Beibel ta bisa ku na e fin lo tin un destrukshon. E ta bisa: “Lo tin un tribulashon grandi manera no a yega di sosodé nunka, for di prinsipio di mundu te awor . . . De echo, a ménos ku Dios hasi e dianan ei kòrtiku, ningun hende lo ser salbá.” (Mateo 24:21, 22) Pero Dios ta primintí ku hopi hende lo sobrebibí. Beibel ta bisa: “Mundu ta pasa bai . . . , ma esun ku ta hasi e boluntat di Dios ta keda pa semper.”—1 Huan 2:17.

Kiko bo mester hasi si bo ke sobrebibí e fin di e mundu akí i “keda pa semper”? Bo ta pensa ku bo mester kuminsá stòk bo kas ku produktonan di promé nesesidat òf hasi otro preparashon? Nò. Beibel ta urgi nos pa pone otro prioridat. E ta bisa: “Komo ku ta di e manera akí tur e kosnan ei lo larga kaba na nada, pensa riba ki sorto di hende boso mester ta. Boso mester ta hende di kondukta santu i mester hasi obranan ku ta demostrá deboshon na Dios, segun ku boso ta spera i kòrda semper riba e binida di e dia di Yehova.” (2 Pedro 3:10-12) E konteksto di e versíkulonan akí ta mustra ku “tur e kosnan ei” ku ta bai larga kaba na nada ta inkluí e gobièrnunan di e mundu korupto akí i tur esnan ku ta apoyá nan gobernashon en bes di apoyá e Reino di Dios. Klaramente anto, kos material lo no yuda nos sobrebibí e destrukshon ei.

Pues, pa nos sobrebibí, nos mester ta deboto na Yehova Dios i siña kiko nos tin ku hasi i kon nos tin ku komportá nos mes pa agrad’é. (Sofonías 2:3) Awendia, mayoria di hende ta ignorá e señalnan ku ta mustra bon kla ku nos ta bibando den e último dianan. En bes di sigui nan tras, nos mester “kòrda semper riba e binida di e dia di Yehova.” Testigunan di Yehova por mustra bo for di Beibel kiko bo tin ku hasi pa bo por sobrebibí.