UN INVESTIGADÓ a hasi un enkuesta i a puntra mas ku 800 hóben di diferente grupo religioso si nan ta kere ku Hesus ta kontestá orashon. Mas ku 60 porshento a kontestá ku sí. Pero tabatin ún hóben ku a skrap Hesus su nòmber i a skirbi “Dios” na su lugá.

Kiko abo ta pensa? Na ken nos mester resa, òf hasi orashon? Na Hesus òf na Dios? * Pa nos haña e kontesta, laga nos wak kon Hesus a siña su disipelnan hasi orashon.

For di Hesus su siñansa i ehèmpel, nos ta komprondé na ken nos mester resa.

SU SIÑANSA: Na un okashon, un di e disipelnan di Hesus a pidié: “Señor, siña nos hasi orashon.” Hesus a bis’é: “Ora boso ta hasi orashon, bisa: ‘Tata.’” (Lukas 11:1, 2) Poko tempu despues, den su famoso Sermon Riba Seru, Hesus a animá su oyentenan pa hasi orashon i a bisa nan: “Hasi orashon na bo Tata.” I el a sigurá nan: “Boso Tata sa kiko boso tin mester asta promé ku boso pidié.” (Mateo 6:6, 8) Riba su último anochi riba tera, Hesus a bisa su disipelnan: “Kiko ku boso pidi e Tata den mi nòmber, lo e duna boso.” (Huan 16:23) Pues, manera nos a mira, bes tras bes Hesus a siña nos pa resa na su Tata i nos Tata, Yehova Dios.—Huan 20:17.

SU EHÈMPEL: Hesus mes a resa na Dios, manera el a siña nos. Na Lukas 10:21, el a bisa: “Mi ta alabá bo públikamente, Tata, Señor di shelu i tera.” Na un otro okashon, “Hesus a hisa su kara na shelu i bisa: ‘Tata, mi ta gradisí bo ku bo a tende mi.’” (Huan 11:41) Ademas, e último palabranan ku el a bisa promé ku el a muri tabata: “Tata, den bo man mi ta konfia mi spiritu.” (Lukas 23:46) Asina Hesus a pone un ehèmpel kla i komprendibel: El a hasi orashon na Yehova, e “Señor di shelu i tera.” (Mateo 11:25; 26:41, 42; 1 Huan 2:6) Awor, kiko di e kristiannan di promé siglo? Nan a komprondé na ken nan mester a resa?

Apénas un par di siman despues ku Hesus a bai shelu, opositornan a kuminsá persiguí i menasá su disipelnan. (Echonan 4:18) Manera ta di spera, nan a resa pidi yudansa. Pero, na ken nan a resa? Beibel ta bisa ku “nan tur huntu a hasi orashon na Dios” i a pidié pa sigui yuda nan den “nòmber di [su] sirbidó santu, Hesus.” (Echonan 4:24, 30) Pues, nan a sigui Hesus su instrukshon i a hasi orashon na Dios, no na Hesus.

Añanan despues, apòstel Pablo a skirbi: “Semper nos ta gradisí Dios, Tata di nos Señor Hesukristu, ora nos ta hasi orashon pa boso.” (Kolosensenan 1:3) Asina el a deskribí kon é i su amigunan tabata hasi orashon. I Pablo a enkurashá su rumannan den fe pa “semper gradisí nos Dios i Tata pa tur kos den nòmber di nos Señor Hesukristu.” (Efesionan 5:20) Pues, Pablo tambe  a enkurashá otronan pa hasi orashon na “Dios,” e Tata, pero semper den nòmber di Hesus.—Kolosensenan 3:17.

Meskos ku e kristiannan di promé siglo, nos por mustra ku nos ta stima Hesus si nos ta obedesé su instrukshonnan enkuanto orashon. (Huan 14:15) Si nos ta hasi orashon solamente na Yehova, nos tambe por bisa ku konfiansa, meskos ku e salmista, “Mi ta stima SEÑOR, pasobra e ta tende mi bos i mi súplikanan . . . lo mi sklama na dje tanten ku mi ta biba.” *—Salmo 116:1, 2.