SARA tabata pará meimei di e kamber ta wak rònt. Imaginá bo un señora di Medio Oriente ku un sèt di wowo skur i ekspresivo. Kisas su mirada a demostrá ku e tabata tristu? Si tabata asina, lo no ta difísil pa nos komprondé dikon. E tabatin hopi rekuerdonan den e kas ei. E ku su kasá stimá, Abraham, a pasa hopi momentonan dushi einan. * Huntu nan a hasié nan hogar.

Nan tabata biba na Ur, un stat próspero ku hopi artesano i komersiante. Pues siguramente nan tabata bon pará. Pero pa Sara, su hogar tabata nifiká mas ku djis un lugá pa warda su pertenensianan. Aki ta kaminda e ku su kasá a kompartí añanan di goso i tristesa ku otro. Ei nan a hasi hopi orashon na nan Dios stimá, Yehova. Pues Sara tabatin motibu de sobra pa stima e lugá ei.

Ma, Sara tabata dispuesto pa muda bai for di tur loke e tabata konosé. Apesar ku kisas lo e tabatin 60 i piku aña di edat, lo el a biaha bai un lugá deskonosí i lo a hiba un bida yen di peliger i difikultat i sin sa si lo el a regresá su kas bèk. Kiko a pon’é hasi un kambio asina grandi den su bida? I awe, kiko nos por siña di su fe?

Probablemente Sara a lanta na Ur. Awe, e úniko kos ku a keda di e stat ei ta un ruina desolá. Pero den tempu di Sara, konstantemente boto di e komersiantenan tabata nabegá pasa dor di e awa i kanalnan di Riu Eufrates i tabata trese merkansianan presioso for di leu na e stat próspero akí. Multitut di hende tabata kana pasa den e kayanan smal i yen di bògt di Ur, botonan tabata dal den otro den e waf i e bazarnan tabata kankan di merkansia. Imaginá bo kon Sara a lanta den e stat drùk ei i a siña konosé hopi di e hendenan pa nòmber. Kasi sigur nan lo a kòrd’é komo ku e tabata un muhé ekstraordinariamente bunita. Anto e tabatin un famia grandi einan.

Den Beibel, Sara ta konosí pa su gran fe, pero no fe den e dios-luna ku mayoria di hende na Ur tabata venerá, kaminda tabatin un toren dediká na e dios akí. En bes di esei, Sara tabata adorá e Dios berdadero, Yehova. E relato inspirá no ta bisa kon Sara a haña e fe ei. Su tata, pa por lo ménos un tempu, tabata adorá Dios falsu. En todo kaso, el a kasa ku Abraham, un hòmber dies aña mas grandi kuné. * (Génesis 17:17) Despues, Abraham a bira konosí komo e “tata di tur hende ku Dios ta konsiderá hustu pa motibu di nan fe.” (Romanonan 4:11) Huntu nan a hasi nan matrimonio ekselente i fuerte, nan tabatin rèspèt pa otro, bon komunikashon i tur dos tabata dispuesto pa resolvé problemanan difísil huntu. Riba tur kos, nan amor pa nan Dios tabata loke a karakterisá nan matrimonio.

 Sara tabata stima su kasá mashá, i nan dos a forma un hogar den serkania di nan famianan na Ur. Pero poko tempu despues, nan a haña nan konfrontá ku un problema. Beibel ta konta nos ku Sara “tabata steril; e no tabatin yu.” (Génesis 11:30) Den e tempu ayá i den e kultura ei, Sara su kondishon tabata un prueba difísil. Pero Sara a keda leal na Dios i su kasá. Nan subrino huérfano, Lòt, a bira manera un yu pa nan. Asina bida a sigui te e dia ku tur kos a kambia.

Abraham a bini serka Sara tur entusiasmá. Kasi e no por a kere kiko a kaba di sosodé. E Dios ku nan tabata sirbi a aparesé na dje, sin duda mediante un angel, i a kaba di papia kuné. Imaginá kon Sara ku su wowonan bunita a wak su kasa lif asina ku atenshon i a puntr’é: “Konta mi, kiko el a bisa bo?” Podisé Abraham a kai sinta promé, a pensa un ratu i despues lo a bis’é loke Yehova a bisa: “Sali for di bo tera, laga bo famia atras i bai na e tera ku lo mi mustra bo.” (Echonan 7:2, 3) Despues ku nan a kalma poko, nan a meditá riba e asignashon ku Yehova a duna nan, esta, nan mester a bai laga nan kas i bida konfortabel i bai biba den tènt i muda di un lugá pa otro. Kon Sara lo a reakshoná? Sin duda Abraham lo a wak e ku atenshon. Sara lo a apoy’é den un kambio asina grandi den nan bida?

E desishon ku Sara mester a tuma kisas ta zona straño pa nos. Podisé bo ta pensa: ‘Wèl, Dios nunka a pidi ami òf mi kasá pa hasi algu asina.’ Sinembargo, no ta nos tur ta enfrentá un eskoho similar? Nos ta bibando den un mundu materialista ku ke pa nos pone nos mes komodidatnan, nos pertenensianan òf nos sentido di siguridat na promé lugá den nos bida. Pero Beibel ta urgi nos pa tuma un otro desishon, esta, pa pone kosnan spiritual promé, pa agradá Dios promé en bes di nos mes. (Mateo 6:33) Segun ku nos ta pensa riba loke Sara a hasi, kisas nos por puntra nos mes: ‘Ki desishon ami lo tuma den bida?’

Segun ku Sara tabata paketá su kosnan, e tabatin e dilema di kiko lo el a bai kuné i kiko lo el a laga keda. E no por a keda ku kosnan ku tabata muchu grandi pa e karavana di buriku i kamel karga ni nada ku lo no tabata práktiko pa un hende ku ta biba den tènt i ku ta muda di un lugá pa otro. Sin duda, nan lo mester a bende òf duna otro hende hopi di nan pertenensianan. Tambe lo el a bai laga e komodidatnan ku bida den stat a trese kuné, por ehèmpel, e no por a yega fásil na e merkado i bazarnan kaminda e por a kumpra grano, karni, fruta, paña i otro artíkulonan di nesesidat i pa nan komodidat.

Podisé lo tabata mas difísil pa Sara bai laga su kas. Si Sara su kas tabata manera e kasnan ku arkeólogonan a deskubrí na Ur, lo el a bai laga algun komodidat masha bon. Algun kas tabatin mas ku  12 kamber, i tambe fòntein ku fuente di awa fresku i sistema di tuberia. Asta un kas mas simpel lo por tabatin un dak fuerte, muraya i un porta ku kisas por a sera na lòk. Akaso un tènt por a duna nan e mesun protekshon kontra ladron òf kontra loke den e époka ayá tabata komun den teranan bíbliko, esta, leon, leopardo, ber i wòlf?

I kiko di su famia? Ken Sara lo a bai laga atras? Dios su mandato pa ‘sali for di nan tera, i laga nan famia atras’ kisas lo tabata spesialmente un reto p’e. Komo ku e tabata un dama yen di amor i kariño, kisas lo e tabatin ruman hòmber- i muhénan, subrina- i subrinonan, tanta- i tionan ku lo e tabata masha pegá ku nan, i ku podisé nunka mas lo el a mira nan atrobe. Ma ku kurashi, Sara a sigui padilanti, dia tras dia, preparando pa nan muda.

Apesar di e retonan, Sara tabata prepará i kla pa muda riba e dia apuntá. Aunke ku Taré, e patriarka di famia, tabatin mas o ménos dos siglo di edat, e mester a kompañá Abraham i Sara. (Génesis 11:31) Sin duda, Sara lo mester tabata hopi bezig ta kuida su tata biehitu. Lòt tambe lo a bai huntu ku nan ora nan a obedesé Yehova i “a sali for di tera di e kaldeonan.”—Echonan 7:4.

E karavana a biaha bai Haran, mas o ménos 960 kilometer den direkshon nortwèst, siguiendo e Riu Eufrates. E famia a para pa un tempu na Haran. Kisas Taré tabata malu i no por a sigui biaha mas. E famia a keda einan te dia el a fayesé na edat di 205 aña. Na un dado momento promé ku nan a sigui nan biahe, Yehova a bolbe papia ku Abraham i a bis’é un bes mas pa sali for di e tera ei i bai na e tera ku Yehova lo a mustr’é. Pero e biaha akí Dios a agregá un promesa emoshonante: “Lo mi hasi bo un nashon grandi.” (Génesis 12:2-4) Ma ora nan a sali for di Haran, Abraham tabatin 75 aña i Sara tabatin 65 aña, i nan no tabatin yu. Kon Abraham por a bira un nashon? Lo el a tuma un esposa mas? E tempu ayá, poligamia tabata normal, i kisas Sara a pensa riba esei.

En todo kaso, nan a sali for di Haran i a sigui ku nan biahe. Sinembargo, tuma nota ken tabata biaha huntu ku nan awor. E relato ta konta ku Abraham su famia a sali ku e rikesa ku nan a akumulá i ku “e hendenan ku nan a haña na Haran.” (Génesis 12:5) Ken e hendenan akí tabata? Muy probablemente nan tabata sirbientenan. Pero, sin duda Abraham ku Sara lo a papia tokante nan fe ku hende ku kier a skucha. Algun interpretashon hudiu di antigwedat ta bisa ku e hendenan ei tabata prosélito, esta, hendenan ku a djòin Abraham ku Sara den adorá Yehova. Si tabata asina, sin duda e fe fuerte di Sara a yud’é konvensé hende ku a skuch’é papia tokante su Dios i su speransa. Ta masha sabí di nos parti pa meditá riba esaki i imit’é, ya ku nos ta bibando den un tempu ku fe i speransa ta hopi skars. P’esei, ora bo siña algu balioso for di Beibel, pakiko no kompartié ku otro hende?

Despues ku nan a krusa Riu Eufrates, probablemente dia 14 di nisan, aña 1943 promé ku Kristu, nan a bai zùit rumbo pa e tera ku Yehova a primintí nan. (Éksodo 12:40, 41) Imaginá bo kon Sara tabata wak akí i aya i tabata disfrutá di e bunitesa, e variedat i e wer plasentero di e tera. Den serkania di Sikem, serka e palunan grandi di More, Yehova a bolbe aparesé na Abraham, i e biaha akí el a bis’é: “Bo desendientenan lo mi duna e tera akí.” E ekspreshon “desendientenan” lo tabatin hopi nifikashon pa Abraham. Kasi sigur esei a pone pensa bèk riba e Hòfi di Edén, kaminda Yehova a profetisá ku un dia un desendiente, òf simia, lo destruí Satanas. Ya Yehova a bisa Abraham ku e nashon ku lo a bini for di dje lo trese bendishon pa hende rònt mundu.—Génesis 3:15; 12:2, 3, 6, 7.

Apesar di esei, e famia no tabata imün pa problemanan di e mundu akí. A bini un hamber na Kanan, i Abraham a disidí di hiba su famia zùit rumbo pa Egipto. Pero, el a sinti ku tabatin un peliger den e region akí. P’esei el a bisa Sara: “Mira, mi sa ku bo ta un muhé bunita; i lo sosodé ku ora e egipsionan mira bo, nan lo bisa: ‘Esaki ta su esposa’; i nan lo mata mi, ma abo nan lo laga keda na bida. Pa fabor, bisa ku bo ta mi ruman pa bai mi bon pa bo motibu, i pa mi por keda na bida pa bo motibu.” (Génesis 12:10-13) Dikon Abraham a pidi Sara algu asina inusual?

 Abraham no tabata un gañadó ni un kobarde, manera algun krítiko a bisa. Sara, en bèrdat, tabata su mitar ruman. I ta ku bon motibu Abraham tabata kouteloso. Abraham ku Sara tabata sa ku no tabatin nada mas importante ku Dios su propósito pa produsí un desendiente spesial i pa un nashon bini for di Abraham; pues Abraham su siguridat tabata di sumo importansia. Ademas, evidensia arkeológiko ta mustra ku no tabata nada straño ku hòmbernan den puesto di outoridat na Egipto tabata sekuestrá esposa i mata e esposo. Pues Abraham a hasi sabí, i Sara a kooperá humildemente ku su desishon.

No a dura muchu ku susesonan ku a tuma lugá a mustra ku Abraham no tabatin miedu pòrnada. Algun prens di Fárao a ripará ku Sara tabata masha bunita, algu masha remarkabel pa su edat. Nan a bai bisa Fárao, i el a manda nan pa kue Sara bini kuné. Ta difísil pa imaginá Abraham su angustia òf kon afligí Sara lo tabata. Pero, ta parse ku nan a trata Sara, no komo un rehen, sino komo un invitado spesial. Kisas Fárao a plania pa sedusié i impreshon’é ku su rikesa, kaba pa e negosiá ku su ‘ruman hòmber’ pa e por a hañ’é komo esposa.—Génesis 12:14-16.

Imaginá bo kon Sara tabata wak e panorama di Egipto dor di un bentana òf pará riba un balkon. Ta kon lo el a sintié bibando atrobe rondoná pa muraya, ku un dak riba su kabes i ku kuminda ekskisito su dilanti? Akaso el a laga un bida luhoso tent’é, podisé un bida asta mas luhoso ku e bida ku e tabatin na Ur? Satanas lo a keda masha kontentu si Sara a pensa di bandoná Abraham i kasa ku Fárao. Pero Sara no a kai den e tentashon ei. E tabata leal na su kasá, su matrimonio i su Dios. Awe, den e mundu inmoral akí, mare tur hende kasá ta leal asina. Bo por imitá Sara su lealtat den bo trato ku bo famia i amigunan?

Yehova a intervení i a manda plaga riba Fárao i su kas pa protehá e dama stimá akí. Di un manera òf otro, ora Fárao a haña sa ku Sara tabata kasá di Abraham, Fárao a mand’é bèk pa Abraham i a pidi henter e famia sali for di Egipto. (Génesis 12:17-20) Abraham tabata masha kontentu ku e por a haña su esposa kerí bèk! Kòrda ku kariñosamente el a bisa Sara: “Mi sa ku bo ta un muhé bunita.” Pero e tabata apresiá un otro tipo di bunitesa di Sara hopi mas tantu, un bunitesa ku tabata mas importante ku simplemente su aparensia. Sara tabata realmente bunita di paden, e tipo di bunitesa ku Yehova ta balorá. (1 Pedro 3:1-5) Esei ta un tipo di bunitesa ku nos tur por kultivá. Nos lo imitá e fe di Sara si nos pone kosnan spiritual promé ku kosnan material, si nos purba di kompartí e konosementu di Dios ku otro hende i si lealmente nos biba segun Dios su normanan moral haltu ora nos ta enfrentá tentashon.