Hopi lider di iglesia ta animá hende pa nan partisipá den guera, manera nos por a mira den kaso di e guera na Ukrania. Siguientemente, tin dos ehèmpel ku ta mustra kon e kleronan, na ámbos banda di e konflikto, ta apoyá hende pa sostené guera:

•   Dia 16 di mart 2022, e korant The Jerusalem Post a raportá lo siguiente: ‘Nos ke gradisí tur nos guereronan ku ta defendiendo nan pais natal Ukrania . . . Nos ta hasi orashon pa boso, i nos ta apoyá boso di henter nos kurason.’—Metropolitano Epifanio I di Kiev.

•   Dia 3 di aprel 2022, Reuters a skirbi ku kabes di Iglesia Òrtodòks na Rusia a tene un seremonia, riba djadumingu, pa e sòldánan ruso. Durante su predikashi, el a animá e sòldánan ruso pa nan defendé nan pais den e guera kontra Ukrania.

 Awor, kisas bo ta puntra bo mes: Un kristian mester partisipá den guera? Kiko Beibel ta bisa?

 Beibel ta mustra ku hende ku realmente ta sigui Hesukristu no ta partisipá den guera.

•   “Hinka bo spada bèk na su lugá, pasobra ken ku usa spada lo muri pa medio di spada.”—Mateo 26:52.

   Un hende ku ta apoyá guera òf ku ta bringa den guera ta obedesiendo e palabranan ei di Hesus?

•   “Mi ta duna boso un mandamentu nobo: stima otro; meskos ku ami a stima boso, boso tambe stima otro. Na esaki tur hende lo sa ku boso ta mi disipelnan, esta, si boso ta stima otro.”—Huan 13:34, 35.

   Un hende ku ta apoyá guera ta stima otro hende manera Hesus a bisa ku su disipelnan, òf su siguidónan, mester hasi?

 Pa mas informashon, lesa e artíkulo na spañó “Guera i Kristianismo: Ta Kuadra ku Otro?”

 Un kristian por keda sin partisipá den e gueranan ku tin awendia? Sí. Beibel ta mustra ku den nos tempu, durante e periodo ku Beibel ta yama “e último dianan,” lo tin hende di tur nashon ku lo no “train pa guera” mas. Esei ta na armonia ku e siñansanan di Hesus.—Isaías 2:2, 4.

•   Pa mas informashon, lesa e seri di artíkulo “Kiko Dios Ta Pensa di Guera?” den E Toren di Vigilansia.

 Yehova, a “e Dios di pas,” lo libra su pueblo “for di opreshon i violensia.” Pronto, esei lo bira realidat pa medio di Dios su Reino selestial.—Filipensenan 4:9; Salmo 72:14.

•   Pa mira kon esei lo bira realidat, wak e vidio Kiko e Reino di Dios Ta?