“Un disipel no ta mas ku su maestro; ma tur hende, despues di a kaba di siña tur kos, lo ta meskos ku su maestro.”​—LUKAS 6:40.

TIN mayornan ta pensa ku nan no ta kapas pa siña nan yunan tokante Dios. Kisas nan ta haña ku nan no tin sufisiente edukashon òf no sa sufisiente tokante religion pa ta bon maestro. P’esei, nan ta preferá di laga e tarea importante akí den man di un famia òf lider religioso.

Ken realmente ta den e mihó posishon pa siña mucha bèrdatnan religioso i prinsipionan moral? Tuma nota di loke Beibel ta bisa tokante e tópiko akí i kompará esakinan ku loke investigadónan a deskubrí.

Kiko Ta e Tarea di un Tata?

Loke Beibel ta siña: “Tatanan, no pone boso yunan rabia, ma lanta nan ku disiplina i ku e siñansa ku Señor ke.”​—Efesionan 6:4, BPK.

Loke investigadónan a deskubrí: Kon tatanan ta benefisiá si nan kultivá un konvikshon religioso fuerte? E artíkulo titulá Fathers’ Religious Involvement and Early Childhood Behavior, publiká na 2009, a bisa: “Si hende hòmber ta aktivo den un religion, esei por yuda nan bira mihó tata. Religion ta duna hende sosten i guia sosial i e  tin efekto riba nan kondukta. Ademas, e ta proveé siñansa- i prinsipionan ku por yuda hende dirigí nan bida.”

Beibel ta pone hopi énfasis riba e tarea ku un tata tin pa kria i siña su yunan. (Proverbionan 4:1; Kolosensenan 3:21; Hebreonan 12:9) Pero e instrukshon akí ta relevante awe? Na 2009, Universidat di Flórida a publiká un artíkulo ku a menshoná e influensia ku tatanan tabatin riba nan yunan. Investigadónan a haña ku yu, kende nan tata tabata aktivamente enbolbí den nan kriansa, tabata mas inkliná pa ta kompasivo i nan tabatin un mihó sentido di balor propio. Yu hòmber tabata ménos inkliná pa komportá nan mes malu i yu muhé tabatin ménos chèns di haña problema emoshonal. Sin duda, Beibel su konseho ketu bai ta bálido.

Kon Importante e Tarea di un Mama Ta?

Loke Beibel ta siña: “No bandoná e siñansa di bo mama.”​—Proverbionan 1:8.

Loke investigadónan a deskubrí: Na 2006 Handbook of Child Psychology a bisa ku na komparashon ku tatanan, mamanan ta komuniká i ta pasa mas tantu tempu ku kada yu. E situashon ta meskos den hopi pais. Debí ku e mama ta pasa asina tantu tempu ku e yu, su palabra, akshon i aktitut tin un efekto profundo riba e yu su desaroyo.

Mayornan ku ta siña nan yunan e bèrdat tokante Dios ta duna nan por lo ménos dos kos balioso. Di promé, e yunan ta haña oportunidat pa forma un amistat será ku nan Tata selestial, i esei lo benefisiá nan pa restu di nan bida. Di dos, e yunan ta siña for di ehèmpel di nan mayornan kon esposo i esposa tin ku kooperá ku otro pa logra metanan importante. (Kolosensenan 3:​18-20) Aunke otro hende por yuda e tata i e mama, ta e mayornan tin e responsabilidat di siña nan yunan tokante Dios i e manera ku Dios ke pa famia funshoná.

Pero, kon mayornan mester siña nan yunan? Ki método ta duna mihó resultado?