Segun Organisashon Mundial di Salú: “Violensia kontra hende muhé ta un problema di salú públiko mundial ku ta manera un epidemia, i mester hasi algu lihé pa stòp esei.” E organisashon ei ta kalkulá ku kasi 30 porshento “di tur hende muhé ku tabata kasá òf ku tabatin un pareha a sufri violensia físiko i/òf seksual” na man di nan kasá òf pareha. Un rapòrt di Nashonnan Uní a menshoná ku resientemente, den un aña, rònt mundu un averahe di 137 hende muhé tabata ser matá pa dia na man di nan kasá òf otro miembro di famia. a

 E estadístikanan ta mustra kon grandi e problema di violensia doméstiko ta, pero nan no por deskribí e doló emoshonal ni físiko ku kada víktima ta sinti.

 Abo ta víktima di violensia doméstiko, òf relashonal? Bo konosé un hende ku ta víktima? Si esei ta e kaso, wak e siguiente puntonan for di Beibel ku por yuda bo.

  No ta bo falta ku bo ta ser maltratá

  Bo por haña yudansa

  Dios ta preokupá pa bo

  Violensia doméstiko lo kaba un dia

  Kon pa yuda un víktima

 Loke Beibel ta bisa: “Kada un di nos lo duna kuenta i rason na Dios pa nos akshonnan.”—Romanonan 14:12.

 Kòrda riba esaki: E persona ku ta maltratá bo ta responsabel pa loke e ta hasi.

 Si bo pareha ta kulpa abo pa e maltrato ku e ta kousa, ta e ta robes. Un esposa meresé pa su esposo stim’é, no maltrat’é.—Kolosensenan 3:19.

 Tin biaha, e persona ku ta maltratá un otro hende por ta sufri di un malesa mental òf a lanta den un famia kaminda tabatin maltrato òf alkoholismo. Pero asina mes, e tin ku duna kuenta na Dios pa e manera ku e ta trata bo. I ta é tin ku hasi tur loke ta nesesario pa kambia su komportashon.

 Loke Beibel ta bisa: ‘Ku hopi konsehero plannan ta wòrdu lográ.’—Proverbionan 15:22.

 Kòrda riba esaki: Si bo ta sinti ku bo ta kore peliger òf bo no sa kiko pa hasi, buska yudansa.

 Dikon lo bo mester di yudansa di otro hende? Pasobra ora bo ta sufri maltrato, por tin hopi kos ta preokupá bo. Kisas ta difísil pa bo disidí kiko pa hasi, pasobra bo no sa kua di e siguiente kosnan ta mas importante:

•   Bo siguridat personal

•   Bienestar di bo yunan

•   Bo situashon finansiero

•   Bo amor pa bo pareha

•   Bo deseo pa salba e relashon si bo pareha kambia su komportashon

 Ta normal ku bo ta sinti bo konfundí i asta desesperá. Serka ken bo por bai pa yudansa?

 Un amigu di konfiansa òf un miembro di famia. E persona ei por duna yudansa práktiko i emoshonal. Ora bo papia ku un hende ku ta preokupá pa bo, esei kaba por ta un gran yudansa.

 Liña di telefòn spesial (Hotline) pa víktima di violensia doméstiko. E instansianan ei por yuda bo mesora. E persona ku ta atendé bo na telefòn por yuda bo traha un plan pa protehá bo mes. Si bo pareha ta atmití ku e tin un problema i realmente ke kambia su komportashon, e persona na telefòn lo por yud’é dal e promé pasonan nesesario.

 Otro yudansa pa kaso di emergensia. Eseinan por ta, entre otro, dòkter, verpleegster i otro profeshonal kualifiká ku tambe por yuda bo mesora si bo bida ta kore peliger.

 Loke Beibel ta bisa: “SEÑOR [Yehova] b ta serka di e hende di kurason kibrá, i ta salba esnan di spiritu abatí.”—Salmo 34:18.

 Kòrda riba esaki: Dios ta primintí di yuda bo.

 Yehova ta preokupá pa bo. (1 Pedro 5:7) Dios ta komprondé bo pensamentunan i sintimentunan di mas profundo. E por konsolá bo mediante Su Palabra, Beibel. Ademas, e ke pa bo papia kuné den orashon. Ora bo ta resa, bo por pidi Dios duna bo sabiduria i forsa pa trata ku bo situashon.—Isaías 41:10.

 Loke Beibel ta bisa: “Kada un di nan lo sinta bou di su palu di wendrùif i bou di su palu di figu, i ningun hende lo no spanta nan.”—Mikéas 4:4.

 Kòrda riba esaki: Beibel ta primintí ku pronto den futuro lo tin pas den tur kas.

 Yehova Dios tin e úniko solushon permanente pa tur nos problemanan. Beibel ta primintí: “Lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas.” (Revelashon 21:4) Na e tempu ei, asta mal rekuerdo lo disparsé i ser remplasá pa dushi rekuerdo. (Isaías 65:17) Esei ta e futuro ku Beibel ta ofresé bo, un futuro yen di pas.