KIKO un hòmber mester hasi pa su esposa por ta felis? Hopi hende a lanta ku e idea ku e esposo tin ku perkurá pa su esposa tin un grado di siguridat. I pa nan, e manera prinsipal ku e esposo tin ku hasi esaki ta tresiendo sufisiente plaka kas. Pero si esei ta asina, dikon tin algun hende muhé, finansieramente bon pará, ku tòg no ta sinti nan felis? Tin di nan tin asta miedu di nan esposo. Rosa, un señora di Spaña, a bisa lo siguiente tokante su esposo: ‘Mi kasá tabata masha kariñoso ku otro hende, pero ami sí e tabata trata malu na kas.’ Un señora di Nigeria ku yama Joy ta atmití: “Ora mi no tabata di akuerdo ku mi kasá, e tabata bisa mi: ‘Bo tin ku hasi loke mi bisa, pasobra mi ta bo kasá.’”

Kon un hòmber por kumpli ku su papel komo esposo na un manera amoroso? Kiko un esposo mester hasi pa su esposa sinti ku nan kas ta un lugá di “sosiegu,” kaminda e por sintié sigur?—Rut 1:9.

Aunke tantu esposo komo esposa ta igual den bista di Dios, Beibel ta bisa ku nan kada un tin nan papel den famia. Romanonan 7:2 ta mustra ku e esposa mester respetá “lei di su esposo.” Meskos ku tur kompania tin un persona na kabes ku ta dirigí, asina ta e kaso tambe ku famia. I Dios a nombra e esposo komo kabes di e esposa. (1 Korintionan 11:3) Pues, un esposo mester dirigí su famia.

Awor esposo, kon bo mester kumpli ku e papel ku Dios a duna bo? Beibel ta bisa: “Sigui stima boso esposa, meskos ku Kristu tambe a stima e kongregashon.” (Efesionan 5:25) Sí, aunke Hesus no a kasa nunka, su ehèmpel por yuda bo ser un bon esposo. Laga nos wak kon.

Hesus a hasi esfuerso pa konsolá i yuda hende. Hesus a hasi un promesa na tur hende ku tabata afligí i kargá pa motibu di problema personal. El a bisa nan: “Bini serka mi, . . . i lo mi refreská boso.” (Mateo 11:28, 29) De echo, na vários okashon el a kura hende i a yuda nan hala serka Yehova. Pues, no ta nada straño ku hopi hende tabata gusta di ta den kompania di Hesus!

Esposo, kon bo por sigui e ehèmpel di Hesus? Wèl, bo tin ku buska maneranan pa yuda bo kasá. Tin esposa ta sinti  meskos ku Rosa, kende a lamentá: “Mi kasá tabata trata mi manera kriá.” En kambio, un hòmber ku yama Kweku, kende tin un matrimonio felis, a bisa: “Semper mi ta puntra mi kasá ku kiko mi por yud’é. Mi ta stima mi kasá, p’esei, hopi biaha, di mi mes mi ta yud’é ku su trabounan di kas.”

Hesus a tene kuenta ku otro hende i tabata un hòmber ku komprenshon. Tabatin un señora ku durante 12 aña largu a sufri di un problema grave di salú. Ora el a tende ku Hesus tabatin poder pa hasi milager, “e tabata blo bisa den su mes: ‘Si mi djis mishi ku su paña, mi ta bira bon.’” I e tabatin rason. El a yega serka di Hesus, mishi ku fraña di su paña i mesora el a ser kurá. Algun di e hendenan ku tabata presente i ku a mira loke a pasa kisas por a pensa ku e señora akí no a hasi bon. Pero Hesus por a mira i komprondé ku e señora tabata desesperá. * Ku kariño Hesus a bis’é: “Mi yu, . . . sea salú i ku e malesa penoso akí no molestiá bo mas.” Pues, Hesus no a zundra e señora ni lag’é pasa bèrgwensa. Di e manera ei, Hesus a demostrá ku e tabata un hòmber ku komprenshon.—Marko 5:25-34.

 Esposo, kon bo por sigui e ehèmpel di Hesus? Tene èkstra konsiderashon i tambe pasenshi ku bo esposa ora e no ta sinti su mes muchu bon. Purba di pone bo mes den su sapatu i di komprondé dikon e ta reakshoná na un sierto manera. Ricardo, por ehèmpel, ta splika: “Ora mi ripará ku mi kasá ta un poko krepchi, mi ta hasi mi bèst pa no bisa algu ku por lag’é sinti pió.”

Hesus a komuniká ku su disipelnan. Pa Hesus, su disipelnan tabata su amigunan, i e tabata kòmbersá hopi ku nan. De echo, el a bisa nan: “Mi a laga boso sa tur kos ku mi a tende di mi Tata.” (Huan 15:15) Ta bèrdat ku tabatin momentonan ku Hesus tabata ke ta su so pa e por a pensa i hasi orashon. Pero, hopi biaha, e tabata ekspresá su sintimentunan di mas profundo na su disipelnan. Por ehèmpel, e anochi promé ku el a ser matá komo si fuera e tabata un kriminal, ku tur frankesa el a bisa su disipelnan ku e tabata “masha tristu mes.” (Mateo 26:38) Hesus nunka a stòp di papia ku su amigunan, ni ora nan a hasi kosnan ku a desapunt’é.—Mateo 26:40, 41.

Esposo, kon bo por sigui e ehèmpel di Hesus? Papia ku bo esposa i bis’é loke bo ta pensa i sinti. Tin hende muhé ta keha ku nan kasá ta kla pa papia ku otro hende pero na kas nan no ta papia ni un pia di palabra. For di e palabranan di Ana nos ta mira kon bon un esposa ta sintié ora su esposo ta ekspresá su mes. Ana a bisa: “Mi ta sinti ku di bèrdat e ta stima mi i ku nos ta mas uní.”

Esposo, nunka keda sin papia ku bo kasá pa bo kastig’é. Un esposa ta kòrda: “Ora ku mi kasá tabata rabiá ku mi, e tabata keda dianan sin papia ku mi. E tabata laga mi sinti mi kulpabel i humiá.” Edwin, en kambio, ta purba di imitá Hesus. El a bisa: ‘Ora mi ta rabiá, mi no ta kontestá mesora. Mi ta wak ki ora ta e mihó momento pa ami ku mi kasá papia riba e problema i solushon’é.’

Joy, kende e artíkulo akí a menshoná na kuminsamentu, a mira kon su esposo a kambia for di dia ku el a kuminsá studia Beibel ku Testigunan di Yehova. Joy ta konta: “El a bira un mihó esposo. E ta hasi esfuerso pa imitá Hesus i ta trata di ser un bon esposo.” Sí, Beibel a yuda miónes di pareha kasá. Bo tambe ke benefisiá di loke Beibel ta siña? Bo por pidi un Testigu di Yehova un estudio di Beibel grátis.