2 Dios No Ta Ègt Interesá den Nos—Esei Ta Bèrdat?
Loke hende sa bisa: “Si Dios di bèrdat tabata interesá den humanidat, lo el a kita tur maldat i sufrimentu for di riba tera. I si akaso mes e ta preokupá pa hende en general, mi no ta kere ku e ta interesá den ami.”
Loke Beibel ta siña: Yehova Dios no ta kousa maldat. (Santiago 1:13) I maske e tin poder pa kaba ku maldat ora e ke, tòg e ta permití e sosiedat korupto akí sigui eksistí pa un ratu. Dikon? Pasobra di e manera ei algun pregunta ku a lanta na komienso di historia humano por haña kontesta. Pero na final di kuenta, Dios lo aktua na fabor di humanidat i lo eliminá tur daño kousá pa esnan ku a rechasá su gobernashon.—Génesis 3:1-6; Isaías 65:17. *
Dios no solamente ta preokupá pa e famia humano en general, ma e ta profundamente interesá den kada un di nos tambe. Manera Mateo 10:29-31 ta indiká, Dios ta opservá nos i sa sierto detayenan di nos ku nos mes no ta konsiente di dje. E tekstonan akí ta bisa: “No ta pa un sèn pretu nan ta bende dos mòfi? Sinembargo, ni ún di nan lo no kai na suela sin ku boso Tata sa. Pa loke ta boso, el a konta asta e drachinan di kabei riba boso kabes. Pues, no tene miedu: boso ta bal mas ku hopi mòfi.”
Kon e bèrdat ta yuda bo? Generalmente, nos ta evitá hende brutu i insensibel. P’esei no ta un sorpresa ku hende ku ta kere ku Dios no ta interesá den humanidat no ke siña konos’é òf ta busk’é solamente ora nan no tin salida. Pero unabes bo haña sa ku Dios ta realmente interesá den bo, lo bo ke siña mas tokante dje i bira su amigu, no ta bèrdat?
Kisas ora bo ta hasi orashon, bo ta puntra bo mes si Dios ta skucha bo òf si lo e kontestá bo orashon. Wèl, Beibel ta sigurá nos ku Dios “ta skucha orashon” i ku tur ora bai e ta kla pa skucha tur esnan ku ta aserk’é di kurason.—Salmo 65:2.
Es mas, Dios ta animá bo pa ‘tira tur bo inkietut riba dje, pasobra e ta interesá den bo.’ (1 Pedro 5:7) I nos por dependé riba dje asta den tempu di angustia, pasobra su Palabra ta bisa: “[Yehova] ta serka di e hende di kurason kibrá, i ta salba esnan di spiritu abatí.”—Salmo 34:18.
[Nota]
^ par. 3 Pa mas informashon tokante pakiko Dios ta permití sufrimentu, wak kapítulo 11 di e buki Kiko Beibel Ta Siña Realmente?
[Komentario na página 5]
Si Dios no ta interesá den nos, dikon e ta animá nos pa hasi orashon na dje?
