▪ Algun hende a kere ku planeta Tera lo a ser destruí dia 21 di òktober 2011. Pero esei no a sosodé. Pues, e profesia di Harold Camping, un lokutor di radio na Merka, no a kumpli. Harold a pronostiká ku e Dia di Huisio lo a tuma lugá dia 21 di mei 2011. Segun é, riba e dia ei, un temblor devastador lo a sagudí henter mundu, i despues di sinku luna, riba 21 di òktober 2011, tera lo a ser destruí kompletamente.

Pero tera lo no ser destruí nunka. E Kreador lo no permití esei. Su Palabra ta bisa: “Bo a establesé tera, i e ta keda para.”—Salmo 119:90.

No opstante, algun lesadó di Beibel ta pretendé ku Dios lo destruí tera ku kandela. Pa apoyá nan punto di bista, nan ta usa 2 Pedro 3:7 i 10, ku ta bisa: “E shelu i tera ku ta eksistí awor ta reservá pa kandela i ta wardá pa e dia di huisio i di destrukshon di hende malbado. . . . Sinembargo, e dia di Yehova lo bini manera un ladron, den kua shelu lo pasa bai ku un boroto inmenso, anto e elementonan, siendo intensamente kayente, lo larga kaba na nada, i tera i e kosnan riba dje lo keda eksponé.” Pero ta literalmente nos tin ku komprondé e palabranan di apòstel Pedro?

Nò! Dikon nò? Pasobra e interpretashon di e versíkulonan akí mester kuadra ku e restu di e karta di Pedro i ku e otro bukinan di Beibel. Ademas, un komprondementu literal lo nifiká ku shelu—universo ku su míles di miónes di strea i otro materia—lo dirti kaba na nada djis pa motibu di dos pipita di hende malbado ku ta biba riba tera. Abo lo destruí henter un playa djis pasobra ún pipita di santu no ta na bo agrado? Esaki lo no tin sentido, no ta bèrdat? Yehova tampoko lo no destruí henter su kreashon, esta henter e universo, djis pasobra algun hende riba tera a rebeldiá kontra dje.

Ademas, e punto di bista ei ta kompletamente kontrali na loke Hesukristu a bisa, esta, ku “felis ta esnan ku tin un genio suave, ya ku nan lo haña e tera.” (Mateo 5:5; Salmo 37:29) Bo ta kere ku un tata amoroso lo konstruí un bunita kas pa su famia i despues peg’é na kandela? (Salmo 115:16) Klaru ku nò; esei lo ta apsurdo! Pues, Yehova, nos Kreador i Tata amoroso, tampoko lo no hasi algu asina.—Salmo 103:13; 1 Huan 4:8.

Pedro a usa e término “tera” den sentido figurativo pa referí na sosiedat humano—den e kaso akí, na hende malbado. Anto ripará ku Pedro ta kompará e binidero destrukshon ku e Diluvio di tempu di Noe. (2 Pedro 3:5, 6) E tempu ei, ta hende malbado so a ser destruí. Tera no a ser destruí, i e hòmber hustu Noe i su famia a skapa. E término “shelu” tambe a ser usá den sentido simbóliko. Den e kaso akí, “shelu” ta referí na gobernashon humano. Pues, ta hende malbado ku no ke kambia lo haña destrukshon. Ademas, Dios lo destruí gobièrnu humano i lo remplasá esakinan ku su gobièrnu, òf Reino, selestial.—Daniel 2:44.

Pues, tera lo ser destruí? Nò. Loke lo ser eliminá ta e tera simbóliko, esta sosiedat humano malbado. Tera i hende hustu den bista di Dios lo permanesé pa semper.—Proverbionan 2:21, 22.