DIKON TIN HENDE TA DUDA: Hopi hende ta sinti ku Dios ta mira hende solamente komo pekadó, impuru i indigno di su atenshon. Kendra, kende tabata sufri di depreshon, tabata sinti su mes sumamente kulpabel pasobra e no por a kumpli ku tur loke Dios ta eksigí di dje. P’esei, el a bisa: “Mi a stòp di hasi orashon.”

LOKE BEIBEL TA SIÑA: Yehova ta wak mas ayá di bo imperfekshonnan i ta komprondé ken bo ta realmente. Beibel ta bisa: “E sa di kiko nos ta trahá; e ta kòrda ku ta stòf nos ta.” Es mas, Yehova no ta trata nos “segun nos pikánan,” ma si nos arepentí, e ta tene miserikòrdia di nos i ta pordoná nos.—Salmo 103:10, 14.

Laga nos wak e ehèmpel di David, e rei israelita menshoná den e promé artíkulo di e seri akí. David a bisa den orashon: “Bo wowonan a mira mi supstansia sin forma; . . . tur tabata skirbí den bo buki . . . Skrudiñá mi, o Dios, i konosé mi kurason.” (Salmo 139:16, 23) Sí, David tabata konvensí ku aunke el a peka, algun biaha gravemente, tòg Yehova por a wak den su kurason ku e tabata arepentí.

Yehova ta komprondé bo mihó ku kualke hende. Beibel ta bisa: “Hende ta wak aparensia di pafó, ma SEÑOR ta wak kurason.” (1 Samuel 16:7) Dios sa dikon bo ta hasi loke bo ta hasi. E konosé e manera ku bo a ser lantá, bo ambiente, bo personalidat i tur loke ta forma bo komo persona. Yehova ta mira i ta balorá e persona ku bo ta hasi esfuerso pa bira, maske bo faya.

Kon anto Dios ta usa su komprondementu profundo di ‘ken bo ta realmente’ pa konsolá bo?