Den e añanan despues di 1930, ainda Testigunan di Yehova no tabata prediká na Indonesia, ni na Malasia ni na loke nos konosé awe komo Papoea-Nieuw-Guinea. Kon e bon notisia di Beibel lo a yega e paisnan ei? E sukursal di Australia (awor sukursal di Australasia) a respondé na e nesesidat akí i a kumpra un barku di bela di 16 meter ku motor i dos mast. Nan a yama e barku Lightbearer (kargadó di lus) pasobra e tripulantenan, ku tabata un grupo di pionero, a lo a us’é pa hiba lus spiritual na e parti di mundu ei.—Mateo 5:14-16.

 Na febrüari 1935, e grupo di shete ruman a nabegá for di Sydney, e kosta ost di Australia, bai nort den direkshon di Port Moresby, Nieuw-Guinea. Durante nan biahe, nan tabata piska pa nan kome i tabata stòp na vários haf pa kumpra kombustibel, kuminda èkstra i hasi reparashon na e barku. Dia 10 di aprel 1935 nan a nabegá for di Cooktown, Queensland (Australia). Pa pasa den e awanan brutu di Great Barrier Reef, nan a sende motor di e barku. Pero e motor a kuminsá hasi un zonido straño i nan mester a pag’é. Kiko nan a hasi, bira bèk òf sigui bai Nieuw-Guinea? E kapitan, Eric Ewins a bisa ku nan no tabata ke bai bèk. Pues, nan a sigui bai ku e Lightbearer i a yega sano i salvo na Port Moresby, dia 28 di aprel 1935.

 Miéntras ku un mekániko tabata drecha e motor, tur e rumannan riba e barku, ku eksepshon di Frank Dewar, a bai prediká e bon notisia na Port Moresby. Frank, kende segun su kompañeronan tabata “un pionero balente,” a bai prediká otro kaminda. Frank a bisa: “M’a kue un kantidat di buki i a kana bai por lo ménos 32 kilometer den e pueblo i a prediká na e estranheronan.” Na kaminda pa bai bèk, el a pasa via un otro ruta ku ta krusa un riu chikitu ku tabatin krokodel aden. Pero el a krusa ku kuidou i a yega sano i salvo bèk den stat. E esfuerso ku e rumannan a hasi pa prediká a duna bon resultado. Algun persona ku a aseptá literatura e tempu ei a bira Testigu di Yehova despues.

 Ora ku e motor a drecha, Lighbearer a bandoná Port Moresby i a nabegá bai den direkshon di e isla Java na Ost India Hulandes (awor Indonesia). Despues di a para algun biaha na kaminda pa kumpra loke nan tabatin mester, nan a yega na Batavia (awor Jakarta) dia 15 yüli 1935.

 Na Java, Charles Harris a baha for di e Lightbearer i a keda einan. Ku entusiasmo, el a sigui prediká e bon notisia na Java. b El a bisa: “E tempu ei, nos predikashon a enserá prinsipalmente laga literatura bíbliko i sigui bai e siguiente stat. Mi tabatin publikashon na arabir, chines, hulandes, ingles i indones. E hendenan tabata kla pa aseptá nos literatura, p’esei mi por a laga mas òf ménos 17.000 publikashon pa aña.”

 E manera entusiasmá ku Charles tabata prediká a hala atenshon di outoridat hulandes. Un biaha, un funshonario di gobièrnu a puntra un otro Testigu di Yehova, ken tabata predikando na Java i kuantu Testigu di Yehova tabata trahando na Ost Java, kaminda Charles tabata. E ruman a kontestá: “Un persona so.” E funshonario a grit’é: “Mi tin ku kere bo? Mirando e kantidat di boso literatura ku ta ser partí einan, boso lo mester tin henter un ehérsito di trahadó ta parti nan.”

 Lightbearer a nabegá for di Indonesia bai Singapur i a yega dia 7  di ougùstùs. Na kada parada, e rumannan a usa e boto su amplifier i spiker potente pa toka diskurso grabá. E método ei di prediká e bon notisia, hopi bes a hala masha atenshon. De echo, e korant Singapore Free Press a bisa ku “riba djárason anochi . . . tabatin un stèm fuerte ta zona for di riba laman.” E korant a agregá: “Esei tabata un diskurso úniko . . . transmití . . . for di e barku Lightbearer, i esei ta loke nan a hasi for di dia ku nan a yega Singapur for di Australia.” E reportahe a bisa tambe ku “ora tin bon tempu bo por a tende e grabashon for di un distansia di . . . mas o ménos 4 km leu for di riba laman.”

 Durante e tempu ku Lightbearer tabata na Singapur, Frank Dewar a bai pa kuminsá ku un asignashon nobo. Frank a konta kon su despedida a bai: “Nos a keda biba riba e barku ora nos a kuminsá traha komo pionero na Singapur. Ora e momento a yega pa Lightbearer sigui nabegá bai otro kaminda, Eric Ewins a bisa algu ku a spanta mi. El a bisa: ‘Frank, bo a bisa ku bo a skohe Siam (awor Tailandia) komo bo teritorio pa prediká. Wèl, aki ta mas serka di Siam ku nos ta yega. Baha bo bai numa!’ Mi no tabata sa kiko pa bisa. Mi a kontest’é: ‘Mi no sa kon pa yega Siam!’ Eric a splika Frank ku e por kohe un trein na Kuala Lumpur, konosí awe komo Malasia, pa yega ayanan. Frank a sigui Eric su konseho i a bai Kuala Lumpur i a yega Tailandia un par di luna despues. c

 Segun ku Lightbearer a nabegá bai kosta wèst di Malasia, el a para na Johore Bahru, Muar, Malacca, Klang, Port Swettenham (awor Port Klang) i na Penang. Na kada un di e hafnan ei, e rumannan tripulante a pone e grabashonnan di diskurso basá riba Beibel toka via spiker. Un Testigu di Yehova ku yama Jean Deschamp ku tabata biba na Indonesia e tempu ei, a bisa: “Ni un nave espasial lo no a lanta asina tantu interes.” Despues di toka e grabashonnan, e rumannan a baha na tera i a parti literatura na e hendenan interesá.

 For di Penang, e rumannan a nabegá via Malacca bai Medan, Sumatra (awor parti di Indonesia). Eric Ewins ta kòrda: “Tabata interesante den e área di Medan i nos a pasa masha bon einan. Hopi hende a mustra interes den e mensahe.” E rumannan a laga mas o ménos 3000 publikashon den e área ei.

 Segun ku Lightbearer a sigui bai den direkshon sùit, e rumannan a prediká na mayoria di e hafnan na parti ost di Sumatra. Na novèmber 1936, e barku a bolbe Singapur, i Eric Ewins a baha einan. Algun siman despues, el a kasa ku un ruman muhé ku yama Irene Struys, ku ta biba na Singapur. Eric ku Irene a sigui traha pionero huntu na Sumatra. Esei a nifiká ku Lightbearer tabatin mester di un otro kapitan.

 Norman Senior, un nabegante eksperensiá, a bira e kapitan nobo. El a bini for di Sidney na yanüari 1937. E rumannan a nabegá for di Singapur bai Borneo i Celebes (awor Sulawesi), kaminda nan a prediká ampliamente, kubriendo un distansia di 480 kilometer.

 Ora Lightbearer a yega e haf di Samarinda na Borneo, e direktor di haf a nenga di laga e rumannan prediká na e habitantenan. Sinembargo, ora ruman Norman a splik’é tokante e trabou di prediká, el a kooperá mesora i a asta aseptá algun literatura.

 Na un otro okashon un pastor lokal a pidi ruman Norman bin duna un diskurso na su iglesia. Pero na lugá di duna diskurso e mes, Norman a toka sinku grabashon di diskurso bíbliko riba tokadisko i e pastor a reakshoná bon. E pastor a asta tuma algun literatura p’e hiba pa su amigunan. Entre e lidernan religioso, e so a reakshoná bon asina. E otro lidernan religioso no tabata kontentu ku e trabou ku Testigunan di Yehova tabata hasi. De echo, nan a rabia mashá ku e rumannan ku tabata prediká i a asta pone preshon riba outoridat pa no laga Lightbearer drenta e otro hafnan.

 Na desèmber 1937, Lightbearer a nabegá bai Australia debí ku e lidernan religioso a logra pone e outoridatnan prohibí nan trabou. E tripulashon a ankra nan barku den haf di Sydney nèt na tempu pa asistí na e kongreso di Testigunan di Yehova na aprel 1938. Esei ta mas ku tres aña despues ku Lightbearer a sali for di Sydney. Na komienso di 1940, nèt despues ku e aktividatnan di Testigunan di Yehova a ser prohibí na Australia, nan a bende e barku. Ruman Ewins a deskribí e añanan ku e tabata riba Lightbearer komo “e añanan di mas felis di su bida.” El a bisa: “Sin duda e barku a kumpli ku su propósito.”

 E tripulantenan di Lightbearer a sembra simia di Reino den un region kaminda hopi hende ta biba. Apesar di oposishon, nan trabou a produsí fruta. (Lukas 8:11, 15) En bèrdat, awe tin mas ku 40.000 proklamadó di Reino den e paisnan kaminda e pioneronan ei a prediká. Ki un herensia balioso di un grupo chikitu di hende i nan barku ku e nòmber adekuá.