Bon amigunan ta komuniká ku otro mas tantu ku ta posibel, sea ta en persona, via telefòn, e-mail, vidio òf karta. Pues, pa nos por ta amigu di Dios, nos tin ku komuniká kuné regularmente. Pero kon nos por hasi esei?

Nos por papia ku Yehova mediante orashon. Pero papia ku Dios no ta meskos ku tene un kòmbersashon ku un di nos pareunan. Nos tin ku realisá ku ora nos ta hasi orashon, nos ta papiando ku e persona di mas importante di universo, nos Kreador. Esaki mester motivá nos pa resa na dje ku un rèspèt profundo. Ademas, pa Dios skucha nos orashonnan, nos tin ku kumpli ku sierto rekisito. Laga nos konsiderá tres di e rekisitonan akí.

Na promé lugá, nos mester dirigí nos orashonnan eksklusivamente na Yehova Dios; no na Hesus, ni na un imágen òf un supuesto santu. (Éksodo 20:4, 5) Beibel ta bisa bon kla: “Den tur kos, pa medio di orashon i súplika huntu ku gradisimentu, laga Dios sa kiko ta boso petishonnan.” (Filipensenan 4:6) Na di dos lugá, nos mester hasi orashon den nòmber di e Yu di Dios, Hesukristu. Hesus mes a bisa: “Ningun hende no ta yega serka e Tata si no ta pa medio di mi.” (Huan 14:6) Na di tres lugá, nos orashonnan mester ta na armonia ku Dios su boluntat. Beibel ta bisa: “Kiko ku nos pidié ku ta di akuerdo ku su boluntat, e ta tende nos.” *—1 Huan 5:14.

Di mes un amistat no ta bai dura mashá si ta un di nan dos so ta papia tur ora bai. Meskos ku pa amigunan por tin bon komunikashon, nan mester sa ki ora pa papia i ki ora pa skucha, asina tambe nos mester duna Dios chèns pa papia ku nos i nos mester skuch’é. Kon Dios ta papia ku nos?

Awe, Yehova ta ‘papia’ ku nos mediante su Palabra skirbí, Beibel. (2 Timoteo 3:16, 17) Dikon nos ta bisa asina? Nos por kompar’é asin’akí: Suponé ku bo a haña un karta di un bon amigu. Despues ku bo les’é, bo ta sinti ku ta manera bo amigu a papia ku bo aunke e komunikashon tabata skirbí. Pues, di e mesun manera, ora bo lesa Beibel, bo ta laga Yehova papia ku bo. P’esei, Gina, menshoná den e promé artíkulo, a bisa: “Mi ta kere ku si mi ke pa Dios konsiderá mi komo su amiga, mi mester analisá e ‘karta’ ku el a manda pa nos, esta, Beibel.” Gina a sigui bisa: “Mi ta lesa Beibel tur dia, i esei a yuda mi hala mas serka Dios.” Abo ta lesa Beibel tur dia? Si bo hasié, bo ta duna Dios chèns di papia ku bo i lo bo sinti bo mas serka dje.