‘E demoñonan a bai serka tur rei na mundu, i nan a reuní e reinan na un lugá ku na hebreo yama Armagedon.’ (Lèter skùin ta di nos.)—REVELASHON 16:14, 16, Beibel na papiamentu koriente.

ARMAGEDON ta nòmber di un lugá. Pero ta parse ku e lugá ei nunka a yega di eksistí.

Kiko ta e berdadero nifikashon di e palabra “Armagedon” anto? Dikon hopi bes e ta ser asosiá ku un suseso manera, por ehèmpel, guera?

Reuní na un Lugá Ku Yama Armagedon

E palabra hebreo Har–Magedon ta nifiká literalmente “Seru di Meguido.” Aunke nunka a eksistí un seru ku yama Meguido, tabatin un lugá sí ku tabata yama asina. E tabata situá na un krusada stratégiko den parti nortwèst kaminda e israelitanan tabata biba. Hopi guera desisivo a tuma lugá serka di e lugá ei. P’esei, e nòmber Meguido ta ser asosiá ku guera. *

Sinembargo, loke ta importante no ta kua guera a tuma lugá na Meguido sino e motibu pakiko a bringa e gueranan ei. Meguido tabata parti di e Tera Primintí ku Yehova Dios a duna e israelitanan. (Éksodo 33:1; Hosue 12:7, 21) Dios a hura ku lo el a defendé su pueblo kontra  nan enemigunan, i el a hasié. (Deuteronomio 6:18, 19) Por ehèmpel, ta na Meguido Yehova a defendé e israelitanan milagrosamente kontra e ehérsito invasor kananeo di Rei Jabin i su hefe di ehérsito Sísara.—Huesnan 4:14-16.

P’esei, e palabra “Armagedon” tin un gran nifikashon den sentido simbóliko. E ta ser asosiá ku un guera den kua dos ehérsito poderoso ta konfrontá otro.

E profesia di Revelashon ta papia di un tempu den futuro serkano ora ku Satanas i su demoñonan lo reuní gobièrnunan humano i nan ehérsitonan pa oponé e pueblo di Dios i nan trabou abiertamente. E ora ei, Dios lo derotá e enemigunan ei, i miónes di hende lo pèrdè nan bida.—Revelashon 19:11-18.

Awor, dikon un Dios ku Beibel ta deskribí komo “un Dios di pordon, yen di grasia i kompashon” lo kousa morto di asina tantu hende? (Nehemías 9:17) Pa nos por komprondé esei, nos tin ku kontestá tres pregunta: (1) Ta ken ta inisiá e guera? (2) Dikon Dios ta intervení? (3) Kiko lo ta e resultado di e konfrontashon ei pa planeta Tera i su habitantenan?

1. KEN TA INISIÁ E GUERA?

Na Armagedon, no ta Dios ta esun ku ta ataká promé. Mas bien, Dios lo intervení pa defendé bon hende for di esnan ku di otro manera lo destruí nan. Esnan ku ta inisiá e konfrontashon akí ta “e reinan di henter e tera habitá,” e lidernan di mundu. Dikon e gobernantenan di mundu i nan ehérsitonan ta ataká Yehova su sirbidónan? Pasobra Satanas ta usa nan manera marioneta pa hasi esei.—Revelashon 16:13, 14; 19:17, 18.

Awendia vários pais ta duna masha balor na libertat di ekspreshon i di religion. P’esei, e idea di ku gobièrnunan lo oponé òf asta kaba ku movementunan religioso por parse masha irealístiko. No opstante, e tipo di atakenan ei a tuma lugá den siglo 20 i ta tumando lugá awe tambe. * Ma tin por lo ménos dos diferensia grandi entre e atakenan ei i esun ku lo hiba na Armagedon. Pa di promé, e atake ei lo tuma  lugá rònt mundu. Di dos, e manera ku Yehova lo intervení lo ta di un magnitut sin presedente. (Yeremías 25:32, 33) Beibel ta deskribí e konfrontashon ei komo “e guera ku lo tuma lugá riba e gran dia di Dios, e Todopoderoso.”

2. DIKON DIOS TA INTERVENÍ?

Yehova ke pa tur hende ku ta ador’é buska pas i stima nan enemigunan. (Mikéas 4:1-3; Mateo 5:43, 44; 26:52) Pues, nan lo no usa arma pa defendé nan mes ora e atake kruel akí tuma lugá. Si Dios no intervení pa skapa su pueblo, nan enemigunan lo kaba ku nan. Anto si e agresornan logra kaba ku su pueblo, lo parse komo si fuera Yehova ta inhustu i ku e no tin amor ni poder. Pues, Yehova Dios su nòmber, òf reputashon, ta den wega. P’esei, Yehova nunka lo bandoná su pueblo!—Salmo 37:28, 29.

Komo ku Dios no ke destruí ningun hende, e ta bisa nan di antemano kiko e ta bai hasi. (2 Pedro 3:9) Mediante e relatonan konserbá den Beibel, e ta kòrda nos ku el a yega di tuma vengansa den pasado ora su pueblo a ser ataká. (2 Reinan 19:35) Ademas, Beibel ta spièrta nos ku ora Satanas i su marionetanan humano ataká e pueblo di Dios, Yehova lo usa su poder atrobe pa defendé su pueblo. De echo, hopi tempu pasá, e Palabra di Dios a profetisá ku Yehova lo destruí e malbadonan. (Proverbionan 2:21, 22; 2 Tesalonisensenan 1:6-9) Ora esei sosodé, e agresornan lo komprondé bon kla ku ta kontra e Todopoderoso nan ta bringando.—Ezekiel 38:21-23.

3. KIKO LO TA E RESULTADO DI E KONFRONTASHON EI?

E guera di Armagedon lo nifiká salbashon pa miónes di hende. Lo e introdusí un periodo di pas riba tera.—Revelashon 21:3, 4.

E buki di Revelashon ta bisa ku “un multitut grandi,” ku hende no por konta, lo sobrebibí e konflikto akí. (Revelashon 7:9, 14) Bou di e guia di Dios, e hendenan akí lo yuda hasi henter tera un paradeis manera tabata Yehova su propósito for di prinsipio.

Pero na ki tempu nan lo ataká e pueblo di Dios?

[Nota]

[Plachi na página 6]

Den pasado, Yehova a defendé su pueblo

[Plachi na página 7]

Yehova lo bolbe defendé su pueblo na Armagedon