E artíkulo akí ta trata algun pregunta ku kisas bo tin i ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Kiko ta un angel?

Un angel ta un kriatura ku ta biba den shelu. Nan forma di bida ta mas elevá ku esun di hende. E Dios berdadero, kende tambe ta un spiritu, a krea angel promé ku el a krea tera. (Yòb 38:4, 7; Mateo 18:10) Yehova tin miónes di angel fiel.—Lesa Salmo 103:20, 21; Daniel 7:9, 10.

2. Angelnan ta yuda hende?

Den tempu bíbliko, angelnan a yuda e hòmber hustu Lòt. E tabata biba den un stat pèstá ku mal hende ku Dios tabata bai destruí. Dos angel a bisa Lòt i su famia pa hui for di e stat. Algun hende no a tuma e spièrtamentu ei na serio. Pero Lòt i su yu muhénan sí a hasi kaso di e angelnan ku Dios a manda, i nan a sobrebibí.—Lesa Génesis 19:1, 13-17, 26.

Segun Beibel, awendia tambe angelnan ta yuda hende. Kon asina? Nan ta dirigí esnan ku fielmente ta kumpli ku e trabou di prediká e bon notisia di e Reino di Dios. (Mateo 24:14) E mensahe ku nos ta prediká ta enserá un spièrtamentu tambe. E spièrtamentu akí ta mes serio ku esun ku Lòt a haña. Dikon? Pasobra ta Dios ta spièrta nos mediante su angelnan.—Lesa Revelashon 1:1; 14:6, 7.

Un otro manera ku Dios ta usa su angelnan ta pa fortalesé nos durante prueba. El a usa un angel pa fortalesé Hesus tambe.—Lesa Lukas 22:41-43.

Pronto Dios lo usa su angelnan pa eliminá tur hende malbado, kendenan ta kousa sufrimentu. Esaki lo ta un alivio pa humanidat!—Lesa 2 Tesalonisensenan 1:6-8.

  3. Ki influensia e demoñonan tin?

Meskos ku hopi hende aki riba tera ta desobedesé Dios, asina tambe hopi angel a yega di rebeldiá kontra Dios. (2 Pedro 2:4) Angel desobediente ta ser yamá demoño. Esun prinsipal ta Satanas, e Diabel. Satanas i su demoñonan ta gaña henter mundu.—Lesa Revelashon 12:9.

Satanas ta usa e sistema komersial korupto akí, gobièrnu i religion falsu pa influensiá hende i apartá nan for di Dios. Pues, ta Satanas ta responsabel pa e inhustisia, violensia i sufrimentu ku tin na mundu.—Lesa 1 Huan 5:19.

4. Kon demoño ta gaña hende?

Satanas ke laga hende kere ku ora un persona muri e ta bira spiritu i ku e por komuniká ku hende bibu. Pero Beibel ta siña ku hende morto no por hasi nada. (Eklesiástes 9:5) P’esei pa gaña hende, hopi bes e demoñonan ta imitá stèm di sernan kerí ku a muri. (Isaías 8:19) Ademas, nan ta usa medio spiritista, miradó di destino, adivinadónan i astrólogonan pa gaña hende. E Palabra di Dios ta spièrta nos pa keda leu di tal práktikanan. P’esei, nos mester deshasí di tur loke tin di haber ku demoño i kosnan okulto.—Lesa Deuteronomio 18:10, 11; Echonan 19:19.

Si nos ta stima Yehova, nos no tin nodi di tin miedu di demoño. Pasobra si nos ta studia Dios su Palabra i ta hasi loke e ta bisa, nos por oponé Diabel i hala serka Dios, esta, tin un bon relashon kuné. I kòrda ku Yehova ta mas poderoso ku e demoñonan, i den momentonan difísil, e por fortalesé nos pa medio di su angelnan.—Lesa Salmo 34:7; Santiago 4:7, 8.

Pa mas informashon, wak kapítulo 10 di e buki akí, Kiko Beibel Ta Siña Realmente?, publiká pa Testigunan di Yehova.