Pregunta 3: Dikon Dios Ta Laga Mi Sufri?
IAN su tata tabata un buraché. Aunke Ian tabatin tur loke e mester den sentido material, e tabata falta e kariño i afekto di su tata, algu ku e tabata deseá mashá. El a bisa: “E motibunan prinsipal pakiko mi no tabatin masha kariño p’e tabata su bebementu i e manera ku tabata trata mi mama.” Segun ku Ian tabata bira grandi, el a kuminsá duda ku Dios ta eksistí. El a rasoná: “Si Dios realmente ta eksistí, dikon e ta laga hende sufri?”
Dikon ta normal ku hende ta hasi e pregunta ei?
Wèl, asta hende ku tin un bida relativamente fásil, por sinti nan molestiá ora nan mira hende inosente sufri. Sinembargo, e pregunta relashoná ku sufrimentu ta bira importante pa bo ora abo mes haña bo ku problema, manera tabata e kaso ku Ian, òf ora un ser kerí di bo bira malu òf muri.
Kon algun hende ta kontestá e pregunta ei?
Algun hende ta kere ku Dios ta laga nos sufri pa tèst nos i pa siña nos bira humilde i bondadoso. Otronan ta kere ku hende ta sufri den e bida akí pa motibu di e pikánan ku nan a kometé den nan bida anterior.
Kiko e kontestanan ei ta enserá?
Ku Dios ta kruel i ku e no tin kunes ku hende ta sufri, i esei ta pone ku ta difísil pa nos stim’é.
Kiko Beibel ta siña?
Beibel ta mustra bon kla ku no ta Dios ta kousa sufrimentu. E ta bisa: “Ora un hende ta pasa den prueba, e no mester bisa: ‘Dios ta pone mi na prueba.’ Pasobra ningun hende no por pone Dios na prueba ku kos malu, i e mes tampoko no ta pone ningun hende na prueba ku kos malu.” (Santiago 1:13) De echo, e idea di ku Dios ta kulpabel pa sufrimentu no ta kuadra ku e deskripshon ku Beibel ta duna di Dios su personalidat. Dikon nò?
Wèl, un di e kualidatnan prinsipal di Dios ta amor. (1 Huan 4:8) Pa enfatisá e punto ei, Beibel ta kompará Dios su sintimentunan ku esnan di un mama ku tin yu na pechu. Segun Beibel, Dios ta puntra: “Un muhé por lubidá su yu ku e ta kria na pechu, i no tene kompashon ku e yu di su mondongo?” I Dios mes ta kontestá: “Esakinan por lubidá, ma ami sí lo no lubidá bo.” (Isaías 49:15) Bo por imaginá bo ku un mama ta perhudiká su yu deliberadamente? Al kontrario, un mama ku ta stima su yu ta hasi tur loke e por pa aliviá sufrimentu di su yu. Awèl, Dios ta meskos: e no ta pone hende inosente sufri.—Génesis 18:25.
No opstante, hende inosente ta sufri awe. Esei kisas ta pone bo puntra: ‘Si Dios ta interesá den nos, i e ta todopoderoso, dikon e no ta kaba ku e kousanan di sufrimentu?’
Wèl, ta ku bon motibu Dios ta permití sufrimentu sigui te ainda. Laga nos konsiderá djis un di e motibunan ei: Hopi bes, ta hende ta pone otro sufri. Hopi abusadó i tirano ku ta kousa otronan doló no ta dispuesto pa kambia. Pues, pa Dios eliminá un di e mayor kousanan di sufrimentu, e tin ku destruí hende asina.
Anto apòstel Pedro a splika dikon Dios no a destruí e malbadonan ei ainda; el a bisa: “Yehova no ta tarda pa kumpli ku su promesa, manera algun hende ta kere; mas bien, e tin pasenshi ku boso pasobra e no ta deseá pa ningun hende ser destruí, ma e ta deseá pa tur haña chèns di arepentí.” (2 Pedro 3:9) Pues, Yehova Dios su pasenshi ta un ekspreshon di su amor i miserikòrdia.
Pero pronto Yehova Dios lo tuma akshon. Lo e ‘paga ku tribulashon esnan ku ta kousa tribulashon’ pa hende inosente. Sí, esnan ku ta pone otronan sufri inhustamente “lo sufri e kastigu hudisial di destrukshon eterno.”—2 Tesalonisensenan 1:6-9.
Ian, kende nos a menshoná anteriormente, a haña kontesta satisfaktorio pa su preguntanan enkuanto sufrimentu. Loke el a siña a kambia su manera di mira bida. Bo por lesa su eksperensia ku ta kuminsá na página 13 di La Atalaya di 1 di novèmber 2012.
