Resientemente, algun gobernante prominente, sientífiko i eksperto den teknologia a menshoná loke hende lo por logra ku inteligensia artifisial (AI). Nan ta rekonosé ku por hasi bon uso di inteligensia artifisial, pero nan a menshoná nan preokupashon tambe pa e posibel peligernan ku esei ta trese kuné.

•   “Inteligensia artifisial ta un di e teknologianan mas poderoso di nos tempu; por usa inteligensia artifisial pa yuda hende . . . Pero ta importante tambe pa rekonosé ku e inteligensia ei por forma un peliger grandi pa siguridat di hende; e por trapa riba derecho di hende i violá nan privasidat. Ademas, e por kibra e konfiansa ku hende tin den demokrasia.”—Kamala Harris, visepresidente di Merka, 4 di mei 2023.

•   “Inteligensia artifisial (AI) por yuda hopi hende den e ramo di kuido médiko. Sinembargo, e inteligensia ei por ta un peliger tambe pa salú i felisidat di hende.” Dia 9 di mei 2023, un grupo internashonal di dòkter i di eksperto den ramo di kuido médiko, dirigí pa Dr. Frederik Federspiel, a skirbi esei den e revista BMJ Global Health. a

•   “Ya kaba hende por usa inteligensia artifisial pa plama informashon falsu. Pronto, lo e por kita trabou di hende. Algun hende den ramo di teknologia ta masha preokupá. Segun nan, inteligensia artifisial por asta forma un menasa pa henter humanidat.”—E korant The New York Times, 1 di mei 2023.

 Ku tempu, nos lo haña sa si hende lo usa inteligensia artifisial pa yuda otro hende òf pa perhudiká nan. Kiko Beibel ta bisa tokante esei?

 Beibel ta mustra dikon hende no por garantisá ku loke nan ta krea riba tereno teknológiko lo ser usá solamente pa un bon kousa.

1.  1. Asta ora hende krea algu ku bon intenshon, nan lo no por sa adelantá ki konsekuensia negativo nan inventonan por tin.

   •   “Un kaminda por parse bon den bista di hende, pero, na final di kuenta, e kaminda ei ta hiba na morto.”—Proverbionan 14:12.

2.  2. Un persona no por evitá un hende di usa òf malusá loke el a krea.

   •   “Lo mi tin ku bai laga [tur loke mi a traha duru p’e] pa otro hende. Mi no sa si ta hende sabí òf si ta hende bobo lo disfrutá di loke mi a traha duru p’e. Di tur manera, nan lo bira doño di tur e kosnan ku mi a logra haña ku masha esfuerso i sabiduria aki riba tera.”—Eklesiástes 2:18, 19.

 E dudanan ei ku hende tin ta mustra bon kla dikon nos mester di guia di nos Kreador.

 Nos Kreador ta primintí ku nunka lo e no permití hende ni kualke invento di hende, destruí tera òf humanidat.

•   “Tera lo eksistí pa semper.”—Eklesiástes 1:4.

•   “Hende hustu lo heredá tera, i nan lo biba riba dje pa semper.”—Salmo 37:29.

 Pa medio di Beibel, nos Kreador ta guia nos den bida, pa asina den futuro nos por biba den pas i trankilidat. Pa haña sa mas di loke Beibel ta primintí, lesa e artíkulonan: “Tin un Guia Konfiabel Ku Por Yuda Bo Haña un Futuro Sigur?” i “Berdadero Speransa pa un Mihó Futuro.”