Ta Kastigu di Dios?
“Ta duel mi mashá pa e víktimanan di e desaster, pero ami ta kere [ku esaki] ta tembatsu (kastigu di Dios).” Esei ta loke un lider polítiko hapones a bisa despues ku un temblor di un magnitut di 9,0 i un tsunami a asotá Hapon na mart 2011.
Despues di e temblor ku a tuma lugá na Haiti na yanüari 2010 i ku a kousa morto di mas ku 220.000 hende, un tele-evangelista famoso a bisa ku esei tabata pasobra Haiti a “sera un pakto ku Diabel” i ku haitianonan mester “kombertí” i sirbi Dios.
“Dios ke rebibá nos konsenshi sin heful ku a kria kayo.” Esei ta loke un pastor katóliko a bisa despues di e tragedia ku a tuma lugá na Manila, Filipinas, kaminda 79 hende a muri ora un multitut a drenta pániko. Un korant di e pais a raportá ku ‘21 porshento di adulto ta kere ku avalancha di lodo, tifon i otro desasternan natural ku konstantemente ta asotá nan pais ta medionan ku Dios ta usa pa ekspresá su rabia.’
E KREENSIA ku Dios ta usa desaster natural pa kastigá hende malbado no ta nada nobo. Por ehèmpel, na aña 1755, despues ku 60.000 i piku hende a muri na Lisboa, Portugal, den un temblor, un kandela i un tsunami, Voltaire, un filósofo bon konosí, a puntra: “Akaso tin mas maldat na Lisboa ku na Paris, un lugá kaminda hopi hende ta hiba un bida masha inmoral?” Sí, miónes di hende ta puntra nan mes si Dios ta usa desaster natural pa kastigá hende. De echo, den hopi pais, hende ta bisa ku desaster natural ta obra di Dios.
En bista di tur esaki, e pregunta ta lanta: ‘Di bèrdat Dios ta usa desaster natural pa kastigá hende? E tantísimo desasternan ku ta tuma lugá e último tempunan akí ta kastigu di Dios?’
Den nan afan pa kulpa Dios, algun hende ta referí na relatonan di Beibel kaminda Dios a usa forsa di naturalesa pa trese destrukshon. (Génesis 7:17-22; 18:20; 19:24, 25; Numbernan 16:31-35) Pero un análisis profundo di e relatonan akí ta mustra ku den kada un di e kasonan ei tabatin tres faktor determinante. Pa di promé, Dios a spièrta hende promé ku el a aktua. Di dos, distinto for di e desasternan natural djawe ku ta mata tantu bon hende komo mal hende, destrukshon kousá pa Dios semper tabata selektivo. Ta solamente esnan ku no kier a bira di nan mal kaminda òf esnan ku a nenga di hasi kaso di Dios su spièrtamentu a ser destruí. Di tres, Dios a perkurá un manera pa hende inosente skapa.—Génesis 7:1, 23; 19:15-17; Numbernan 16:23-27.
No tin evidensia ku ta Dios ta kousa e kantidat inkontabel di desaster ku ta afektá bida di miónes di hende awe. Kiko anto ta e kousa di e desasternan natural, ku aparentemente ta oumentando dia pa dia? Lo yega e dia ku lo no tin desaster mas? E siguiente artíkulonan lo kontestá e preguntanan ei.
