroso di Yehova?
“Tur mal kaminda mi ta odia.”—SAL. 119:128, BPK.
1, 2. (a) Ora bo pidi un amigu pa splika bo kon pa yega un kaminda, ki spièrtamentu lo bo ke pa e duna bo, i dikon? (b) Ki spièrtamentu Yehova ta duna nos, i dikon?
IMAGINÁ bo lo siguiente: Bo tin ku bai un kaminda pero bo no sa kon pa kore yega. Bo tin un amigu di konfiansa ku sa presis kon pa yega na e lugá, i p’esei bo ta akudí na dje pa yudansa. E ta splika bo e ruta, pero na mes momento e ta spièrta bo tambe di algun peliger ku bo por haña bo kuné riba kaminda. Por ehèmpel, e ta spièrta bo ku lo bo topa un bòrchi ku ta dirigí hende den direkshon robes i ku hopi hende a pèrdè kaminda pasobra nan a sigui e bòrchi. Lo bo no keda kontentu ku el a spièrta bo? Lo bo no hasi kaso di su spièrtamentu? Den sierto sentido, nos tambe ta bayendo un kaminda; nos ta riba kaminda pa bida eterno. Yehova ta nos Amigu, i e ta splika nos kon pa yega nos destinashon, esta bida eterno. Pero tambe e ta spièrta nos di e kosnan ku nos mester tene kuidou kuné pa nos no kue mal kaminda.—Deu. 5:32; Isa. 30:21.
2 Den e artíkulo akí i esun siguiente, nos lo papia tokante algun kos ku nos mester tene kuidou kuné. Kòrda ku nos Amigu, Yehova Dios, ta spièrta nos pasobra e ta interesá den nos i ta stima nos. E ke pa nos biba pa semper. E ta sinti duele ora hende ta tuma mal desishon i ta stòp di sirbié. (Eze. 33:11) E artíkulo akí lo spièrta nos di tres peliger. E promé ta eksterno, e di dos ta interno i e di tres ta bini di algu ku no ta real. Ta importante pa sa kiko e peligernan akí ta i kon nos Tata selestial ta yuda nos evitá nan. Un eskritor di Beibel a bisa Yehova: “Tur mal kaminda mi ta odia.” (Sal. 119:128, BPK) Abo tambe ta sinti asina? Laga nos wak kiko por yuda nos evitá “tur mal kaminda.”
“No Sigui e Mayoria”
3. (a) Si nos ta hasiendo un biahe largu i nos no sa unda pa bai, dikon no ta sabí pa djis sigui otro hende? (b) Ki prinsipio importante nos ta haña na Eksodo 23:2?
3 Imaginá bo awor ku durante bo biahe largu bo ta yega un kaminda i bo no sa unda pa bai. Bo ta mira ku hopi hende ta kue un sierto direkshon i bo ta sinti bo inkliná pa bai nan tras. Pero no ta sabí pa sigui e kaminda ei djis pasobra bo ta mira hopi hende ta bai den e direkshon ei. Kisas nan no ta bayendo kaminda abo ta bai òf podisé nan tambe a pèrdè kaminda. E ehèmpel akí ta yuda nos komprondé un prinsipio ku tin tras di un di e leinan ku Yehova a duna e israelitanan. Yehova a spièrta esnan ku tabata sirbi komo hues i tambe e testigunan den kasonan legal di e peliger di “sigui e mayoria,” pasobra nan lo por a tuma desishon robes djis pa komplasé otro hende. (Lesa Eksodo 23:2.) Ta masha fásil pa hende imperfekto kai den e trampa ei. Pero, no ta huesnan i testigunan so tin ku sigui e prinsipio ei.
4, 5. Na ki okashon Josué i Kalèb tabata bou di preshon pa sigui e mayoria, i kiko a duna nan kurashi pa resistí?
4 Nos tambe por sinti nos preshoná pa “sigui e mayoria.” Ora nos haña nos den un situashon asina, ku por presentá diripiente, por ta masha difísil pa resistí e preshon ei. Por ehèmpel, pensa riba loke a pasa ku Josué i Kalèb. Nan dos a bai spioná e Tera Primintí huntu ku dies otro hòmber. Ora nan a bolbe, e dies otro spionnan a konta e israelitanan kosnan ku a spanta nan. Por ehèmpel, nan a bisa ku algun di e habitantenan di e Tera Primintí tabata gigante, desendientenan di nèfilim. (Gén. 6:4) Pero esei ta imposibel, pasobra tur nèfilim, esta e yunan di angel malbado i hende muhé, a muri den e Diluvio di tempu di Noe i nan no tabatin yu. Sinembargo, e israelitanan a bai tras di e dies spionnan pasobra nan fe tabata suak. Ora un hende su fe ta suak, e ta stòp di konfia den Dios i kuminsá kere den hende. No a tarda muchu ku mayoria di israelita a kuminsá pensa ku no ta bale la pena pa drenta e Tera Primintí i a ignorá Yehova su instrukshon. Kiko Josué i Kalèb a hasi bou di e sirkunstansianan difísil ei?—Num. 13:25-33.
5 Josué i Kalèb no a sigui e mayoria. I maske e israelitanan no kier a skucha, tòg e dos hòmbernan ei no tabatin miedu di bisa nan e bèrdat. Nan a hasi loke ta korekto asta ora e israelitanan kier a piedra nan mata! Kiko a duna nan kurashi? Esei ta nan fe den Yehova. Ora un hende tin un fe fuerte, e ta kere den loke Yehova Dios ta bisa i no den ideanan robes di hende. Ora Josué i Kalèb a papia despues tokante nan fe den Yehova, nan a bisa ku Yehova semper ta kumpli ku tur loke e ta primintí. (Lesa Josué 14:6 i 8; 23:2 i 14.) Josué i Kalèb tabata stima Dios i tabata konfia den dje. Nunka nan lo a hasi Yehova tristu djis pa agradá otro hende. Nan no a sigui e mayoria, i p’esei nan ta un ekselente ehèmpel pa nos.—Num. 14:1-10.
6. Den ki situashon nos por sinti nos preshoná pa sigui e mayoria?
6 Bo sa sinti bo preshoná pa sigui e mayoria? Mayoria di hende no ta respetá Yehova. Nan ta pensa ku loke Dios ta bisa enkuanto loke ta bon i malu ta ko’i kèns. Nan tin nan propio ideanan i nan ke pa otro hende tambe kere e ideanan ei. Por ehèmpel, nan ta bisa ku no tin nada malu den programanan di televishon, pelíkula i weganan di vidio ku ta kontené inmoralidat seksual, violensia i spiritismo. (2 Tim. 3:1-5) Ora abo ku bo famia ta skohe rekreo, boso ta laga konsenshi di otro hende influensiá boso? Si esei ta e kaso, boso ta siguiendo e mayoria.
7, 8. (a) Kon nos ta entrená nos “mente,” i dikon e entrenamentu akí ta mihó ku sigui un lista di regla? (b) Dikon nos ta bira kontentu ora nos mira hóbennan kristian pone bon ehèmpel?
7 Yehova a duna nos un regalo presioso pa yuda nos tuma desishon, esta nos “mente.” Sinembargo, pa nos por diserní kiko ta bon i kiko ta malu, nos tin ku entrená nos mente. Nos por hasi esei mediante “práktika,” esta usando nos mente. (Heb. 5:14) Nos no por entrená nos mente si nos ta djis hasi loke otro hende ta hasi òf bisa nos. Nos tin ku usa nos konsenshi i tuma nos propio desishonnan. Ta p’esei Yehova su pueblo no tin un lista di pelíkula, buki i website ku nan mester evitá. Si nos sigui un lista, nos lo tin mester di un lista nobo kada bes. (1 Kor. 7:31) Pero e motibu mas importante pakiko nos no ta sigui un lista ta pasobra nos ke usa e mente ku Yehova a duna nos. Nos ke pensa kuidadosamente riba loke Beibel ta bisa, pidi Yehova su guia den orashon i tuma desishon ku ta agrad’é.—Efe. 5:10.
8 Ta klaru ku ora nos tuma desishon na armonia ku Beibel, no ta tur hende lo gusta esei. Nos hóbennan por ehèmpel no tin e fásil; na skol semper otro hóbennan ta purba preshoná nan pa hasi loke e mayoria ta hasi. (1 Ped. 4:4) Pero hopi di nos hóbennan no ta sigui e mayoria. Ta masha bunita pa mira ku tantu kristiannan hóben komo bieu ta imitá e fe di Josué i Kalèb.
No Sigui ‘Boso Kurason ni Boso Wowo’
9. (a) Si bo ta bayendo un kaminda, dikon por ta peligroso pa drenta un kaminda djis pasobra bo ta haña su paisahe bunita? (b) Dikon e lei na Numbernan 15:37-39 tabata importante pa e israelitanan?
9 E di dos peliger ku por afektá nos ta interno. Nos por ilustrá esei asin’akí: Imaginá bo awor ku durante bo biahe bo no ta hasi uso di e mapa ku bo tin pero ta drenta tur e kamindanan ku tin paisahe bunita. Lo bo yega bo destinashon? Klaru ku nò! E ehèmpel akí ta yuda nos komprondé un otro lei ku Yehova a duna e israelitanan. (Lesa Numbernan 15:37-39.) Awendia hopi hende no ta komprondé dikon e israelitanan mester a pone un kordon blou ariba di e frañanan di nan paña. Abo ta komprondé dikon e lei akí tabata importante? E kordon blou i e frañanan riba paña di e israelitanan a yuda nan kòrda ku nan mester tabata diferente for di e otro nashonnan rònt di nan pa nan por a agradá Yehova. (Lev. 18:24, 25) Pero tabatin un otro motibu pakiko Yehova a duna nan e lei ei. Laga nos ban papia riba esei i haña sa mas tokante e di dos peliger ku por pone nos desobedesé Yehova.
10. Kon Yehova a mustra ku e konosé hende hopi bon?
10 Yehova a duna su pueblo e lei akí pasobra e no tabata ke pa nan ‘sigui tras di e pashonnan di nan kurason i di nan wowo.’ Yehova konosé hende hopi bon. E sa ku ta fásil pa nos kurason, e hende ku nos ta di paden, deseá e kosnan ku nos ta mira. P’esei Yehova ta bisa nos: “E kurason ta mas engañoso ku tur kos i ta totalmente korupto; ken por komprond’é?” (Jer. 17:9) Esei ta e motibu pakiko Yehova a bisa e israelitanan pa no sigui nan kurason ni nan wowo. Yehova tabata sa ku ora e israelitanan mira e kondukta di e nashonnan ku no tabata ador’é, nan lo por a haña e deseo di ta manera nan. Ku otro palabra, nan lo por a haña gana di imitá e nashonnan su manera di pensa, di aktua, di bisti i areglá nan mes.—Pro. 13:20.
11. Kon nos por kai den e tentashon di sigui nos kurason i wowo?
11 Awendia ta mas fásil ainda pa nos kurason deseá loke nos ta mira, ya ku e mundu akí konstantemente ta fomentá mal deseo. Pues den ki situashon e prinsipio na Numbernan 15:39 lo por yuda nos? E por yuda nos por ehèmpel ora di kumpra paña, ya ku nos lo por kai den e tentashon di sigui nos kurason i wowo. Hopi hende den nos komunidat ta bisti di un manera seksualmente provokativo. Debí ku nos ta mira nan tur ora, sea na skol, na trabou òf otro kaminda, nos lo por haña un deseo fuerte pa bisti meskos ku nan. Nos lo por kuminsá bisti mas manera nan i ménos manera un kristian.—Rom. 12:1, 2.
12, 13. (a) Kiko nos mester hasi si nos haña e deseo pa wak loke ta malu? (b) Ki konseho bíbliko nos por sigui pa evitá di lanta mal deseo den otro hende?
12 Ta masha importante pa nos dominá nos deseonan. Nos no mester wak loke ta malu. E ehèmpel di e hòmber fiel Jòb por yuda nos. El a bisa ku el a sera un aliansa ku su wowonan. E tabata desididu pa no wak ningun muhé fuera di su kasá ku deseo romántiko. (Jòb 31:1) Rei David a tuma un desishon similar: “Lo mi no pone nada malu dilanti di mi wowo.” (Sal. 101:3) Meskos ku David, nos tampoko no mester wak “nada malu,” esta, nada ku por daña nos konsenshi i nos relashon ku Yehova Dios. Nos no mester wak nada ku por duna nos mal deseo i pone nos peka.
13 Nos lo no ke hasi “nada malu” tampoko pa otro hende haña mal deseo. P’esei nos ta tuma e konseho ku Beibel ta duna pa bisti na un manera “apropiá” i “desente” masha na serio. (1 Tim. 2:9) Pa hasi sigur ku nos ta bisti na un manera desente, nos tin ku tene kuenta tambe ku loke otro hende ta pensa. Nos no por bai solamente tras di loke nos ta gusta sin tene kuenta ku konsenshi i sintimentu di otro hende. (Rom. 15:1, 2) Tin míles di hóben den e kongregashon kristian ku ta bisti na un manera ehemplar. Nos ta masha kontentu ku nan no ta sigui nan kurason ni nan wowo. Nan ta skohe pa agradá Yehova den tur kos.
No Sigui “Tras di Kosnan Bano”
14. Ki spièrtamentu tokante “kosnan bano” Samuel a duna?
14 Imaginá bo ku bo tin ku pasa dor di un desierto masha grandi pa bo yega bo destinashon. Dado momento, bo ta kere ku bo ta mira awa, pero no ta asina. No tin nada einan! Awor kiko por pasa si bo baha for di kaminda pa bai tras di e ilushon ei? Bo por pèrdè i muri den desierto. Meskos tambe, Yehova sa kon peligroso ta pa pone konfiansa den kosnan bano òf kosnan ku no ta eksistí. Un biaha e mester a spièrta e israelitanan di e peliger akí. Tur e nashonnan rònt di nan tabatin rei humano, p’esei e israelitanan tambe tabata ke un rei. E deseo ei tabata un piká serio pasobra di e manera ei e israelitanan a demostrá ku nan no tabata ke Yehova komo nan Rei. Finalmente, Yehova a permití nan haña un rei humano, pero el a manda profeta Samuel pa spièrta nan tokante e peliger di sigui tras di “kosnan bano,” esta, di konfia den kosnan ku en realidat no por a yuda nan.—Lesa 1 Samuel 12:21.
15. Den ki manera e israelitanan a sigui “tras di kosnan bano”?
15 Podisé e israelitanan a pensa ku nan por a konfia un rei humano mas ku Yehova. Si nan a pensa asina, en realidat nan tabata pone nan konfiansa den ‘kos bano.’ I si nan a kuminsá kere den ún kos bano, tabata fásil pa nan kere den hopi otro ‘kos bano’ ku ta bini di Satanas. Por ehèmpel, un rei humano fásilmente por a pone nan adorá imágen. Hende ku ta adorá imágen ta pensa ku nan por konfia e diosnan di palu òf di piedra akí pasobra nan por mira i mishi ku nan. Nan no ta konfia den e Dios invisibel, Yehova, kende a krea tur kos. Pero apòstel Pablo a bisa ku ídolo “no ta eksistí.” (1 Kor. 8:4) Ídolo no por mira, tende, papia, ni hasi nada. Pues ta un bobedat pa adorá imágen simplemente pasobra nos por mira nan i mishi ku nan. Imágen no por yuda ningun hende. Nan ta “kosnan bano,” i esnan ku konfia den nan “lo bira meskos ku nan.”—Sal. 115:4-8.
16. (a) Kon Satanas ta pone hende sigui “tras di kosnan bano” awe? (b) Dikon nos por bisa ku plaka i kos material ta “kosnan bano,” spesialmente si nos kompará nan ku Yehova?
16 Satanas ta masha astuto, i te awe e ta pone hende sigui “tras di kosnan bano.” Por ehèmpel, e ta pone hopi hende kere ku si nan tin plaka, un bon trabou i kosnan bunita, nan lo ta felis i nan lo sinti nan sigur. Hende ta kere ku e kosnan ei lo solushoná tur nan problemanan. Pero ta kuantu e kosnan ei por yuda nan ora nan bira malu, ora ekonomia bai atras òf ora un desaster natural tuma lugá? E kosnan akí por yuda hende ora nan sinti ku nan bida ta bashí i sin ningun propósito? Nan por yuda hende haña kontesta pa e preguntanan importante ku nan tin tokante bida? Nan ta yuda hende ora nan tin ku enfrentá morto? Si nos ta konfia den plaka i kos material, nos lo keda desepshoná. Plaka i kos material no por duna nos felisidat, ni nan no por evitá ku nos ta bira malu i muri. Nan ta kosnan bano. (Pro. 23:4, 5) Pero, Yehova sí nos por konfia. E ta eksistí i e ta e Dios berdadero. Ta solamente ora nos tin un bon relashon ku Yehova, nos por ta felis i sinti nos sigur. Ta Yehova so por yuda nos ku tur nos problemanan. Nos ta masha kontentu ku nos por ta su amigu. Nunka nos lo no ke bandon’é pa sigui “tras di kosnan bano.”
17. Despues di a analisá e spièrtamentunan ku tin den e artíkulo akí, kiko bo tin pensá di hasi?
17 Sí, nos ta kontentu ku Yehova ta nos Amigu i ku e ta guia nos riba e kaminda pa bida eterno. Si nos sigui hasi kaso di su spièrtamentunan, nos lo por biba pa semper. Den e artíkulo akí, nos a siña tokante tres peliger ku ta pone hopi hende desviá: e peliger di sigui e mayoria, nos kurason i “kosnan bano.” Den e siguiente artíkulo, nos lo siña tokante tres spièrtamentu mas ku Yehova ta duna nos pa nos por odia i evitá tur “mal kaminda.”—Sal. 119:128, BPK.
Kiko Bo Ta Pensa?
Kon bo por usa e prinsipionan den e tekstonan di Beibel akí?
• Salmo 119:128, BPK
[Preguntanan di Estudio]
[Plachi na página 11]
Bo a yega di sinti bo preshoná pa sigui e mayoria?
[Plachi na página 13]
Dikon ta peligroso pa sigui nos kurason i nos wowo?
[Plachi na página 14]
Abo ta sigui tras di kosnan bano?
