Si bo tin un yu adolesente, un di e kosnan di mas difísil ku bo por haña bo ta dil kuné komo mayor ta un situashon di konflikto. Tambe e por pone bo pasenshi na prueba. Maria, mama di un hóben di 14 aña di Brazil, a bisa: “Ora mi yu muhé reta mi outoridat, e ta pone mi sanger herebé. Nos ta ­heringá asina tantu ku otro te ku nos ta kuminsá grita otro.” Carmela, di Italia, ta enfrentá un reto similar. El a bisa: “Ami ku mi yu sa diskutí fuertemente ku otro, i ta te ora e bai sera su kurpa den kamber, e kos ta kaba.”

Pakiko algun adolesente ta gusta pusta boka ku nan mayornan? Ta nan pareunan mester kulpa? Kisas. Beibel ta bisa ku un persona su amigunan por tin un gran influensia riba dje, sea bon òf malu. (Proverbionan 13:20; 1 Korintionan 15:33) Ademas, hopi di e entretenimentu ku tin awe pa hóbennan ta fomentá e imágen di e adolesente rebelde.

Pero tin otro faktornan ku bo tin ku tene kuenta kuné—faktornan ku no ta difísil pa dil kuné unabes ku bo komprondé ki efekto nan por tin riba bo yu. Laga nos wak algun ehèmpel.

Apòstel Pablo a skirbi: “Tempu mi tabata mucha, mi tabata papia manera mucha, pensa manera mucha, rasoná manera mucha; pero awor ku mi a bira hende grandi, mi a pone kos di mucha un banda.” (1 Korintionan 13:11) Manera e palabranan akí ta indiká, mucha no ta pensa manera hende grandi ta pensa. Kon asina?

 Mucha tin e tendensia di pensa ku un kos ta sea bon òf malu; na moda di papia, sea blanku òf pretu. En kambio, hende grandi hopi biaha ta mas kapas pa mira e áreanan shinishi i analisá asuntunan mas a fondo pa nan por yega na un konklushon òf tuma desishon. Por ehèmpel, hende grandi ta para ketu na e partinan étiko di un asuntu i ta pensa riba ki efekto nan akshonnan por tin riba otro hende. Kisas nan tin e kustumber di pensa asina, miéntras ku adolesentenan ta den e proseso di siña pensa asina.

Beibel ta animá hóbennan pa desaroyá nan “disernimentu,” òf, kapasidat di pensa. (Proverbionan 1:4) De echo, Beibel ta animá tur kristian pa usa nan “kapasidat di pensa.” (Romanonan 12:1, 2; Hebreonan 5:14) Ma tin biaha bo yu adolesente por usa su kapasidat di pensa pa diskutí ku bo, asta riba kosnan masha insignifikante. * Òf kisas e ta ekspresá un punto di bista ku ta reflehá un falta di madures. (Proverbionan 14:12) Den un situashon asina, kon bo por rasoná ku bo yu en bes di diskutí kuné?

Ma tene kuidou: Ora bo ta rasoná ku bo yu, no kere ku ta abo mester tin e último palabra. Asta ora bo pensa ku loke bo bisa ta drenta un banda di orea i sali n’e otro banda, probablemente bo yu lo keda kòrda mas di loke bo ta kere, òf di loke e ta dispuesto pa rekonosé. No keda sorprendí si despues di un par di dia, bo yu aseptá bo punto di bista òf asta pretendé ku e idea tabata di dje.

“Tin biaha ami ku mi yu hòmber ta diskutí riba kualke ko’i kèns, por ehèmpel, p’e no dispidí kos òf p’e stòp di tenta su ruman muhé. Pero mayoria di biaha, tur loke e tabata ke ta pa mi puntr’é su opinion, pa mi trata di komprond’é i pa mi bisa algu manera: ‘Ahn, ta asina a pasa’ òf ‘ta esei ta loke bo ta pensa.’ Ora mi wak bèk, mi ta realisá ku si mi a djis bisa algu asina, nos lo por a evitá hopi diskushon.”—Kenji, Hapon.

Un elemento klave den lantamentu di un yu ta pa prepar’é pa e dia ku e ta bai biba riba su mes. (Génesis 2:24) Parti di e proseso ei ta enserá yud’é forma su propio identidat, esta, su kualidatnan, su opinionnan i su balornan den bida ku ta determiná ki tipo di hende e ta. Ora e haña su mes bou di preshon pa hasi malu, e echo ku e sa kiko e ke den bida ta yud’é pensa riba e konsekuensianan di su akshonnan. Tambe lo e puntra su mes: ‘Ki tipo di hende mi ta? Kiko ta mi norma- i balornan? Kiko un persona ku tin e balornan ei lo hasi den e situashon akí?’—2 Pedro 3:11.

Beibel ta konta nos tokante Hose, un yònkuman ku tabatin su propio identidat. Por ehèmpel, ora e kasá di Potifar a insistí pa e drumi kuné, Hose a kontestá: ‘Kon mi por hasi e maldat grandi akí i peka kontra Dios?’ (Génesis 39:9) Aunke ainda e israelitanan no tabatin un lei ku a prohibí adulterio, Hose por a komprondé kiko Dios a pensa di e asuntu. Es mas, ora el a bisa ‘kon mi por,’ el a demostrá ku e tabata pensa manera Dios, esta, ku ta asina e mes tambe tabata.—Efesionan 5:1.

Bo yu adolesente tambe ta formando su propio identidat. Esei ta bon, pasobra su konvikshonnan lo yud’é enfrentá preshon di su pareunan. (Proverbionan 1:10-15) Di otro banda, e mesun sentido di identidat ei por pon’é lanta kontra bo. Si esei sosodé, kiko bo por hasi?

Ora un yu ta desaroyá su propio identidat, akompañá pa konvikshonnan firme, esei no ta solamente normal sino tambe probechoso. Al fin i al kabo, Beibel ta bisa ku kristiannan no mester ta manera mucha chikí ku ta ser “bentá tur kaminda pa ola i hibá p’aki i p’aya pa tur bientu di siñansa.” (Efesionan 4:14) Pues, permití i asta animá bo yu pa e desaroyá su propio identidat.

“Ora mi mustra mi yu muhénan ku mi ta dispuesto pa skucha nan, nan ta mas inkliná na tene kuenta ku mi opinion, inkluso si e ta diferente for di esun di nan. Ademas, mi ta tene kuidou pa mi no obligá nan pensa manera ami ta pensa, sino pa laga nan forma nan propio opinion.”—Ivana, Repúblika Cheko.

Algun adolesente ta gusta hasi loke mucha sa hasi. Nan a siña e arte di keda papia riba un asuntu ku e idea di kansa nan mayornan pa nan sede. Si esei ta sosodé ku frekuensia den bo hogar, tene kuidou. Aunke bo por haña alivio un ratu si bo sede, e ta laga bo yu kere ku pa e haña su kièr, e tin ku keda insistí. Kiko ta e solushon? Sigui e konseho di Hesus: ‘Laga bo “sí” ta sí, i bo “nò,” nò.’ (Mateo 5:37) Si bo yu sa ku bo ta konsistente, lo e ta ménos inkliná na insistí riba un punto.

Na mes momento, sea rasonabel. Por ehèmpel, laga bo yu splika bo pakiko lo bo tin ku lag’e yega kas mas lat na sierto okashon. Si bo bisa sí den un kaso asina, esei no ta nifiká ku ta sede bo ta sede na preshon, sino bo ta simplemente sigui e konseho di Beibel: ‘Laga tur hende mira ki rasonabel bo ta.’—Filipensenan 4:5.

Klaru ku ningun mayor no ta perfekto. Beibel ta bisa: “Nos tur ta trompeká hopi biaha.” (Santiago 3:2) Si bo ta haña ku bo tambe tabata kulpabel pa un diskushon entre abo ku bo yu, no duda pa pidié despensa. Ora bo atmití bo fayo, bo ta duna un ehèmpel di humildat, i esei lo siña bo yu aktua den e mesun manera.

“Un biaha, mi a diskutí fuertemente ku mi yu. Ma despues ku mi a logra trankilisá mi mes, mi a pidié despensa pa loke a pasa. Esei a yuda kalm’é tambe i hasié mas habrí pa skucha mi.”—Kenji, Hapon.