Mi a nase na Riga, kapital di Letonia. Mi mama a lanta ami ku mi ruman muhé. Aunke mi mama ta katóliko, nos tabata bai misa riba dianan di fiesta religioso so. Semper mi a kere den un poder mas ayá, pero komo hóben, tabatin hopi otro kos ku tabata distraí mi.

Segun ku mi tabata krese, mi mama a ripará ku mi tabata gusta plama kos for di otro i arma nan bèk. Ya ku tabatin hopi kos den kas ku mi por a habri for di otro, mi mama no tabata ke pa mi keda kas mi so. Anto el a duna mi un kos di hunga ku vários pida di metal, ku mi tabata gusta arma i desarmá. Na mes momento mi a haña un otro pashon, esta, korementu di skuter. Mi mama a inskribí mi pa un kareda di skuter ku yama Zelta Mopēds (Skuter di Oro). Na kuminsamentu, mi tabata kore kareda di skuter, i despues di motosaikel.

Komo ku mi tabata kapta kos lihé, no a dura muchu ku mi tabatin hopi éksito den e deporte di velosidat i peligroso akí. Mi a gana e kampeonato di motosaikel di Letonia tres biaha, i dos biaha mi a gana e Kampeonato di Motosaikel di Estadonan Báltiko.

Ora mi tabata na tòp di mi karera, mi amiga Evija (ku despues a bira mi kasá) a drenta den kontakto ku Testigunan di Yehova. El a haña algun di nan literatura, ku tabatin un kupòn pa pidi un estudio di Beibel. El a yena e kupòn i mand’é ku pòst. Djis despues, dos Testigu a bishit’é, i el a kuminsá studia Beibel ku nan. Ami no tabatin problema ku esei, pero na e tempu ei mi no tabatin masha interes den kosnan spiritual.

Mas despues, e Testigunan a invitá mi pa mi sinta i skucha durante Evija su estudio di Beibel. Mi a aseptá e invitashon, i mi a gusta loke mi a skucha. Loke a konmové mi mas tantu tabata e promesa di Beibel di un paradeis riba  tera. Por ehèmpel, nan a mustra mi e teksto na Salmo 37:10 i 11, ku ta bisa: “Aki poko tempu e malbado lo no t’ei mas; maske kuantu bo buska su lugá, e lo no t’ei. Ma e humildenan lo heredá e tera, i lo deleitá nan mes den pas abundante.” E promesa ei di bèrdat a atraé mi.

Mi interes spiritual a sigui krese. Mi a bin realisá kuantu mentira religioso ta eksistí. Di otro banda, e lógika tras di siñansanan di Beibel i e mensahe kla ku nan ta kontené a impreshoná mi.

Segun ku mi a sigui studia Beibel, mi a siña kuantu Yehova ta balorá bida. (Salmo 36:9) Esei a hasi un impakto riba mi korementu di kareda di motosaikel; mi no kier a sigui riska mi bida mas. Na lugá di esei, mi kier a usa mi bida pa duna gloria na Yehova. Ta p’esei e fama, gloria i eksitashon di kareda di motosaikel no tabata importante mas pa mi.

Na 1996, mi a asistí na un kongreso internashonal di Testigunan di Yehova na Tallinn, Estonia, no muchu leu for di e stadion di motosaikel kaminda tur ora mi tabata kore pusta. Na e kongreso, mi a mira hende di diferente pais ta reuní huntu den pas i armonia. Por ehèmpel, ora ku un Testigu a pèrdè su kartera, mi a pensa ku sigur lo e no hañ’é nunka mas. Pero djis despues un otro Testigu a haña e kartera i a debolb’é ku tur kos aden. Mi a keda boka habrí! Awor mi a keda konvensí ku e Testigunan di bèrdat ta biba segun e normanan haltu di Beibel. Ami ku Evija a sigui hasi progreso den nos estudio, i na 1997 nos a batisá komo Testigunan di Yehova.

Algun di mi amigunan a muri komo resultado di nan korementu deskabeyá di motosaikel. For di mi estudio di Beibel, mi a bin komprondé ku mi tin un responsabilidat pa ku e Dunadó di bida, esta, Yehova. Kisas ta e komprondementu ei a skapa mi bida.

Pa kuater aña, ami ku Evija tabatin e privilegio di sirbi den e trabou di tempu kompleto na e sukursal di Testigunan di Yehova na Riga. Awor nos tin goso den lanta nos yu muhé Alise i siñ’é stima Yehova. Tambe mi tin e privilegio di pasa un dia kompleto tur siman na e ofisina di tradukshon pa drecha outo i otro kosnan ku a daña. Mi ta hopi kontentu ku mi por hasi bon uso di e abilidatnan ku mi a siña tempu mi tabata mucha! Sí, ainda mi ta plama kos for di otro i arma nan atrobe.

Danki na loke mi a siña for di Beibel, mi ta balorá masha tantu mes e privilegio di duna testimonio tokante e úniko Dios berdadero huntu ku mi famia. Sí, e promesa di un paradeis riba tera a kambia mi bida!