Bo a ripará ku hopi religion ta mas interesá den gana sèn ku den duna hende guia spiritual? Nan ta hasi propaganda pa e servisionan i produktonan ku nan ta bende. I hopi di e lidernan ta haña un salario haltu i ta hiba un bida di luho. Ban trata algun ehèmpel:

•   Despues di un investigashon a sali afó ku durante un periodo di 13 aña, un obispu katóliko a usa plaka di e misa pa e por a bula 150 biaha riba un avion privá i pa e por a kore 200 biaha den un limousine. Ademas, el a gasta mas ku kuater mion dòler pa renobá e kas ku e misa a buska p’e.

•   Tin un predikadó den un pais na Afrika ku ora e tene su sirbishi, míles di hende ta asistí. Su iglesia ta masha grandi mes i e ta bende tur tipo di produkto for di zeta milagroso te ku sèrbètè i flanèl ku potrèt di su kara riba dje. Aunke ku mayoria di hende ku ta asistí su sirbishinan ta pober, e mes ta masha riku mes.

•   Na China, e budistanan tin kuater seru sagrado i dos di nan a ser registrá komo kompania ku hende por kumpra akshon den dje. Anto, tin un tèmpel masha famoso mes, ku yama Shaolin, ku ta enbolbí den diferente proyekto komersial. Anto e mònik ku ta na kabes ta ser yamá e “mònik CEO.”

•   Na Merka, tin hopi negoshi ku ke duna nan empleadonan guia spiritual i p’esei nan ta tuma hende awor pa inventá ritonan religioso.

 Kiko abo ta pensa di religion ku ta hasi negoshi? Bo a yega di puntra bo mes kon Dios ta sinti tokante hende ku ta usa religion pa gana plaka?

 Yehova no ta keda niun tiki kontentu ora ku religion ta hasi negoshi. Por ehèmpel, Beibel ta mustra nos ku den pasado Yehova tabata keda masha rabiá mes ku e saserdotenan ku tabata supuestamente represent’é, pero ku tabata “kobra pa duna instrukshon.” (Mikéas 3:11) Anto Dios tabata odia ora ku hende tabata hasi negoshi den su kas i hasié “un kueba di ladron.”—Yeremías 7:11.

 Anto, meskos ku su Tata, Hesus no tabata keda niun tiki kontentu ora ku hende tabata usa religion pa hasi ganashi. Tempu ku Hesus tabata akí riba tera, e lidernan religioso tabata gana bon sèn serka e komersiantenan pasobra nan tabata laga nan hasi negoshi den e tèmpel na Herúsalèm. Ei, nan tabata probechá dje hendenan ku tabata bini pa adorá. Anto p’esei, ku kurashi, Hesus a saka e komersiantenan desonesto ei for di e tèmpel bisando nan: “Stòp di hasi e kas di mi Tata un kas di negoshi!”—Huan 2:14-16.

 Na e manera ku Hesus tabata prediká el a demostrá ku e ta pensa meskos ku su Tata. (Huan 8:28, 29) Por ehèmpel, ora e tabata siña hende tokante Dios, nunka el a kobra nan pa esei. Anto ora e tabata hasi su milagernan, manera duna kuminda na hende ku tabatin hamber òf kura hende i lanta morto, e nunka a hasi esei a kambio di plaka. Hesus nunka a prediká pa hasi su mes riku. Eigenlijk, e no tabatin ni su mes kas.—Lukas 9:58.

 Hesus a siña su siguidónan pa nunka hasi aktividatnan religioso pa ganashi. P’esei el a bisa nan: “Boso a risibí pòrnada, duna pòrnada.” (Mateo 10:8) Anto e promé siguidónan ei, kende despues a ser yamá kristian, a sigui Hesus su instrukshonnan. Ban wak algun di e ehèmpelnan ei:

•   Apòstel Pedro, kende a haña entrenamentu serka Hesus, a haña oferta for di un hòmber ku yama Simon. Simon kier a ofres’é plaka a kambio di poder i outoridat. Mesora, Pedro a rechasá Simon su oferta i a korigié bisando: “Laga bo plaka ser destruí huntu ku bo! Bo ta kere ku bo por usa plaka pa kumpra loke Dios a duna nos pòrnada?”—Echonan 8:18-20.

•   Mirando ku Apòstel Pablo tabata biaha bai diferente kaminda pa prediká, e tabata un hende hopi konosí. Aunke el a traha hopi duru pa hopi aña i a yuda diferente kongregashon, nunka el a hasi esei pa gana plaka. E i su rumannan kristian no tabata “hasi negoshi ku e palabra di Dios manera hopi hende” tabata hasi. (2 Korintionan 2:17) Al kontrario, Pablo a skirbi: “Nos tabata traha di dia i anochi pa nos no pone un karga pisá riba ningun di boso ora nos tabata prediká e bon notisia di Dios na boso.”—1 Tesalonisensenan 2:9.

 OPero klaru, asta e kristiannan di promé siglo ei tabatin mester di plaka pa nan por a hasi e trabou di prediká i yuda hende ku tabata den nesesidat. Pero, loke nan no tabata hasi ta kobra hende pa yuda nan adorá Dios. Kada hende por a skohe pa duna algu si nan tabata ke basá riba e siguiente prinsipionan:

•   2 Korintionan 8:12: “Pasobra si e disponibilidat t’ei promé, loke un hende ta duna ta spesialmente aseptabel pa Dios ora esei ta segun loke e tin, no segun loke e no tin.”

   Nifikashon: Loke ta mas importante ku e kantidat ku un hende ta duna, ta e motivashon ku nan tin ora nan ta duna.

•   2 Korintionan 9:7: “Laga kada hende hasi manera el a disidí den su kurason, no di mala gana, ni fòrsá, pasobra Dios ta stima hende ku ta duna ku alegria.”

   Nifikashon: Dios no ke pa niun hende sinti nan fòrsá pa duna algu. E ta keda hopi kontentu ora ku un persona duna algu pasobra e mes ke.

 Beibel ta bisa bon kla ku Dios no ta aseptá tur forma di adorashon. (Mateo 7:21-23) Tin un profesia den Beibel ku ta kompará tur religion falsu ku un prostituta. Dikon? Pasobra nan ta traha huntu ku e gobièrnunan pa asina nan gana mas plaka, haña mas privilegio i tambe probechá di e hendenan. (Revelashon 17:1-3; 18:3) E mesun profesia ei ta bisa kon Dios pronto lo destruí tur religion falsu.—Revelashon 17:15-17; 18:7.

 Pero Dios, turesten, no ke pa e kosnan malu ku religion falsu ta hasi stroba hende di hala serka dje. (Mateo 24:11, 12) P’esei, e ta urgi hende di bon kurason pa siña kon pa ador’é na un manera ku e ta aseptá i tambe pa hui di religion falsu.—2 Korintionan 6:16, 17.