Bo ta kere den Dios? Si esei ta e kaso, bo por proba ku e ta eksistí? Wèl, tur rònt di nos tin evidensia ku tin un Kreador sabí, poderoso i amoroso. Kiko ta duna prueba di esei? Nan ta konvinsente? Pa nos haña kontesta, laga nos wak kiko apòstel Pablo a skirbi den su karta na e kristiannan na Roma.

Pablo a bisa: “[Dios] su kualidatnan invisibel, esta, su poder eterno i Divinidat, ta ser mirá bon kla for di kreashon di mundu padilanti, ya ku nan ta bisto den e kosnan trahá, di manera ku e hendenan ei no tin èksküs.” (Romanonan 1:20) Manera Pablo a mustra, kreashon ta duna prueba ku mester tin un Kreador. Awor, laga nos analisá e palabranan di Pablo un poko mas.

Segun Pablo, Dios su kualidatnan por ser mirá “for di kreashon di mundu padilanti.” Den e konteksto akí, e palabra griego tradusí komo “mundu” no ta referí na planeta Tera. Mas bien, e ta referí na humanidat. a P’esei, Pablo a mustra ku for di e momento ku Dios a krea hende, nan por a mira Dios su kualidatnan den kreashon.

Nos tin evidensia di esei tur rònt di nos. Esaki no ta algu skondí den naturalesa, sino ta algu ku por “ser mirá bon kla.” For di e kos di mas chikitu te na e kos di mas grandi, kreashon ta duna prueba no solamente ku ta eksistí un Kreador pero tambe ku e tin kualidatnan maravioso. E diseño ku nos ta mira den naturalesa no ta indiká ku e ta un Dios sabí? E shelu yen di strea i e olanan grandi ku ta dal kontra baranka no ta duna prueba ku Dios ta poderoso? E variedat di kuminda delisioso ku nos ta disfrutá di dje i e impreshonante subida òf bahada di solo no ta mustra ku Dios ta stima hende?​—Salmo 104:24; Isaías 40:26.

E evidensia ta asina kla ku esnan ku no ta mir’é i ku no ke kere den Dios “no tin èksküs.” Un komentarista di Beibel a usa e siguiente ilustrashon: Imaginá bo un shofùr ta topa un bòrchi di tráfiko ku ta bisa: “Kambio di Ruta—Bai Lenks,” pero e no ta hasi kaso di esaki. Un polis ta par’é i ta dun’é un but. E shofùr ta bisa e polis ku e no a mira e bòrchi. Pero e no ta konvensé e polis, pasobra tur hende por mira e bòrchi bon kla i e shofùr no tin problema ku su bista. Ademas, ta e shofùr tin e responsabilidat di wak bòrchi i di sigui nan instrukshon. Asina tambe, e kosnan ku nos ta mira den naturalesa ta duna prueba ku Dios ta eksistí. E prueba ta bon kla. Komo sernan inteligente, nos tur por mira esakinan. Pues, nos no tin ningun èksküs pa ignorá nan.

Sí, kreashon ta siña nos masha hopi kos tokante nos Kreador. Pero tin un buki, esta, Beibel ku ta siña nos muchu mas tantu kos tokante e Kreador. Ku yudansa di Beibel, nos por haña kontesta riba e pregunta importante akí: Kiko ta Dios su propósito pa e tera i pa su habitantenan? E kontesta riba e pregunta ei por yuda nos hala mas serka Dios, kende “su kualidatnan invisibel . . . ta ser mirá bon kla” den tur kos rònt di nos.