Aña 2023 a marka 75 aña desde ku Testigunan di Yehova a kuminsá ku tradukshon na papiamentu. Papiamentu ta un idioma kreol ku ta derivá prinsipalmente for di e idiomanan hulandes, portugues i spañó. Aktualmente, mas o ménos un 350.000 hende ku ta biba na e islanan konosí komo ABC, esta, Aruba, Boneiru i Curaçao (Kòrsou) ta papia papiamentu.

E trabou di prediká na e islanan ei a kuminsá na final di aña 1920. Pa tempu ku e misioneronan di Skol di Galaad a yega Kòrsou na aña 1946, ya tabatin diferente kongregashon riba e isla. Sinembargo, no tabatin publikashon ainda na papiamentu. E rumannan tabata tene reunion di kongregashon na ingles i papiamentu, i nan tabata usa e publikashonnan na hulandes, ingles i spañó. Ounke e rumannan tabata konsiente ku tabatin mester di publikashon bíbliko na papiamentu, tabatin diferente reto. Por ehèmpel, no tabatin dikshonario na papiamentu i no tabatin regla establesí kon pa skirbi papiamentu. Ruman Bill Yeatts tabata un di e promé misioneronan ku a ser asigná na e islanan, i el a yuda ku e trabou di tradukshon. Manera a ser menshoná den Anuario 2002 di Testigunan di Yehova, ruman Yeatts a bisa ku ‘pa por a tradusí nos publikashonnan, nos mester a bisa i skirbi kos ku nunka promé a ser bisá òf skirbí na papiamentu. Tabata difísil pa bini ku regla di gramátika i ekspreshon nobo.’ Apesar di e difikultatnan ei, e rumannan a sigui ku e trabou di tradukshon.

E promé publikashon ku a ser tradusí na papiamentu tabata e foyeto E Alegria di Toer Hende, ku a ser kompletá na aña 1948. Ku tempu, mas publikashon a ser tradusí, entre otro, e revistanan Toren di Vigilansia i Spièrta! Na e momento akí, Tradukshon di Mundu Nobo na papiamentu ta birando disponibel gradualmente. E promé buki di Beibel ku a ser tradusí tabata Rut, ku a ser publiká dia 1 di òktober 2021.

E esfuersonan ku a ser hasí den e trabou di tradukshon a duna bon resultado, ya ku e kantidat di publikadó riba e islanan ta sigui krese. Na aña 1956, ora ku e promé kongregashon na papiamentu a ser formá, tabatin 16 publikadó. Awe, tin mas ku 1.600 publikadó den 25 kongregashon na papiamentu. Durante aña 2023, mas ku 1.200 estudio di Beibel a ser dirigí.

Nos ta sigur ku Yehova lo sigui bendishoná e esfuersonan di tur e rumannan di idioma papiamentu, segun ku nan ta sigui laga nan lus bria i asina duna gloria na Yehova.—Mateo 5:16.