JONATHAN, un merikano ku mayornan koreano, a bira víktima di prehuisio rasial tempu ku e tabata mucha. Ora el a bira grandi, el a buska un lugá pa bai biba kaminda hende lo no diskrimin’é debí na su rasa òf aparensia. P’esei, despues ku el a bira dòkter, el a muda bai un pueblo den e parti nort di Alaska, Merka, kaminda su aparensia físiko no tabata muchu diferente for di mayoria di su pashèntnan. El a karga speransa ku einan sí lo e skapa di prehuisio.

Pero, el a pèrdè tur speransa ora e tabata yuda un pashènt, un hende muhé di 25 aña di edat, ku tabata den koma. Ora e persona akí a sali for di koma i a mira Jonathan, el a usa un palabra masha ofensivo ku a revelá su despresio pa koreano. E suseso akí a pone Jonathan realisá ku tur su esfuerso pa skapa di diskriminashon tabata enbano.

Loke Jonathan a pasa aden ta enfatisá un realidat masha tristu: Unda ku bo bai na mundu tin prehuisio. Ta parse ku kaminda tin hende, tin prehuisio.

 Apesar ku prehuisio ta plamá tur kaminda, tòg, mayoria di hende ta lihé pa konden’é. Ki un kontradikshon! Kon un kos ku mayoria di hende tin rabia riba dje por ta asina komun? Aparentemente, hopi hende ku ta kondená prehuisio no ta ripará ku nan mes tin e problema ei. Kiko di abo? Bo tin e problema ei?

Sea ku nos ta realisá esei òf nò, ta difísil pa detektá si nos tin sierto midi di prehuisio. Dikon? Beibel ta bisa: “No tin nada mas engañoso ku kurason humano.” (Yeremías 17:9, BPK) P’esei, nos por gaña nos mes pensando ku nos ta tolerá tur klase di hende. Òf kisas nos ta hustifiká nos mes pensando ku nos tin motibu bálido pa mustra deskonfiansa den sierto grupo di hende.

Ta difísil pa haña sa si nos tin prehuisio. Imaginá bo e siguiente situashon: Bo ta kanando bo so riba kaya anochi lat. Dos hòmber hóben ku bo no konosé ta biniendo den bo direkshon. Nan tin kurpa grandi i ta parse ku un di nan tin algu den su man.

Bo ta pensa ku e hòmbernan ei lo hasi bo daño? Kisas loke bo a yega di pasa aden a siña bo ku bo mester ta kouteloso. Pero, esei ta un motibu bálido pa konkluí ku e hòmbernan ei ta peligroso? Awor, ban un tiki mas profundo: Di ki rasa òf grupo étniko bo ta pensa ku e hòmbernan ei ta? Bo kontesta riba e pregunta ei kisas lo sorprendé bo. E por indiká ku te na sierto grado prehuisio a saka rais den bo kurason.

Si nos ta sinsero, nos tin ku atmití ku den fondo di nos kurason nos tur tin sierto midi di prehuisio. Beibel ta bisa ku hende hopi bes ta husga otro segun nan “aparensia.” (1 Samuel 16:7) Nos tur tin e tendensia akí i hopi biaha ku konsekuensianan desastroso. P’esei, nos por puntra nos mes: Ta posibel pa vense òf eliminá prehuisio for di nos bida? Lo yega un dia ku lo no tin prehuisio mas na mundu?