“Alabá sea e Dios i Tata di nos Señor Hesukristu, e Tata di tierno miserikòrdia i Dios di tur konsuelo.”—2 KOR. 1:3.

1. Sin importá edat, kiko tur hende tin mester di dje?

FOR di ora nos nase nos tin mester di konsuelo. Un bebi ta yora pa laga nos sa ku e tin mester di konsuelo. Podisé e ke pa karg’é òf e tin hamber. Asta ora nos ta mas grandi, hopi biaha nos ta sinti ku nos tin mester di konsuelo, foral ora nos ta pasando den situashonnan difísil.

2. Ki siguransa Yehova ta duna esnan ku konfia den dje?

² Hopi biaha nos famia- i amigunan por duna nos un grado di konsuelo. Ma tin biaha no tin ningun solushon humano pa e kosnan ku nos ta sufri. Ta Dios so por duna nos konsuelo den situashonnan asina, maske kon doloroso nos situashon por ta. Su Palabra ta sigurá nos: “SEÑOR ta serka di tur esnan ku ta sklama na dje, . . . tambe e lo tende nan sklamashon.” (Sal. 145:18, 19) Sí, “e wowonan di SEÑOR ta riba e hustunan, i su oreanan ta atento pa skucha nan sklamashon.” (Sal. 34:15) Pero pa nos risibí e apoyo i konsuelo di Dios, nos tin ku pone nos konfiansa den dje. David a mustra esei bon kla ora el a kanta: “SEÑOR lo ta un refugio pa e oprimínan, un refugio den tempunan di angustia. I esnan ku konosé bo nòmber lo pone nan konfiansa den bo, pasobra abo, o SEÑOR, no a bandoná esnan ku ta buska bo.”—Sal. 9:9, 10.

3. Kon Hesus a ilustrá e amor ku Yehova tin pa su pueblo?

³ Yehova su sirbidónan ta masha presioso p’e. Hesus a mustra esaki bon kla ora el a bisa: “No ta pa dos sèn pretu nan ta bende sinku mòfi? Tòg Dios no ta lubidá ni ún di nan. Pa loke ta boso, el a konta asta e drachinan di kabei riba boso kabes. Pues, no tene miedu; boso ta bal mas ku hopi mòfi.” (Luk. 12:6, 7) Pa medio di profeta Yeremías, Yehova a bisa su pueblo di pasado: ‘Mi a stima bo ku un amor eterno; p’esei ku miserikòrdia mi a hala bo.’—Yer. 31:3.

4. Dikon nos por konfia e promesanan di Yehova?

⁴ Loke por duna nos konsuelo ora nos ta sufri ta di konfia den Yehova i den su promesanan. Nos mester tin anto e mesun konfiansa den Dios ku Hosue a ekspresá: “Ni un palabra di tur e bon palabranan ku SEÑOR boso Dios a papia tokante di boso no a faya; tur a keda kumplí pa boso, ni un di nan no a faya.” (Hos. 23:14) Ademas, nos por tin sigur ku asta si temporalmente nos ta sinti nos kibrá debí na un ke otro situashon difísil, “Dios ta fiel na su palabra” i hamas lo e bandoná su sirbidónan leal.—Lesa 1 Korintionan 10:13.

5. Kon bini nos por konsolá otro hende?

⁵ Apòstel Pablo a referí na Yehova komo e “Dios di tur konsuelo.” “Konsolá” ta nifiká trankilisá un hende ku ta sufri òf ku ta tristu; dun’é un sintimentu di alivio. Yehova sigur ta hasi esaki. (Lesa 2 Korintionan 1:3 i 4.) No tin nada ni ningun hende ku por pone límite pa nos Tata selestial. Pues, e por hasi loke sea ta nesesario pa perkurá konsuelo pa hende ku ta stim’é. Anto nos, na nos turno, por konsolá nos rumannan “ku  ta den kualke tipo di tribulashon.” Nos por hasi esei “ku e konsuelo ku nos a risibí di Dios.” No tin nada ku por stroba Yehova di konsolá hende desesperá! E palabranan di e teksto ta indiká esei bon kla.

Kon pa Trata ku e Kousanan di Sufrimentu

6. Menshoná algun kos ku por pone nos sufri.

⁶ Den hopi situashon den bida nos tin mester di konsuelo. Un di e kousanan mas grandi di tristesa ta morto di un ser kerí, spesialmente di un kasá òf di un yu. Un hende ku a bira víktima di diskriminashon òf di prehuisio tambe por tin mester di konsuelo. Problema ku salú, behes, pobresa, problema matrimonial òf otro kosnan malu ku ta pasa den mundu por pone ku nos tin mester di konsuelo.

7. (a) Den situashonnan doloroso, ki klase di konsuelo nos mester? (b) Kiko Yehova por hasi pa kura un kurason “kibrá”?

⁷ Nos ta sufri den hopi manera ora nos haña nos ku kontratempu i ferdrit. Nos lo tin mester di konsuelo pa trankilisá nos kurason, nos mente, nos emoshonnan, nos salú i asta nos fe. Por ehèmpel, pensa riba nos kurason. E Palabra di Dios ta bisa ku nos kurason por ta “kibrá.” (Sal. 51:17) Yehova sigur por yuda nos den e situashon ei pasobra “e ta kura esnan di kurason kibrá, i ta mara nan heridanan.” (Sal. 147:3) Asta den situashonnan masha difísil, Dios por trese alivio pa nos kurason angustiá si nos hasi orashon na dje, tene fe den dje i obedesé su mandamentunan.—Lesa 1 Huan 3:19-22; 5:14 i 15.

8. Kon Yehova por yuda nos ora nos tin angustia mental?

⁸ Hopi biaha nos mente tin mester di konsuelo debí ku nos ta pasa den vários prueba ku ta kousa masha angustia mental. Probablemente nos no por trata ku e pruebanan akí riba nos mes forsa. Sinembargo, e salmista a kanta: “Ora preokupashon a oumentá, bo konsuelo a duna mi alivio.” (Sal. 94:19, BPK) Ademas, Pablo a skirbi: “No sea anshá tokante nada; mas bien, den tur kos, pa medio di orashon i súplika huntu ku gradisimentu, laga Dios sa kiko ta boso petishonnan; i e pas di Dios ku ta surpasá tur komprondementu lo protehá boso kurason i boso mente pa medio di Kristu Hesus.” (Flp. 4:6, 7) Ora nos tin angustia mental, nos por haña un gran konsuelo si nos lesa e Skritura i meditá riba dje.—2 Tim. 3:15-17.

9. Kiko por yuda nos trata ku angustia emoshonal?

⁹ Tin biaha, nos ta bira asina desanimá ku nos ta entregá na emoshonnan negativo. Podisé nos ta sinti ku nos no por kumpli ku un sierto responsabilidat bíbliko òf ku un asignashon den kongregashon. Den e situashon akí tambe Yehova por konsolá nos i yuda nos. Ata un ehèmpel: Ora Hosue a haña e enkargo pa dirigí e israelitanan kontra nashonnan enemigu poderoso, Moises a bisa e pueblo: “Sea fuerte i tene kurashi, no tene miedu ni tembla pa nan, pasobra SEÑOR bo Dios ta Esun ku ta bai ku bo. E lo no faya bo ni bandoná bo.” (Deu. 31:6) Ku e apoyo di Yehova, Hosue a logra hiba e pueblo di Dios den e Tera Primintí i a derotá tur nan enemigunan. Anteriormente, Moises a risibí e mesun apoyo di Dios na Laman Kòrá.—Éks. 14:13, 14, 29-31.

10. Ora situashonnan difísil ta afektá nos salu, kiko por yuda nos?

¹⁰ Susesonan angustioso por afektá nos salú. Klaru ku si nos ta kome bon, sosegá sufisiente, hasi ehersisio i tene nos kas i nos kurpa limpi, esei lo por tin un bon efekto riba nos salú. Un punto di bista positivo di futuro, basá riba loke Beibel ta bisa, tambe por yuda nos salú. Pues, ora nos ta sufri pa motibu di un prueba òf problema, ta bon pa nos kòrda riba e eksperensia di Pablo i su palabranan  di animashon: “Nos ta haña nos bou di hopi preshon, ma nos no ta asina den pèrtá ku nos no por move; nos no sa sigur kiko pa hasi, ma nos no ta totalmente sin salida; nos ta ser persiguí, ma no lagá na kaya; nos ta ser tumbá, ma no destruí.”—2 Kor. 4:8, 9.

11. Kiko nos por hasi si nos ta sinti ku nos fe ta birando débil?

¹¹ Algun prueba por afektá nos fe. Yehova por yuda nos ku esaki tambe. Su Palabra ta sigurá nos: “SEÑOR ta sostené tur ku kai, i ta lanta tur ku ta abatí.” (Sal. 145:14) Si nos ta sinti ku nos fe ta birando débil, nos mester buska yudansa di e ansianonan kristian. (Sant. 5:14, 15) Ademas, pensando konstantemente riba e speransa bíbliko di bida eterno por duna nos fortalesa durante pruebanan di nos fe.—Huan 17:3.

Algun Ehèmpel di Hende Ku Dios A Konsolá

12. Deskribí e manera ku Yehova a konsolá Abraham.

¹² E eskritor inspirá di Salmo 119 a bisa Yehova: “Kòrda e palabra duná na bo sirbidó, den kua bo a hasi mi spera. Esaki ta mi konsuelo den mi aflikshon, ku ta bo palabra a rebibá mi.” (Sal. 119:49, 50) Awe, nos tin e Palabra skirbí di Yehova ku ta kontené hopi ehèmpel di e manera ku Dios a konsolá su sirbidónan. Por ehèmpel, Abraham lo tabata basta preokupá ora el a haña sa ku Yehova ta bai destruí Sódoma ku Gomora. E fiel patriarka a puntra Dios: “Di bèrdat bo ta bai destruí e hustu huntu ku e malbado?” Yehova a konsolá Abraham dunand’e e siguransa ku si tabatin 50 hende hustu so den e stat, lo e no a destruí Sódoma. Sinembargo, Abraham a puntra Yehova sinku biaha mas: Kiko si tabatin 45 hende hustu so? 40? 30? 20? 10? Kada biaha, Yehova ku masha pasenshi i bondat a sigurá Abraham ku lo el a spar Sódoma. Apesar ku no tabatin ni sikiera 10 hende hustu den e área ei, Yehova a skapa Lòt ku su yu muhénan.—Gén. 18:22-32; 19:15, 16, 26.

13. Kon Ana a mustra ku el a konfia den Yehova?

¹³ E esposa di Elkana, Ana, tabatin masha gana mes di un yu. Pero e no por a haña yu, i esaki a hasié masha ferdrit. El a hasi orashon na Yehova tokante e asuntu, i Sumo Saserdote Elí a bis’é: “Ku e Dios di Israel duna bo bo petishon.” Esaki a konsolá Ana, “i su kara no tabata tristu mas.” (1 Sam. 1:8,  17, 18) Ana a konfia den Yehova i a laga e asuntu den su man. Aunke Ana no tabata sa kiko lo a bai pasa, e tabatin un pas mental. Ku tempu, Yehova a kontestá su orashon. El a sali na estado i a duna lus na un yu hòmber ku el a yama Samuel.—1 Sam. 1:20.

14. Dikon David tabatin mester di konsuelo, i serka ken el a akudí pa esei?

¹⁴ Rei David di Israel di antigwedat ta un otro ehèmpel di un persona ku Dios a konsolá. Yehova ta “wak kurason,” i p’esei ora el a skohe David komo futuro rei di Israel, e tabata sa ku David tabata sinsero i a stima adorashon berdadero. (1 Sam. 16:7; 2 Sam. 5:10) Sinembargo, mas despues David a kometé adulterio ku Bètsabé i a purba di skonde e piká dor di laga mata Bètsabé su kasá. Ora David a bin realisá kon grave su piká tabata, el a pidi Yehova den orashon: “Segun e grandesa di bo kompashon, kita mi transgreshonnan. Laba mi kita tur mi inikidat, i purifiká mi di mi piká. Pasobra mi ta rekonosé mi transgreshonnan, i mi piká ta semper mi dilanti.” (Sal. 51:1-3) David di bèrdat a arepentí di su piká, i Yehova a pordon’é. Sinembargo, David tabatin ku karga e konsekuensia di loke el a hasi. (2 Sam. 12:9-12) Apesar di esei, e miserikòrdia di Yehova a konsolá su sirbidó humilde.

15. Ki yudansa Yehova a duna Hesus djis promé ku el a muri?

¹⁵ Ora Hesus tabata riba tera, el a konfrontá hopi situashon difísil. Dios a permití e pruebanan akí, i Hesus a mantené su integridat komo un hòmber perfekto ku semper a konfia den Yehova i a obedes’é komo Gobernante Soberano. Djis promé ku nan a traishoná Hesus i ehekut’é, el a pidi Yehova den orashon: “No laga mi boluntat, sino di bo sosodé.” Anto un angel a aparesé na Hesus i a fortales’é. (Luk. 22:42, 43) Dios a duna Hesus e konsuelo, fortalesa i apoyo ku e tabatin mester na e okashon ei.

16. Kiko Yehova por hasi si nos bida ta na peliger pa motibu di nos fe?

¹⁶ Asta si nos tambe mester haña nos kara kara ku morto pa motibu di nos posishon firme komo kristian, Yehova por i lo yuda nos mantené integridat na dje. Es mas, e speransa di resurekshon ta duna nos konsuelo. Ademas, nos ta anhelá e dia ora ku Dios “lo kaba” ku e último enemigu, morto! (1 Kor. 15:26) E sirbidónan leal di Dios ku a muri, i tambe otro hende, ta den e memoria infalibel di Yehova, i lo e resusitá nan. (Huan 5:28, 29; Echo. 24:15) Nos konfiansa den Yehova su promesa di resurekshon ta duna nos konsuelo i un speransa sigur durante persekushon.

17. Kon Yehova por konsolá nos ora un ser kerí muri?

¹⁷ Ta un gran konsuelo pa sa ku Dios lo resusitá nos sernan kerí ku a muri pa nan por biba den un mundu nobo maravioso, sin ningun di e kosnan ku awe ta kousa sufrimentu! Anto e “multitut grandi” di sirbidónan di Yehova ku sobrebibí e fin di e mal sistema akí lo tin e bunita privilegio di duna bonbiní na esnan ku resusitá i siña nan.—Rev. 7:9, 10.

E Dios Eterno Ta un Refugio

18, 19. Kon sirbidónan di Dios a haña konsuelo ora nan tabata ser persiguí?

¹⁸ Moises a skirbi un kantika ku a duna e pueblo di Israel fortalesa i konsuelo. Den e  kantika akí el a sigurá nan: “E Dios eterno ta un refugio.” (Deu. 33:27) Mas despues, profeta Samuel a bisa e israelitanan: “No bira bai i keda sin sigui SEÑOR, ma sirbi SEÑOR ku henter boso kurason. . . . SEÑOR lo no bandoná su pueblo pa motibu di su gran nòmber.” (1 Sam. 12:20-22) Tanten ku nos ta sirbi Yehova fielmente, hamas lo e bandoná nos. Semper lo e sigui duna nos e yudansa ku nos tin mester.

¹⁹ Dios ta duna su pueblo e yudansa i konsuelo ku nan tin mester den e último dianan krítiko akí. Pa mas ku un siglo kaba, míles di nos rumannan den fe rònt mundu a ser persiguí i enkarselá djis pa motibu ku nan tabata sirbi Yehova. Nan eksperensianan ta duna prueba ku Yehova di bèrdat ta konsolá su sirbidónan den tempu difísil. Por ehèmpel, un di nos rumannan di eks-Union Soviétiko a keda sentensiá na 23 aña di prizòn pa motibu di su fe. Asina mes, semper tabata a sali un manera pa e haña alimento spiritual ku por a dun’é fortalesa i konsuelo. El a bisa: “Durante tur e añanan ei, mi a siña konfia den Yehova i a risibí fortalesa for di dje.”—Lesa 1 Pedro 5:6 i 7.

20. Dikon nos por tin sigur ku Yehova lo no bandoná nos?

²⁰ Maske kiko pasa ku nos den futuro, ta bon pa nos kòrda e palabranan di konsuelo akí: “SEÑOR no ta bandoná su pueblo.” (Sal. 94:14) Aunke nos mes tin mester di konsuelo, nos tin tambe e gran privilegio di konsolá otro hende. Den e siguiente artíkulo nos lo bai siña kon nos por konsolá e hendenan ku ta sufri den e mundu yen di problema akí.

Kon Lo Bo Kontestá?

• Kiko ta algun kos ku por pone nos sufri?

• Kon Yehova ta konsolá su sirbidónan?

• Si nos haña nos kara kara ku morto, kiko por konsolá nos?

[Preguntanan di Estudio]

[Kuadro/​Plachi na página 23]

KON PA TRATA KU KOSNAN KU LO POR AFEKTÁ NOS . . .

▪ kurason Sal. 147:3; 1 Huan 3:19-22; 5:14, 15

▪ mente Sal. 94:19; Flp. 4:6, 7

▪ emoshonnan Éks. 14:13, 14; Deu. 31:6

▪ salú 2 Kor. 4:8, 9

▪ fe Sal. 145:14; Sant. 5:14, 15