1. Kiko ta bini na hende su mente ora nan tende e palabra “esklabo”?

UN ESKRITOR griego di obra teatral a yega di bisa un 2.500 aña pasá: ‘Niun hende no ta bira esklabo di nan propio boluntat.’ Hopi hende awe ta di akuerdo kuné. Ora hende tende e palabra “esklabo,” nan ta pensa riba hòmber- i muhénan ku ta ser obligá pa sirbi otro hende, ku ta ser maltratá i ku ta traha pa benefisiá nan doño, kende ta manda riba nan.

2, 3. (a) Kon e esklabonan di Kristu ta ser tratá? (b) Ki preguntanan e artíkulo akí lo kontestá?

² No opstante, Hesus a bisa ku su disipelnan lo ta esklabo, esta, sirbidónan humilde. Pero nan no ta ser humiá ni maltratá. Al kontrario, nan doño ta konfia nan, onra nan i respetá nan. Wak por ehèmpel kiko Kristu a bisa di un “esklabo.” Djis promé ku Su morto, el a bisa ku lo e duna e esklabo “fiel i prudente” ei sierto tareanan importante.—Mat. 24:45-47.

³ Den un otro relato, Beibel ta yama e esklabo ei “mayordomo.” (Lesa Lukas 12:42-44.) Mayoria di kristian awe no ta forma parti di “e mayordomo fiel” ei. Sinembargo, e Skritura ta mustra ku, den un sentido, tur sirbidó di Dios ta mayordomo. Awor, ki responsabilidat esei ta trese kuné? Kon nos mester mira e responsabilidatnan ei? Pa kontestá e preguntanan akí, laga nos analisá e papel ku mayordomonan tabatin den pasado.

4, 5. Ki responsabilidatnan un mayordomo tabatin den tempu bíbliko? Duna algun ehèmpel.

⁴ Den tempu bíbliko, hopi biaha, un mayordomo  tabata un esklabo konfiabel ku tabatin e responsabilidat di supervisá e kas òf asuntunan di negoshi di su doño: E tabata manehá propiedat i plaka di su doño i tabatin outoridat riba e otro sirbidónan. Sí, un mayordomo tabatin hopi outoridat. Laga nos tuma por ehèmpel Eliezer, e mayordomo di Abraham. Abraham tabatin hopi pertenensia i a konfi’é ku tur. I probablemente ta é Abraham a manda Mesopotamia pa skohe un kasá pa su yu hòmber Isak. Esei tabata un responsabilidat grandi.—Gén. 13:2; 15:2; 24:2-4.

⁵ Yosef, e bisañetu di Abraham, tabata mayordomo di Potifar. (Gén. 39:1, 2, 4) Ku tempu, Yosef tambe tabatin un mayordomo, kende tabata enkargá ku e asuntunan di su kas. Ta e mayordomo ei a atendé Yosef su dies rumannan i a perkurá pa nan ora nan a yega Egipto. I riba òrdu di Yosef, el a maniobrá asuntu ku un kopa di plata pa pone Yosef su rumannan na prueba. E ehèmpelnan akí ta mustra kuantu un doño tabata konfia su mayordomo.—Gén. 43:19-25; 44:1-12.

6. Ki responsabilidatnan ansianonan tin?

⁶ Siglonan despues, apòstel Pablo a skirbi ku superintendente-, òf ansianonan, ta “mayordomo di Dios.” (Tito 1:7) Ansianonan ta ser nombrá pa pastoriá “e tou di Dios,” p’esei nan ta duna guia i ta dirigí e kongregashon kristian. (1 Ped. 5:1, 2) Ta klaru ku ansianonan tin diferente responsabilidat den e organisashon di Dios. Por ehèmpel, mayoria di ansiano awe ta sirbi ún kongregashon so, miéntras ku superintendentenan biahero ta sirbi hopi kongregashon. Anto e Komité di un Sukursal ta sirbi e kongregashonnan di ún òf mas pais. No opstante, tur ansiano mester kumpli ku nan asignashonnan fielmente; nan tur tin ku “duna kuenta” na Dios.—Heb. 13:17.

7. Kon nos por sa ku, den un sentido, tur kristian ta mayordomo?

⁷ Pero kiko di tur e kristiannan fiel ku no ta ansiano? Apòstel Pedro a skirbi un karta ku ta konta pa tur kristian, bisando: “Te na e grado ku kada un di boso a risibí un don, us’é pa sirbi otro komo bon mayordomo di e bondat inmeresí di Dios ku ta ser ekspresá na vários manera.” (1 Ped. 1:1; 4:10) Dios, den su bondat inmeresí, a duna kada un di nos don, abilidat, kapasidat òf sierto talentonan ku nos por usa na benefisio di nos rumannan den fe. Pues, tur sirbidó di Dios ta mayordomo. P’esei, e ta konfia i ta respetá nos, i nos tin ku hasi bon uso di loke el a duna nos.

8. Menshoná un prinsipio importante ku nos tin ku tene na mente.

⁸ Awor, laga nos trata tres prinsipio ku tur mayordomo, òf kristian berdadero, mester tene na mente. E promé ta: Nos tur ta pertenesé na Dios i mester duna kuenta na dje. Pablo a skirbi: “Boso no ta pertenesé na boso mes: Dios a kumpra boso pa un preis haltu.” E preis akí ta e sanger di Kristu ku el a duna komo sakrifisio. (1 Kor. 6:19, 20) Pues, komo ku nos tur ta pertenesé na Yehova, nos tin ku obedesé su mandamentunan, i su mandamentunan no ta pisá. (Rom. 14:8; 1 Huan 5:3) Ademas, nos ta esklabo di Kristu tambe. I meskos ku e mayordomonan den tempu bíbliko, nos tin hopi libertat. Pero nos no tin libertat apsoluto. Nos tin ku sigui instrukshon. Pues, maske kuantu privilegio òf responsabilidat nos tin den e organisashon di Dios, nos ta keda sirbidó di Dios i di Kristu.

9. Kon Hesus a ilustrá loke un doño ta spera di su esklabo?

⁹ Awor, kiko un doño ta spera di su esklabo? Laga nos wak kon Hesus a ilustrá esei. Un biaha, el a konta su disipelnan di  un esklabo ku a yega kas despues di un dia largu di trabou. Kiko bo ta kere e doño a bisa su esklabo? “Bini aki mesora i sinta kome na mesa?” Nò, el a bisa e esklabo: “Prepará algu pa mi kome, bisti un frèskòt i sirbi mi te ora mi kaba di kome i bebe, i despues abo por kome i bebe.” Ki lès Hesus kier a siña su disipelnan? El a splika: “Asina tambe, despues ku boso a hasi tur loke a manda boso, boso mester bisa: ‘Nos ta esklabo ku no ta sirbi pa nada. Loke nos a hasi ta loke nos tabatin deber di hasi.’”—Luk. 17:7-10.

10. Kon nos por sa ku Yehova ta apresiá nos esfuersonan pa sirbié?

¹⁰ Sin duda, Yehova ta apresiá e esfuersonan ku nos ta hasi pa sirbié. Beibel ta sigurá nos esei. E ta bisa: “Dios no ta inhustu pa lubidá boso trabou i e amor ku boso a mustra pa su nòmber.” (Heb. 6:10) Loke Yehova ta rekerí di nos no ta irasonabel ni pisá. Tur loke e ta rekerí ta pa nos mes bon. Pero, kòrda ku Hesus a bisa ku un esklabo no mester trata di agradá su mes promé. Pues, e punto ta esaki: Ora nos dediká nos mes na Dios, nos ta skohe pa pone su interesnan na promé lugá den nos bida. Abo no ta di akuerdo ku esei?

11, 12. Komo mayordomo, ki kualidat nos mester desplegá i kiko nos mester evitá?

¹¹ E di dos prinsipio ta: Komo mayordomo, nos tur ta kumpli ku e mesun rekisitonan di Dios. Ta bèrdat ku ta algun ruman so tin sierto responsabilidat den e kongregashon kristian. Pero den mayoria di kaso, nos tur tin e mesun obligashonnan. Por ehèmpel, komo Testigu di Yehova i disipel di Kristu, nos tur tin e obligashon di stima otro. Hesus a bisa ku nos amor pa otro ta identifiká nos komo kristiannan berdadero. (Huan 13:35) Pero no ta nos rumannan den fe so nos ta stima. Nos ta hasi esfuerso pa mustra amor tambe na personanan ku no ta Testigu. Esaki ta algu ku nos tur por i mester hasi.

¹² Yehova ke tambe pa nos tin un bon kondukta. P’esei, nos mester evitá tur kondukta i estilo di bida ku e Palabra di Dios ta kondená. Pablo a skirbi: “Ni fornikadó, ni adoradó di dios falsu, ni hende ku ta kometé adulterio, ni hòmber ku ta someté nan mes na aktonan innatural, ni hòmber ku ta drumi ku hòmber, ni ladron, ni hende golos, ni buraché, ni hende ku ta kana zundra, ni hende ku ta chantagiá otronan lo no risibí e Reino di Dios.” (1 Kor. 6:9, 10) Nos tin ku atmití sí ku nos mester hasi esfuerso pa biba na armonia ku e normanan hustu di Dios. Pero tal esfuerso ta bale la pena, pasobra e ta benefisiá nos mashá: Nos lo tin, entre otro, un mihó kalidat di bida, un mihó salú, bon relashon ku otro hende i e aprobashon di Dios.—Lesa Isaías 48:17, 18.

13, 14. Ki responsabilidat tur kristian tin, i kon nos mester mira e responsabilidat ei?

¹³ Kòrda ku un mayordomo mester a traha tambe. Pues, nos tambe tin ku traha. Dios a duna nos un regalo masha presioso: konosementu di e bèrdat. I e ta spera ku nos ta kompartí e konosementu akí ku otro hende. (Mat. 28:19, 20) Pablo a skirbi: “Laga hende konsiderá nos komo sirbidónan ku ta traha bou di Kristu i mayordomonan enkargá ku e sekretonan sagrado di Dios.” (1 Kor. 4:1) Pablo a rekonosé ku e echo ku e tabatin konosementu di e “sekretonan sagrado,” òf bèrdatnan bíbliko, a dun’é un responsabilidat serio i ku e mester a siña esakinan na otro hende na un manera diligente. Esei ta loke su Maestro, Hesukristu, tabata ke pa e hasi.—1 Kor. 9:16.

¹⁴ Ademas, ora nos ta siña otro hende e bèrdat, nos ta demostrá nos amor pa nan. Ta klaru ku no ta tur kristian por hasi  mes tantu den sirbishi pasobra nos tur no tin mesun sirkunstansia. I Yehova ta komprondé esei. Importante pa Yehova ta ku nos ta hasi tur loke nos por. Di e manera ei, nos ta desplegá amor inegoista pa Dios i pa nos próhimo.

15-17. (a) Dikon ta importante pa un mayordomo ta fiel? (b) Kon Hesus a ilustrá e konsekuensianan di infieldat?

¹⁵ E di tres prinsipio ku nos mester tene na mente ta: Nos mester ta fiel i konfiabel. Aunke un mayordomo por tin masha hopi bon kualidat i abilidat, esakinan lo no sirbié di nada si e ta iresponsabel òf desleal na su doño. Pa un mayordomo por ta efikas i eksitoso, e mester ta fiel. Kòrda ku apòstel Pablo a skirbi: “Loke ta ser ferwagt di un mayordomo ta pa e ta fiel.”—1 Kor. 4:2.

¹⁶ Si nos ta fiel, nos lo ser rekompensá sigur. Pero si nos ta infiel, nos lo sufri daño. Hesus a ilustrá esaki den su parábola di e talentonan. E esklabonan fiel ku a “hasi negoshi” ku e plaka ku nan doño a duna nan a ser bendishoná rikamente i a risibí elogio for di nan doño. Pero pa e doño, e esklabo ku a aktua iresponsabel tabata un persona “floho i malbado,” un persona “ku no ta sirbi pa nada.” Ademas, a kita e talento ku e tabatin for di dje, i nan a tira e esklabo ei pafó.—Lesa Mateo 25:14-18, 23, 26, 28-30.

¹⁷ Na un otro okashon, Hesus a bolbe enfatisá e konsekuensianan di infieldat. El a bisa: “Tabatin un hòmber riku ku tabatin un mayordomo. Nan a akusá e mayordomo akí di ta malgastá e hòmber su biennan. Di manera ku e hòmber a yama e mayordomo i bis’é: ‘Ta kiko e kos ku mi ta tende di bo akí? Duna mi un relato di loke bo a  hasi komo mayordomo, pasobra bo no por manehá e kas mas.’” (Luk. 16:1, 2) Komo ku e mayordomo a malgastá e biennan di su doño, el a disidí di kit’é for di trabou. E pasashi bíbliko akí ta siña nos un bon lès: Semper nos mester ta fiel na Dios i kumpli ku loke e ta spera di nos.

18. Dikon nos no mester kompará nos mes ku otro hende?

¹⁸ Nos kada un por puntra nos mes: ‘Ki klase di mayordomo mi ta?’ No opstante, nos no mester kompará nos mes ku otro hende. Beibel ta konsehá: “Laga kada un di boso analisá su mes akshonnan, anto e ora ei lo e tin motibu pa ta masha kontentu ku su mes, sin kompará su mes ku otro hende.” (Gal. 6:4) En bes di kompará nos echo- òf obranan ku esnan di otro hende, nos mester enfoká riba loke nos por hasi. Esaki ta un protekshon pa nos mes, pasobra e ta evitá ku nos ta desanimá òf bira orguyoso. Anto ora nos ta analisá nos mes, nos mester kòrda ku sirkunstansianan sa kambia. Kisas, debí na nos edat, salú òf sierto responsabilidatnan, nos no por hasi mes tantu ku nos tabata hasi ántes. Di otro banda, por resultá ku nos por hasi mas ku ántes. Si ta asina, pakiko no hasi mas den sirbishi na Yehova?

19. Dikon nos no mester desanimá si nos no haña sierto privilegio?

¹⁹ Awor, laga nos papia di e privilegionan ku nos tin òf ku nos ta deseá. Kisas un ruman hòmber ta deseá di sirbi komo ansiano den kongregashon òf di duna parti na asamblea òf kongreso. Ta bon pa traha duru pa kualifiká pa privilegionan asina; sinembargo, nos no mester desanimá si nos no haña esakinan ora nos a spera. Pa motibunan ku kisas nos no ta komprondé aworakí, nos lo mester warda un poko mas. Kòrda riba Moises. Na dado momento, el a kere ku e tabata kla pa saka e israelitanan for di Egipto, pero e mester a warda 40 aña mas. Durante e tempu akí, el a haña chèns di traha riba kualidatnan ku e tabatin mester pa dirigí un pueblo kabesura i rebelde.—Echo. 7:22-25, 30-34.

20. Ki lès nos por siña for di e ehèmpel di Jonatan?

²⁰ Kisas, nunka nos lo risibí sierto privilegio. Esei ta loke a pasa ku Jonatan. Siendo ku e tabata yu hòmber di Saul, é lo mester a bira rei di Israel despues di su tata. Pero Dios a skohe David, kende tabata mas yòn ku Jonatan, pa bira rei. Kon Jonatan a reakshoná? El a aseptá e desishon ku Dios a tuma, a sostené David i asta a riska su bida p’e. El a bisa David: “Lo bo bira rei di Israel i ami lo ta na di dos lugá.” (1 Sam. 23:17, BPK) Kiko bo por siña for di e ehèmpel di Jonatan? Jonatan a aseptá e situashon, i distinto for di su tata, e no a envidiá David. Pues, en bes di envidiá e privilegionan ku otronan tin, nos mester hasi esfuerso pa asumí nos responsabilidatnan lo mihó ku nos por. Nos por ta sigur ku den e mundu nobo Yehova lo sòru pa tur nos deseonan ku ta na armonia ku su boluntat ser satisfasé.

21. Kon nos mester mira nos trabou di mayordomo?

²¹ Laga nos nunka lubidá ku, komo mayordomo fiel, nos no ta esklabo di un doño kruel. Al kontrario, Yehova ta konfia nos i ta onra nos ku un trabou importante ku nunka mas lo ser ripití: e trabou di prediká e bon notisia durante e último dianan di e era akí. I nos tin hopi libertat pa disidí kon nos por kumpli ku nos responsabilidatnan kabalmente. Pues anto, laga nos ta mayordomonan fiel ku ta balorá e privilegio ku nos tin di por sirbi e Haltísimo di henter universo.