Loke hende sa bisa: “Dios ta keda kòrda delaster un piká ku nos hasi i ta kastigá hende den fièrnu di kandela pa semper.”

“Desasternan natural ta kastigu di Dios.”

Loke Beibel ta siña: Dos Pedro 3:9 ta bisa ku Yehova “no ta deseá pa ningun hende ser destruí, ma e ta deseá pa tur haña chèns di arepentí.” P’esei, Dios no ta enfoká riba nos erornan; mas bien, e ta wak e kosnan bon ku nos ta hasi. Sí, “wowo di SEÑOR ta move bai bini dor di henter tera, pa e por sostené fuertemente esnan ku nan kurason ta kompletamente di dje.”—2 Krónikanan 16:9.

Fièrnu di kandela no ta un siñansa bíbliko; e idea so di tormentá hende pa semper ta repugnante pa Dios. E kastigu máksimo ku Dios ta duna un malbado ta morto. (Yeremías 7:31; Romanonan 6:7) I desasternan natural ta mata tur klase di hende. Pues, nan no ta obra di Dios sino susesonan imprevisto ku por afektá tur hende.—Eklesiástes 9:11, NW.

Kon e bèrdat ta yuda bo? Dios ta “kla pa pordoná” i no lihé pa kondená hende. Ora nos ta konsiente di esei, nos por hala mas serka dje. (Salmo 86:5) Nos no mester sirbi Dios pasobra nos ta sinti nos kulpabel pa algu ku nos a yega di hasi òf pasobra nos tin miedu di haña kastigu. Mas bien, nos fe mester ta basá riba amor pa Yehova. Un amor asina ta duna nos forsa i ta motivá nos pa sigui hasi nos máksimo esfuerso pa agrad’é.—Mateo 22:36-38; 1 Huan 5:3.

Maske ta Dios su deseo pa tur hende kambia i hasi loke ta korekto, e sa ku hopi lo no stòp di hasi malu nunka. P’esei e mester a aktua kontra esnan ku tabata determiná pa hasi maldat. Si e no a hasi esei, lo e tabata meskos ku un gobernante ku ta permití inhustisia i sufrimentu sigui oumentá pa semper ya ku e ta instituí lei sin implementá nan. (Eklesiástes 8:11) Pero nos sa ku Dios lo no permití maldat pa semper, i esei ta duna nos un speransa firme pa futuro. Dios a primintí ku lo e eliminá tur esnan ku ta persistí den nan maldat pa asina “e humildenan” por disfrutá di bida eterno riba tera. Esei tabata su propósito desde un prinsipio.—Salmo 37:10, 11, 29. *

[Nota]

[Komentario na página 6]

Dios lo ke pa nos ador’é djis pasobra nos tin miedu di haña kastigu?

[Rekonosementu pa potrèt na página 6]

Engravings by Doré